លោក សម រង្ស៊ី ទាមទារ​ចូល​រួម​ដោះស្រាយ​បញ្ហា​ព្រំដែន​ជាមួយ​រដ្ឋាភិបាល

0:00 / 0:00

លោក សម រង្ស៊ី ប្រធាន​គណបក្ស​ក្រៅ​រដ្ឋាភិបាល ទាមទារ​អោយ​រដ្ឋាភិបាល​ដាក់​បញ្ចូល​គណបក្ស​ប្រឆាំង និង​សង្គម​ស៊ីវិល ចូល​រួម​ដោះស្រាយ​បញ្ហា​ព្រំដែន​កម្ពុជា-​វៀតណាម។ ផ្ដល់​បទសម្ភាសន៍​ដល់​អ្នក​សារព័ត៌មាន នៅ​ថ្ងៃ​ទី​១១ ខែ​កក្កដា ប្រធាន​គណបក្ស​សង្គ្រោះ​ជាតិ លោក សម រង្ស៊ី និយាយ​ថា បញ្ហា​ព្រំដែន​លុះ​ត្រា​ខ្មែរ រួម​គ្នា​ទើប​អាច​ដោះស្រាយ​បាន។ ទោះ​យ៉ាង​នេះ​ក្តី មន្ត្រី​រដ្ឋាភិបាល​លើក​ឡើង​ថា បើ​បក្ស​ប្រឆាំង​ចង់​ចូលរួម​ធ្វើ​ការងារ លុះ​ត្រា​គណបក្ស​ប្រឆាំង​ចូល​រួម​ធ្វើ​ជា​រដ្ឋាភិបាល​ចម្រុះ​ជាមួយ​គណបក្ស​ប្រជាជន​កម្ពុជា។

លោក សម រង្ស៊ី លើក​ឡើង​ថា បញ្ហា​ព្រំដែន​មិន​មែន​ជា​រឿង​របស់​រដ្ឋាភិបាល​របស់​គណបក្ស​កាន់​អំណាច​ទេ ប៉ុន្តែ​គឺ​ជា​រឿង​របស់​ខ្មែរ​ទាំង​អស់​គ្នា។

ប្រធាន​គណបក្ស​ប្រឆាំង​លោក សម រង្ស៊ី ចង់​មាន​វត្តមាន​ចូល​រួម​ដើម្បី​ស្រាយ​បញ្ហា​ព្រំដែន​កម្ពុជា-​វៀតណាម ខណៈ​គណបក្ស​សង្គ្រោះ​ជាតិ នៅ​ក្រៅ​រដ្ឋាភិបាល។ ប៉ុន្តែ​ការ​ចង់​បាន​នេះ មិន​ទទួល​បាន​ការ​ស្វាគមន៍​ពី​មន្ត្រី​រដ្ឋាភិបាល​ទេ។ ចំណែក​អ្នក​វិភាគ​ស្ថានការណ៍​នយោបាយ​យល់​ថា បញ្ហា​ព្រំដែន​គួរ​ដោះស្រាយ​នៅ​រដ្ឋសភា ជា​ជាង​នាំ​គ្នា​ទៅ​ដល់​ព្រំដែន​រួច​ហើយ​ទើប​ហៅ​រដ្ឋាភិបាល​ឲ្យ​ដោះស្រាយ។

ប្រធាន​គណបក្ស​ប្រឆាំង លោក សម រង្ស៊ី ថ្លែង​ថា រឿង​ព្រំដែន​បើ​មាន​តែ​រដ្ឋាភិបាល​ធ្វើ​ការងារ​នេះ​មិន​គ្រប់គ្រាន់​ទេ គឺ​ទាមទារ​មាន​ការ​ចូល​រួម​ពី​មជ្ឈដ្ឋាន​ផ្សេងៗ។ ទាក់​ទាង​រឿង​ព្រំដែន​នេះ​ដែរ លោក សម រង្ស៊ី ចង់​ឃើញ​រដ្ឋាភិបាល​យក​ផែនទី​ទៅ​ដោះស្រាយ​បញ្ហា​ជាមួយ​ប្រទេស​វៀតណាម ជា​ផែនទី​តម្កល់​ទុក​នៅ​អង្គការ​សហប្រជាជាតិ ហើយ​ផែន​ទី​នោះ​ចម្លង​តាម​ប្រព័ន្ធ​អេឡិចត្រូនិក៖ «យើង​ត្រូវ​ចូលរួម​ឲ្យ​គណបក្ស​មួយ រដ្ឋាភិបាល​តែ​ឯង​ធ្វើ​ការងារ​នេះ​មិន​គ្រប់គ្រាន់​ទេ។ ការងារ​នេះ​ជា​ការងារ​របស់​យើង​ទាំង​អស់​គ្នា របស់​ប្រជាពលរដ្ឋ​ទាំង​មូល»

អ្នក​វិភាគ​ស្ថានការណ៍​នយោបាយ​នៅ​កម្ពុជា លោក​បណ្ឌិត សុខ ទូច យល់​ថា គណបក្ស​សង្គ្រោះ​ជាតិ អាច​ចូល​រួម​ដោះស្រាយ​បញ្ហា​ព្រំដែន​កម្ពុជា-​វៀតណាម តាម​រយៈ​រដ្ឋ​សភា។ លោក​បណ្ឌិត សុខ ទូច បន្ថែម​ទៀត​ថា ការ​ចូល​រួម​របស់​គណបក្ស​សង្គ្រោះ​ជាតិ ដែល​ត្រឹមត្រូវ​នោះ គណបក្ស​សង្គ្រោះ​ជាតិ បង្ហាញ​អ្នក​ជំនាញ​របស់​ខ្លួន​មក​ជជែក​ជាមួយ​មន្ត្រី​រដ្ឋាភិបាល តាម​រយៈ​កិច្ចប្រជុំ​នៅ​ក្នុង​សភា​ជា​ជាង​តំណាង​គណបក្ស​នេះ​ចុះ​ដល់​ព្រំដែន​មាន​បញ្ហា​រួច​ហើយ ទើប​កោះ​ហៅ​មន្ត្រី​រដ្ឋាភិបាល​មក​ដោះស្រាយ។

កាល​ពី​ថ្ងៃ​ទី​៦ ខែ​កក្កដា រដ្ឋាភិបាល​កម្ពុជា ស្នើ​សុំ​ផែនទី​ពី​អង្គការ​សហប្រជាជាតិ​ដើម្បី​ដោះស្រាយ​បញ្ហា​ព្រំដែន​កម្ពុជា-​វៀតណាម។ រឿង​ព្រំដែន​នេះ ​ប្រធាន​គណបក្ស​ប្រឆាំង​ទិញ​ផែនទី​ពី​ប្រទេស​បារាំង ដោយ​សំអាង​ថា មាន​ខ្នាត ១/១០០.០០០ (មួយ​លើ​មួយ​រយ​ពាន់) ជា​ផែនទី​គ្រប​ដណ្ដប់​តាម​ព្រំដែន​ប្រទេស​កម្ពុជា-វៀតណាម។ ប៉ុន្តែ​លោក សម រង្ស៊ី ប្រាប់​ថា លោក​មិន​ទាន់​បាន​យក​ផែនទី​ទៅ​និយាយ​ជាមួយ​លោក ហ៊ុន សែន នៅ​ឡើយ​ទេ។

​អ្នក​នាំ​ពាក្យ និង​ជា​រដ្ឋលេខាធិការ​នៃ​ទីស្ដីការ​គណៈរដ្ឋមន្ត្រី លោក ផៃ ស៊ីផាន ឆ្លើយ​តប​ការ​លើក​ឡើង​របស់​លោក សម រង្ស៊ី ថា រឿង​ព្រំដែន​ជា​ការងារ​របស់​រដ្ឋាភិបាល ប្រសិនបើ​គណបក្ស​សង្គ្រោះ​ជាតិ ចង់​ចូលរួម​ធ្វើ​ការងារ​នេះ គណបក្ស​សង្គ្រោះ​ជាតិ សុំ​ចូល​ជា​រដ្ឋាភិបាល​ចម្រុះ​ជាមួយ​គណបក្ស​ប្រជាជន​កម្ពុជា។

លោក ផៃ ស៊ីផាន បន្ត​ថា ការ​ថ្លែង​របស់​លោក សម រង្ស៊ី គ្រាន់តែ​ជា​សុបិន​របស់ លោក សម រង្ស៊ី ប៉ុណ្ណោះ៖ «ឯកឧត្ដម សម រង្ស៊ី ប្រហែល​ជា​លោក​សុបិន​ខ្លួន​លោក។ ឲ្យ​លោក​ពិចារណា​មើល​ប្រទេស​ជុំវិញ​នៅ​លើ​ពិភពលោក មាន​គណបក្ស​ប្រឆាំង​ណា សង្គម​ស៊ីវិល​ណា​ទៅ​ដោះស្រាយ​បញ្ហា​ព្រំដែន​ទេ?»

បញ្ហា​ព្រំដែន​កម្ពុជា-​វៀតណាម ផ្ទុះ​ឡើង​ជា​ថ្មី​នៅ​រយៈពេល​ពេល​ចុង​ក្រោយ​នេះ បន្ទាប់​ពី​តំណាងរាស្ត្រ​គណបក្ស​សង្គ្រោះ​ជាតិ ចុះ​ទៅ​តំបន់​ព្រំដែន​អង្កេត​ឃើញ​ប្រទេស​វៀតណាម រំលោភ​ដែនដី​កម្ពុជា។ ប្រទេស​ទាំង​ពីរ​បាន​ជួប​ប្រជុំ​ស្វែង​រក​ដំណោះស្រាយ ជា​លទ្ធផល​ភាគី​កម្ពុជា អះអាង​ថា ភាគី​វៀតណាម សន្យា​លុប​ស្រះ​ទឹក​ចំនួន​៣ ក្នុង​ខេត្ត​រតនគិរី និង​ផ្អាក​ការ​សាងសង់​សំណង់​រឹងមាំ និង​ផ្លូវ​តាម​ព្រំដែន​ក្នុង​ខេត្ត​ស្វាយរៀង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។