តំណាងរាស្ត្រគណបក្សសង្គ្រោះជាតិ អះអាងថា មន្ត្រី និងសកម្មជនរបស់ខ្លួនដែលកំពុងជាប់ឃុំក្នុងពន្ធនាគារព្រៃស នៅតែមានស្មារតីរឹងមាំ ទោះបីជាពួកគេមិនទាន់មានពន្លឺយុត្តិធម៌ក្តី។
អ្នកស្រី មូរ សុខហួរ បានថ្លែងប្រាប់អ្នកសារព័ត៌មានដូច្នេះ ក្រោយពីអ្នកស្រី និងតំណាងរាស្ត្រមួយចំនួនទៀត បានចូលសួរសុខទុក្ខតំណាងរាស្ត្រ និងសកម្មជនរបស់ខ្លួនក្នុងពន្ធនាគារព្រៃស នៅថ្ងៃទី២១ ខែកុម្ភៈ។
អ្នកស្រី មូរ សុខហួរ បន្តថា អ្នកកំពុងជាប់ឃុំនោះ បានផ្តាំឲ្យគណបក្សសង្គ្រោះជាតិ បន្តធ្វើការទៅមុខដោយក្លៀវក្លា ដើម្បីរកយុត្តិធម៌ជូនប្រជាពលរដ្ឋ និងត្រៀមខ្លួនចូលរួមប្រកួតប្រជែងការបោះឆ្នោតក្រុមប្រឹក្សាឃុំ-សង្កាត់ខាងមុខ។ ទន្ទឹមគ្នានេះ ពួកគាត់ក៏ស្នើឲ្យគណបក្សជួយសម្រួលកុំឲ្យតម្លៃទំនិញ និងម្ហូបអាហារក្នុងពន្ធនាគារឡើងថ្លៃខុសពីធម្មតា៖ «ឆន្ទៈ ឧត្ដមគតិស្នេហាជាតិ មនសិការ គាត់រឹតតែខ្ពង់ខ្ពស់ទៅទៀត ហើយគាត់បានផ្ដាំជាមួយយើងខ្ញុំអម្បាញ់មិញថា លោកប្រធាន សម រង្ស៊ី ចាកចេញពីប្រធានគណបក្ស ប៉ុន្តែលោកប្រធាន សម រង្ស៊ី អត់មានចាកចេញពីបេះដូងរបស់គាត់ទេ។ គាត់ថា គាត់នៅបាន (ពន្ធនាគារ) ប៉ុន្តែយើងនៅខាងក្រៅធ្វើយ៉ាងម៉េចរកយុត្តិធម៌ជូនប្រជារាស្ត្រ ដូច្នេះក្នុងនយោបាយដែលកំពុងតែតានតឹងនេះ ហើយមានច្បាប់អនុម័តថ្មីៗនេះមកទៀត គាត់យល់ច្បាស់ណាស់អំពីអនាគតលទ្ធិប្រជាធិបតេយ្យ សេរីពហុបក្សសម្រាប់ជាតិ។ ចំពោះគាត់គឺគាត់យល់ឃើញថា គង់តែមានថ្ងៃគាត់ចេញ ហើយគាត់ចេញជាមួយនឹងឧត្ដមគតិរបស់គាត់ នៅថែរក្សាបានជានិច្ច»។
មន្ត្រីជាន់ខ្ពស់គណបក្សសង្គ្រោះជាតិ រូបនេះ ក៏បានលើកឡើងអំពីការចូលរួមប្រជុំសភាឡើងវិញផងដែរ។ លោកស្រីបញ្ជាក់ថា ប្រសិនបើរដ្ឋសភាបង្កើតច្បាប់ដើម្បីបម្រើផលប្រយោជន៍ជាតិ និងប្រជាជននោះ តំណាងរាស្ត្រគណបក្សប្រឆាំងនឹងចូលរួមប្រជុំភ្លាម ប៉ុន្តែប្រសិនបើបង្កើតច្បាប់ណាមួយដែលនាំឲ្យខូចប្រព័ន្ធលទ្ធិប្រជាធិបតេយ្យ និងមិនបម្រើផលប្រយោជន៍ជាតិនោះទេ គឺតំណាងរាស្ត្របក្សប្រឆាំងមិនអាចទៅអង្គុយប្រថាប់ត្រាក្នុងរដ្ឋសភាបានឡើយ។
តាមគម្រោង ការចូលសួរសុខទុក្ខមន្ត្រី និងសកម្មជនក្នុងពន្ធនាគារនេះ គឺដឹកនាំដោយប្រធានស្ដីទីគណបក្សសង្គ្រោះជាតិ លោក កឹម សុខា ប៉ុន្តែអ្នកស្រី មូរ សុខហួរ ថា លោក កឹម សុខា បានខកខានដោយសារមានធុរៈជួបជាមួយមន្ត្រីទូត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។