នៅថ្ងៃទី៤ ខែមិថុនា ឆ្នាំ២០១៧ គឺជាថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ នៅទូទាំងប្រទេសកម្ពុជា។ ទាំងប្រជាពលរដ្ឋដែលមានសិទ្ធិបោះឆ្នោត ទាំងអ្នកនយោបាយ នាំគ្នាចេញទៅបោះឆ្នោតព្រមៗគ្នា។ ក្រោយបោះឆ្នោតរួច ប្រធានគណបក្សសង្គ្រោះជាតិ លោក កឹម សុខា រំពឹងថា គណបក្សប្រឆាំងនឹងឈ្នះតំណែងជាមេឃុំ-ចៅសង្កាត់ប្រមាណ ៦០% នៃឃុំ-សង្កាត់មានជាង ១.៦៤០ នៅទូទាំងប្រទេស។ ជុំវិញការរំពឹងទុកនេះដែរ ប្រធានគណបក្សប្រជាជនកម្ពុជា លោកនាយករដ្ឋមន្ត្រី ហ៊ុន សែន មិនធ្វើអត្ថាធិប្បាយណាមួយទេ ដោយគ្រាន់តែតបទៅអ្នកសារព័ត៌មានវិញថា តើស្គាល់ពីនីតិវិធីការបោះឆ្នោតឬអត់ បានជាសួរសំណួរក្នុងបន្ទប់បោះឆ្នោតដូច្នេះ?
លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា មិនអត្ថាធិប្បាយណាមួយទាក់ទងនឹងសំណួរថា តើគណបក្សលោក នឹងឈ្នះបានប៉ុន្មានឃុំ-សង្កាត់ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅអាណត្តិទី៤ នេះទេ។ ការថ្លែងដូច្នេះ ធ្វើឡើងបន្ទាប់ពីលោកនាយករដ្ឋមន្ត្រី និងភរិយា អញ្ជើញទៅបោះឆ្នោតនៅសាលាគរុកោសល្យ និងវិក្រឹត្យការ ក្រុងតាខ្មៅ ខេត្តកណ្ដាល៖ «»។
ទោះបីជាយ៉ាងណា អ្នកនាំពាក្យគណបក្សប្រជាជនកម្ពុជា ធ្លាប់ថ្លែងថា នឹងឈ្នះឆ្នោតបានជាមេឃុំ ឬចៅសង្កាត់ មិនខុសពីអាណត្តិមុន។
ចំណែកលោក កឹម សុខា ជាប្រធានគណបក្សសង្គ្រោះជាតិ មានជំនឿថា គណបក្សសង្គ្រោះជាតិ អាចដណ្ដើមបានមេឃុំ ឬចៅសង្កាត់ប្រមាណ ៦០%ភាគរយ ឬប្រមាណជាង ៩៨០ឃុំ-សង្កាត់ក្នុងចំណោម ១.៦៤៦ឃុំ-សង្កាត់ក្នុងប្រទេសកម្ពុជា។ ក្ដីរំពឹងទុកជាមុននេះ ធ្វើឡើបន្ទាប់ពីលោកបោះឆ្នោតរួចនាសាលាបឋមសិក្សាចាក់អង្រែលើ ក្នុងសង្កាត់ចាក់អង្រែលើ នៅព្រឹកថ្ងៃទី៤ ខែមិថុនា៖ «»។
លោកស្រី លឺ ចាន់ណារិទ្ធិ ជាពលរដ្ឋម្នាក់ដែលបានបោះឆ្នោតនៅសាលាបឋមសិក្សាចាក់អង្រែលើ នេះ និយាយថា លោកស្រីបានបោះឆ្នោតគ្រប់អាណត្តិទាំងអស់ មិនថាបោះឆ្នោតជ្រើសក្រុមប្រឹក្សាឃុំ-សង្កាត់ ឬក៏បោះឆ្នោតជ្រើសរើសតំណាងរាស្ត្រនោះទេ។ ស្ត្រីវ័យជាង ៦០ឆ្នាំរូបនេះហ៊ានបើកជំហរបក្សដែលខ្លួនពេញចិត្ត ដើម្បីឲ្យមានការផ្លាស់ប្ដូរមួយល្អប្រសើរសម្រាប់ជីវភាពរស់នៅសព្វថ្ងៃ។ លោកស្រីក៏សម្រេចបោះឆ្នោតឲ្យគណបក្សសង្គ្រោះជាតិ៖ «»។
ខុសប្លែកពីលោកស្រី លឺ ចាន់ណារិទ្ធិ លោក ខាន់ សុធា សុំមិនបង្ហើបឲ្យដឹងទេចំពោះគណបក្សដែលលោកស្រឡាញ់ ប៉ុន្តែយុវជនរូបនេះចង់បានការផ្លាស់ប្ដូរមួយដែលរីកចម្រើនជាងសព្វថ្ងៃ៖ «»។
ទាក់ទងនឹងស្ថានការណ៍នៅក្នុងមណ្ឌលបោះឆ្នោតក្នុងវត្ត និងសាលារៀនចាក់អង្រែលើ នេះ ប្រធានគណៈកម្មការឃុំ-សង្កាត់រៀបចំការបោះឆ្នោតនៅសង្កាត់ចាក់អង្រែលើ ខណ្ឌមានជ័យ លោក អ៊ុង ប៊ុនថន ឲ្យដឹងថា នៅមណ្ឌលបោះឆ្នោត លោកមិនទាន់ឃើញមានភាពមិនប្រក្រតីណាមួយកើតឡើងនោះទេ។ ប្រសិនបើមានភាពមិនប្រក្រតីណាមួយកើតឡើង នោះលោកចាត់វិធានការតាមនីតិវិធីរបស់ គ.ជ.ប៖ «»។
នៅថ្ងៃទី៤ ខែមិថុនា នេះ ការិយាល័យបោះឆ្នោតជាង ២ម៉ឺនកន្លែងនៅទូទាំងប្រទេស បើកទ្វារទទួលអ្នកដែលមានសិទ្ធិបោះឆ្នោត។ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បញ្ចេញទិន្នន័យឲ្យដឹងថា អ្នកដែលបានបោះឆ្នោតមានជាង ៦លាន ៧សែននាក់ (៦.៧៤៣.៣២៩នាក់) ឬស្មើ ៨៥,៧៤% នៃអ្នកមានសិទ្ធិបោះឆ្នោតសរុបជាង ៧លាន ៨សែននាក់ (៧.៨៦៥.០៣៣នាក់)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។