"អង្គទូត​មួយ​ចំនួន​ព្រួយ​បារម្ភ​ចំពោះ​ស្ថានការណ៍​នយោបាយ​នៅ​កម្ពុជា"

0:00 / 0:00

មេដឹកនាំ​​គណបក្ស​ប្រឆាំង​អះអាង​ថា បណ្ដា​អង្គទូត​មួយ​ចំនួន​ដែល​មាន​ការិយាល័យ​នៅ​ទីក្រុង​បាងកក ប្រទេស​ថៃ កំពុង​តែ​បារម្ភ​ពី​ស្ថានការណ៍​នយោបាយ​នៅ​កម្ពុជា ដែល​មាន​ការ​ប្រែប្រួល​ក្នុង​រយៈពេល​ប៉ុន្មាន​ខែ​ចុង​ក្រោយ​នេះ។ ប៉ុន្តែ​មន្ត្រី​នាំ​ពាក្យ​គណបក្ស​កាន់​អំណាច​យល់​ឃើញ​ថា បរិយាកាស​នយោបាយ​នៅ​ពេល​នេះ គឺ​ពុំ​មាន​អ្វី​ដែល​ត្រូវ​ព្រួយ​បារម្ភ​ទេ។

បណ្ដា​ស្ថានទូត​មួយ​ចំនួន​អះអាង​ថា នឹង​បន្ត​ឃ្លាំមើល និង​តាមដាន​ដោយ​យក​ចិត្ត​ដាក់​បន្ត​ទៀត​ចំពោះ​ការវិវត្តន៍​នយោបាយ​នៅ​កម្ពុជា ដ៏​គួរ​ឲ្យ​ព្រួយបារម្ភ​នេះ។

ការ​អះអាង​ដូច​នេះ​របស់​លោក កឹម សុខា ប្រធាន​គណបក្ស​សង្គ្រោះ​ជាតិ ក្រោយ​ពេល​បាន​ជួប​នឹង​មន្ត្រី​អង្គទូត​ប្រមាណ ១០​ស្ថាប័ន កាល​ពី​ថ្ងៃ​ទី​១ ខែ​កញ្ញា នៅ​ទីក្រុង​បាងកក ប្រទេស​ថៃ។ ប្រមុខ​ដឹកនាំ​បក្ស​ប្រឆាំង​រូប​នេះ បាន​សរសេរ​នៅ​លើ​បណ្ដាញ​សង្គម​ហ្វេសប៊ុក (Facebook) របស់​ខ្លួន​ថា តំណាង​អង្គទូត​ចំនួន ១០​ប្រទេស ដែល​មាន​ការិយាល័យ​នៅ​ទីក្រុង​បាងកក បង្ហាញ​កង្វល់​ចំពោះ​ទិដ្ឋភាព​នយោបាយ​នៅ​កម្ពុជា។ លើស​ពី​នេះ​ទៀត ពួក​គេ​សន្យា​ថា នឹង​បន្ត​ឃ្លាំមើល​ដោយ​យក​ចិត្ត​ទុក​ដាក់​បំផុត​ចំពោះ​បញ្ហា​នេះ។ ​ការ​បង្កើត​ឲ្យ​មាន​​ច្បាប់ និង​ដាក់​ការ​គាបសង្កត់​មក​លើ​បក្ស​ប្រឆាំង មន្ត្រី​អង្គទូត​ទាំង​នេះ​ចាត់​ទុក​ថា គឺ​ជា​ស្ថានការណ៍​នយោបាយ​ដែល​មាន​ការ​ប្រែប្រួល​ដ៏​តានតឹង​ក្នុង​ដំណាក់​កាល​ចុង​ក្រោយ​នេះ​របស់​កម្ពុជា។

បើ​ទោះ​ជា​បែប​ណា បញ្ហា​នេះ​មិន​ត្រូវ​បាន​មន្ត្រី​នាំ​ពាក្យ​គណបក្ស​ប្រជាជន​កម្ពុជា យល់​ឃើញ​ថា ជា​សញ្ញា​គ្រោះថ្នាក់​ចំពោះ​ស្ថានការណ៍​នយោបាយ​នៅ​កម្ពុជា ទេ។ លោក សុខ ឥសាន បន្ត​ថា ប្រជាពលរដ្ឋ​អាច​នៅ​ប្រកប​ការងារ​ជា​ធម្មតា ហើយ​អង្គការ-​សមាគម និង​បណ្ដាញ​សារព័ត៌មាន​នៅ​កម្ពុជា ដែល​កំពុង​រីក​ដូច​ផ្សិត កំពុង​ដំណើរការ​អាជីវកម្ម​របស់​ពួក​គេ​នៅ​ឡើយ។ ក្រៅ​ពី​នេះ នៅ​មាន​គណបក្ស​នយោបាយ និង​ដំណើរ​ការ​ចុះ​ឈ្មោះ​បោះឆ្នោត ក៏​នឹង​បើក​ផ្លូវ​ឲ្យ​មាន​ការ​ប្រកួត​ប្រជែង​តាម​បែប​ប្រជាធិបតេយ្យ​​ដ៏​ឆាប់​នេះ​ថែម​ទៀត​ផង៖ «ខ្ញុំ​យល់​ថា សភាពការណ៍​នៅ​កម្ពុជា បច្ចុប្បន្ន​មិន​មាន​អ្វី​ដែល​ធ្វើ​ឲ្យ​មាន​លក្ខណៈ​​ល្អក់កករ​ខ្លាំង ហើយ​នាំ​ឲ្យ​រំខាន​ដល់​សភាពការណ៍​នយោបាយ​ឆ្ពោះ​ទៅ​រក​ការ​បោះឆ្នោត​ខាង​មុខ​ទេ»

ការ​បក​ស្រាយ​ខុស​គ្នា​រវាង​របស់​អ្នក​នយោបាយ​នៅ​កម្ពុជា​នេះ ត្រូវ​បាន​អ្នក​ជំនាញ​ផ្នែក​វិទ្យាសាស្ត្រ​នយោបាយ​យល់​ឃើញ​ថា នេះ​ហើយ​ជា​បញ្ហា​ដែល​នាំ​ឲ្យ​អ្នក​នយោបាយ​នៅ​តែ​បន្ត​ឈ្លោះ​គ្នា​មិន​ចេះ​ចប់ ​ហើយ​បញ្ហា​នេះ​អាច​នឹង​បង្កើត​ទៅ​ជា​ហិង្សា​ផ្នែក​នយោបាយ​នៅ​ថ្នាក់​ក្រោម​ជាតិ​ថែម​ទៀត។

លោក សូ ចន្ថា អ្នក​ជំនាញ​ផ្នែក​វិទ្យាសាស្ត្រ​នយោបាយ ឲ្យ​ដឹង​ថា ថ្វី​បើ​នៅ​ពេល​នេះ​រដ្ឋាភិបាល​ព្យាយាម​បង្ហាញ​ពី​លំនឹង​នយោបាយ​ថា ពុំ​មាន​ការ​ប្រែប្រួល និង​កំពុង​ដំណើរ​ការ​ជា​ប្រក្រតី​ក្ដី ប៉ុន្តែ​​ការ​គាប​សង្កត់​ដោយ​ប្រយោល​តាម​រយៈ​យន្តការ​ច្បាប់ គឺ​ជា​សញ្ញា​នៃ​ការ​គំរាមកំហែង​ដ៏​គួរ​ឲ្យ​ព្រួយ​បារម្ភ៖ «កាលៈទេសៈ​នៅ​កម្ពុជា បច្ចុប្បន្ន​យើង​ឃើញ​ថា វា​ហាក់​ដូច​ជា​មិន​មែន​ជា​ការ​ប្រកួតប្រជែង​នោះ​ទេ តែ​វា​ជា​ការ​ស្វែង​រក​នៅ​កំហុស ឬ​ជា​ការ​ចោទ​ប្រកាន់​នានា ដើម្បី​ទប់ស្កាត់​សំឡេង​ជំទាស់​ជាមួយ​រដ្ឋាភិបាល មិន​អាច​ធ្វើ​ការងារ​បាន​ដោយ​សេរី»

អ្នក​វិភាគ​នយោបាយ​បង្ហាញ​ថា តាម​រយៈ​ទឡ្ហីករណ៍​មួយ​ចំនួន​ដែល​រដ្ឋាភិបាល​កំពុង​តែ​បើក​យុទ្ធនាការ ដូច​ជា​បិទទ្វារ​ការិយាល័យ​វិទ្យាស្ថាន​ជាតិ​ដើម្បី​ប្រជាធិបតេយ្យ (NDI) ដោយ​បង្ខំ ព្រមទាំង​បណ្ដេញ​បុគ្គលិក​បរទេស​នៃ​អង្គការ​នេះ​ចេញ​ពី​ប្រទេស​កម្ពុជា វិទ្យុ​ក្នុង​ស្រុក​មួយ​ចំនួន​ផ្សេង​ទៀត ត្រូវ​ក្រសួង​ព័ត៌មាន​បញ្ឈប់​មិន​ឲ្យ​ផ្សាយ គណបក្ស​ប្រឆាំង​ក៏​ត្រូវ​រង​ការ​គំរាមកំហែង និង​ការ​ចោទ​ប្រកាន់​ថា មាន​ចេតនា​ចង់​ផ្ដួល​រំលំ​រដ្ឋាភិបាល តាម​រយៈ​បដិវត្តន៍​ពណ៌​ដែល​រៀន​រូបមន្ត​នៅ​តៃវ៉ាន់ ជាដើម ដែល​បញ្ហា​ទាំង​នេះ​គឺ​ជា​សញ្ញា​ដ៏​គ្រោះថ្នាក់​សម្រាប់​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។