ការប្រកាសនេះ ធ្វើឡើងមួយថ្ងៃ បន្ទាប់ពី គ.ជ.ប បើកកញ្ចប់សុវត្ថិភាព "ក" ១៣កញ្ចប់ តាមបង្គាប់ក្រុមប្រឹក្សាធម្មនុញ្ញ ហើយរកឃើញពីភាពមិនប្រក្រតីជាច្រើន។
ថ្នាក់ដឹកនាំគណបក្សសង្គ្រោះជាតិ បញ្ជាក់ក្នុងសន្និសីទកាសែតថា គណបក្សប្រឆាំងដ៏ធំនេះមិនមានទំនុកចិត្តលើក្រុមប្រឹក្សាធម្មនុញ្ញ ដែលជាស្ថាប័នបកស្រាយច្បាប់កំពូលរបស់ជាតិឡើយ។ គណបក្សនេះនៅតែស្នើឲ្យបក្សកាន់អំណាចបន្ទន់ជំហរដើម្បីបង្កើតគណៈកម្មការដោះស្រាយពីភាពមិនប្រក្រតីក្នុងដំណើរការបោះឆ្នោតឲ្យបានសិន មុននឹង គ.ជ.ប ប្រកាសលទ្ធផលឆ្នោត នៅថ្ងៃទី១០ ខែកញ្ញា ខាងមុខ។
លោក សម រង្ស៉ី ប្រធានគណបក្សសង្គ្រោះជាតិ មានប្រសាសន៍ថា ប្រជារាស្ត្រខ្មែរមិនសុខចិត្តទេចំពោះចំណាត់ការមិនប្រក្រតីរបស់ គ.ជ.ប. ហើយថា នេះជាគម្រោងផែនការរបស់គណបក្សកាន់អំណាចដើម្បីលួចសន្លឹកឆ្នោតជាប្រព័ន្ធ។
លោកបន្តថា ការបើកកញ្ចប់សុវត្ថិភាព "ក" ទាំង ១៣ នៅខេត្តក្រចេះ ជាការបង្ហាញឲ្យឃើញថា គ.ជ.ប ធ្វើចោរផង ធ្វើប៉ូលិសផង និងធ្វើចៅក្រមកាត់ក្ដីផង ហើយបើក្រុមប្រឹក្សាធម្មនុញ្ញមិនបញ្ជាឲ្យគ.ជ.ប បើកកញ្ចប់ "ក" នៅកន្លែងដទៃ និងបើកសវនាការជាសាធារណៈ មានន័យថា ក្រុមប្រឹក្សាដែលមាននាទីអព្យាក្រឹតមួយនេះក៏ជាគ្នីគ្នារបស់គណបក្សកាន់អំណាចដែរ។
លោក សម រង្ស៉ី បញ្ជាក់ថា ដល់ទឹកចុងក្រោយបាតុកម្មអហិង្សាទូទាំងប្រទេសនឹងកើតមានដោយជៀសមិនរួចឡើយ។
ប្រធាននិងអនុប្រធានគណបក្សសង្គ្រោះជាតិ បានដើរកៀរគរសំឡេងគាំទ្រពីពលរដ្ឋជាច្រើនថ្ងៃមកហើយ។ សារសំខាន់ដែលគណបក្សសង្គ្រោះជាតិដាស់អារម្មណ៍ពលរដ្ឋនោះ គឺជំរុញឲ្យម្ចាស់ឆ្នោតទាមទារនូវយុត្តិធម៌។
លោក កឹម សុខា ពន្យល់ថា យុត្តិធម៌នោះ គឺជាការដោះស្រាយពីភាពមិនប្រក្រតីជុំវិញដំណើរការបោះឆ្នោត ដោយតម្លាភាព និងអាចទទួលយកបានទាំងសងខាង បើទោះជាគណបក្សសង្គ្រោះជាតិចាញ់ឈ្នះក៏ដោយ។
យ៉ាងណាមិញ ក្រសួងមហាផ្ទៃធ្លាប់ចេញលិខិតព្រមានគណបក្សសង្គ្រោះជាតិ ម្ដងរួចហើយកាលពីដើមខែសីហា ឆ្នាំ២០១៣។ លិខិតនោះ គំរាមថា បើសិនជាមហាបាតុកម្មកើតឡើងមែននោះ លោក សម រង្ស៉ី និងគណបក្សសង្គ្រោះជាតិ ត្រូវតែទទួលខុសត្រូវចំពោះមុខច្បាប់ និងភាពចលាចល នៅក្នុងសង្គម ដែលនឹងអាចកើតមានដោយជៀសមិនរួច។
ក្រសួងមហាផ្ទៃក៏បង្គាប់ឲ្យអាជ្ញាធរគ្រប់ជាន់ថ្នាក់ចាត់វិធានការចំពោះអ្នកដែលបង្ករភាពវ៉ឹកវរក្នុងសង្គមទៀតផង។ ក៏ប៉ុន្តែក្រសួងមហាផ្ទៃនិងសមត្ថកិច្ចមិនទាន់រកឃើញអ្នកដែលដាក់គ្រាប់បែកនៅជាប់របងតុលាការរាជធានីភ្នំពេញ និងនៅស្នាក់ការគណបក្សប្រជាជនកម្ពុជា នៅស្រុកគងពិសី ខេត្តកំពង់ស្ពឺ នៅឡើយ។
ទាក់ទងនឹងមហាបាតុកម្មអហិង្សានេះ អ្នកវិភាគនយោបាយឯករាជ្យ លោកបណ្ឌិត សុខ ទូច មានប្រសាសន៍ថា បើសិនជាមានបាតុកម្មកើតមានមែននោះ តើបាតុកម្មនេះធ្វើឡើងក្នុងគោលបំណងបែបណា ហើយមានការទទួលខុសត្រូវកម្រិតណាដែរ? លោកបន្តថា កម្ពុជារស់បានដោយសារម្ចាស់ជំនួយ ហើយបើមានបាតុកម្មនឹងនាំឲ្យប្រព័ន្ធគ្រប់គ្រងជាប់គាំងទាំងអស់ នោះហើយជាបញ្ហា។
លោកបញ្ជាក់ថា គណបក្សសង្គ្រោះជាតិអាចជ្រើសយកបាតុកម្មបាន ហើយធ្វើបានជោគជ័យ បើសិនជាមានការគាំទ្រពីសំណាក់ប្រជាពលរដ្ឋទូទាំងប្រទេសមែននោះ តែបើរាស្ត្រមិនគាំទ្រទេ បាតុកម្មក៏មិនមានន័យ។
គណបក្សសង្គ្រោះជាតិ នៅថ្ងៃទី២៦ ខែសីហា ឆ្នាំ២០១៣ ប្រកាសបើកការជួបជុំមួយ នៅទីលានប្រជាធិបតេយ្យដែលមានមនុស្សរាប់ពាន់នាក់ចូលរួម ហើយគេមិនទាន់អាចសន្និដ្ឋានបានថា ការជួបនោះនឹងក្លាយបាតុកម្មនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។