មន្ត្រីគណបក្សសង្គ្រោះជាតិ ខេត្តកំពង់ធំ បញ្ជាក់ថា ការទាត់ចោលពាក្យបណ្ដឹងស្នើសុំរាប់សន្លឹកឆ្នោតនៅឃុំក្លែង ឡើងវិញ គឺជារឿងមិនយល់ពីនីតិវិធីបោះឆ្នោត និងជាសកម្មភាពលម្អៀងផ្នែកនយោបាយ។ ការលើកឡើងនេះ ដោយសារពាក្យបណ្ដឹងចំនួនពីរដែលគណបក្សប្រឆាំងបានប្ដឹងជំទាស់ទៅនឹងលទ្ធផលឆ្នោតនៅឃុំក្លែង ត្រូវបានគណៈកម្មការឃុំ និងគណៈកម្មការខេត្តរៀបចំការបោះឆ្នោត ទាត់ចោល ក្រោមហេតុផលថាគ្មានភាពមិនប្រក្រតីណាដែលត្រូវរាប់សន្លឹកឆ្នោតឡើងវិញទេ។
មន្ត្រីគណបក្សសង្គ្រោះជាតិ នៅខេត្តកំពង់ធំ អះអាងថា មានហេតុផលពីរយ៉ាងដែលជាភាពមិនប្រក្រតីនៃសំឡេងឆ្នោតនៅឃុំក្លែង ស្រុកសណ្ដាន់។ ទីមួយ សំឡេងឆ្នោតបណ្ដោះអាសន្នដែលគណបក្សប្រជាជនកម្ពុជា ឈ្នះលើគណបក្សប្រឆាំង គឺមានតែមួយសំឡេងប៉ុណ្ណោះ។ មួយវិញទៀត មន្ត្រីសង្កេតការណ៍របស់គណបក្សសង្គ្រោះជាតិ បញ្ជាក់ថា នៅការិយាល័យ០៦៦៦ គឺសន្លឹកឆ្នោតដែលប្រធានការិយាល័យរៀបចំការបោះឆ្នោតចាត់ទុកថាមិនបានការជិត ២០សំឡេងនោះ គឺបោះឆ្នោតឲ្យគណបក្សសង្គ្រោះជាតិ ដោយមានគំនូសនៅក្នុងប្រអប់ត្រឹមត្រូវទៀតផង។
ប្រធានប្រតិបត្តិគណបក្សសង្គ្រោះជាតិ ខេត្តកំពង់ធំ លោក ស៊ុន ចន្ធី មានជំនឿ ១០០ភាគរយថា ប្រសិនបើមានករណីរាប់សន្លឹកឆ្នោតឡើងវិញនៅឃុំក្លែង គណបក្សប្រឆាំងនឹងឈ្នះដឹកនាំឃុំតែម្តង។ លោកបន្តថា ខាងលោកបានដាក់ពាក្យប្ដឹងគណៈកម្មការឃុំរៀបចំការបោះឆ្នោត និងគណៈកម្មការខេត្តរៀបចំការបោះឆ្នោត ដើម្បីជំទាស់នឹងលទ្ធផលនេះ ហើយស្នើឲ្យពិនិត្យសន្លឹកឆ្នោតឡើងវិញ ពិសេសនៅការិយាល័យ០៦៦៦៖ « គឺជាការឆ្លុះបញ្ចាំងមួយថាគណៈកម្មការរៀបចំការបោះឆ្នោតខេត្ត ប្រព្រឹត្តផ្ទុយអំពីច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំ - សង្កាត់។ ទីពីរ អាចបង្ហាញជំហរថាគណៈកម្មការខេត្តរៀបចំការបោះឆ្នោត មានភាពលម្អៀង។ លម្អៀងទាំងផ្លូវច្បាប់ និងលម្អៀងទាំងគណបក្សនយោបាយ »។
លទ្ធផលបោះឆ្នោតបណ្ដោះអាសន្ននៅឃុំក្លែង ស្រុកសណ្ដាន់ បង្ហាញថា គណបក្សសង្គ្រោះជាតិ ឈ្នះបានចំនួន ៨៣១សំឡេង ហើយគណបក្សប្រជាជនកម្ពុជា ឈ្នះបានចំនួន ៨៣២សំឡេង ពោលគឺគណបក្សកាន់អំណាចឈ្នះលើគណបក្សប្រឆាំងតែមួយសំឡេងប៉ុណ្ណោះ។
ទាក់ទងបញ្ហានេះ ប្រធានលេខាធិការដ្ឋានគណៈកម្មការរៀបចំការបោះឆ្នោតខេត្តកំពង់ធំ លោក ប្រែង សាវុធ មានប្រសាសន៍នៅថ្ងៃទី១០ មិថុនា ថា ខាងមន្ត្រីរបស់លោកបានបំពេញការងារល្អប្រសើរ ដោយឈរនៅលើគោលការណ៍ច្បាប់ ហើយមិនបានបំពេញការងារដោយភាពលម្អៀងនយោបាយនោះឡើយ។ លោកថា មន្ត្រីគណបក្សប្រឆាំងទៅវិញទេមិនយល់ពីនីតិវិធីបោះឆ្នោតច្បាស់លាស់ ទើបគណៈកម្មការឃុំ និងខេត្តរៀបចំការបោះឆ្នោត ទាត់ចោលពាក្យបណ្ដឹងរបស់ពួកគេ៖ « នីតិវិធីដោះស្រាយពាក្យបណ្ដឹងរបស់ស៊ិច ក្តី របស់ប៉ិច ក្តី គឺគាត់មិនយល់ច្បាស់អំពីបញ្ហាហ្នឹងទេ ហើយការនិយាយចេះតែនិយាយអ៊ីចឹងបាន ប៉ុន្តែការនិយាយចំពោះមុខច្បាប់ ក៏ដូចជាបទបញ្ជា ឬនីតិវិធី ប្រហែលជាគាត់មានកម្រិតទេ »។
កាលពីថ្ងៃទី៥ មិថុនា ប្រធានគណបក្សប្រជាជនកម្ពុជា ខេត្តកំពង់ធំ និងជាអភិបាលខេត្តកំពង់ធំ ផង លោក សុខ លូ បានចេញលិខិតមួយស្ដីពីលទ្ធផលឆ្នោតបណ្ដោះអាសន្ន ដោយបញ្ជាក់ថា ក្នុងចំណោមឃុំ-សង្កាត់ចំនួន៨១ គឺគណបក្សខ្លួនឈ្នះដឹកនាំឃុំ-សង្កាត់ចំនួន៤១ ហើយបក្សប្រឆាំងឈ្នះចំនួន ៤០ឃុំ-សង្កាត់។
ដ្បិតតែលទ្ធផលបណ្ដោះអាសន្ននេះបង្ហាញថា គណបក្សកាន់អំណាចឈ្នះឃុំចំនួនមួយក៏ដោយ ប៉ុន្តែសំឡេងឃុំគាំទ្រគណបក្សប្រជាជនកម្ពុជា និងចំនួនអាសនៈមន្ត្រីសមាជិកក្រុមប្រឹក្សាឃុំ-សង្កាត់ គឺចាញ់គណបក្សសង្គ្រោះជាតិ។
លោក ស៊ុន ចន្ធី យល់ថា របាយការណ៍របស់អាជ្ញាធរខេត្តកំពង់ធំ បែបនេះជាមូលហេតុជំរុញឲ្យគណៈកម្មការឃុំ និងខេត្តរៀបចំការបោះឆ្នោត បដិសេធបណ្ដឹងជំទាស់លទ្ធផលឆ្នោតបណ្ដោះអាសន្ន និងការស្នើឲ្យរាប់សន្លឹកឆ្នោតឡើងវិញនៅឃុំក្លែង ពីសំណាក់មន្ត្រីគណបក្សប្រឆាំង ដោយខ្លាចខុសលិខិតដែលប្រធានគណបក្សកាន់អំណាចបញ្ជាក់រួចទៅហើយ។
កាលពីពេលថ្មីៗនេះ មន្ត្រីគណបក្សសង្គ្រោះជាតិ ខេត្តបាត់ដំបង បានស្នើឲ្យគណៈកម្មការរៀបចំការបោះឆ្នោតខេត្ត ពិនិត្យឡើងវិញចំពោះភាពមិនប្រក្រតីនៅឃុំបឹងប្រាំ ដែលបណ្ដាលឲ្យគណបក្សប្រឆាំងចាញ់ ប៉ុន្តែក្រោយពេលពិនិត្យ និងរាប់សន្លឹកឆ្នោតនៅឃុំនេះឡើងវិញ លទ្ធផលគឺគណបក្សសង្គ្រោះជាតិ ឈ្នះវិញ ហើយមន្ត្រីសង្គមស៊ីវិលខេត្តនេះរិះគន់ថា មន្ត្រីរៀបចំការបោះឆ្នោតនៅឃុំបឹងប្រាំ ថាមានចេតនាបន្លំសន្លឹកឆ្នោតតែម្តង។
ទោះជាយ៉ាងណាក៏ដោយ លោក ស៊ុន ចន្ធី ថាក្រុមការងារទីស្នាក់ការកណ្ដាលគណបក្សសង្គ្រោះជាតិ កំពុងរៀបចំពាក្យបណ្ដឹងបញ្ជូនទៅគណៈកម្មាធិការជាតិរៀបចំការបោះឆ្នោតបន្តទៀត ហើយលោករំពឹងថា គ.ជ.ប នឹងផ្តល់យុត្តិធម៌ដល់គណបក្សសង្គ្រោះជាតិ និងប្រជាពលរដ្ឋម្ចាស់ឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។