ប្រធានគណបក្សកាន់អំណាចប្រកាសថា គណបក្សលោកនឹងលើកកម្ពស់វប្បធម៌សន្ទនាជាមួយគណបក្សទាំងអស់ ក្នុងគោលបំណងស្មារតីសាមគ្គីជាតិទាំងមូល។ ទាក់ទងការលើកឡើងនេះ គណបក្សនយោបាយមួយចំនួនទ្រាំទ្រវប្បធម៌នេះ ប៉ុន្តែអ្នកវិភាគនយោបាយថា នេះគ្រាន់តែជាឆាកល្ខោននយោបាយប៉ុណ្ណោះ។
ថ្លែងក្នុងខួបលើកទី៦៤ នៃការបង្កើតគណបក្សប្រជាជនកម្ពុជា ប្រធានថ្មីនៃគណបក្សប្រជាជន លោកនាយករដ្ឋមន្ត្រី ហ៊ុន សែន និយាយនៅមុខសមាជិកសមាជិកាជាង ១ម៉ឺននាក់របស់ខ្លួននៅថ្ងៃទី២៨ មិថុនា ថា គោលនយោបាយរបស់គណបក្សប្រជាជនកម្ពុជា គឺឈរលើស្មារតីសាមគ្គីជាតិ ដោយប្រើវប្បធម៌សន្ទនាជាមួយគ្រប់គណបក្សនយោបាយ មិនប្រឈមមុខដាក់គ្នាគ្រប់ស្ថានការណ៍នោះទេ។
លោកមានជំនឿថា វប្បធម៌នេះធានាបាននូវបរិយាកាសនយោបាយល្អ ដែលផ្តល់ការជឿទុកចិត្តដល់ពលរដ្ឋ និងអ្នកវិនិយោគក្នុង និងក្រៅប្រទេស៖ «យើងនឹងបន្តលើកកម្ពស់វប្បធម៌សន្ទនាទៅគ្រប់គណបក្សនយោបាយទាំងអស់ ដោយបញ្ចប់ការប្រឈមមុខក្នុងគោលបំណងធានាឲ្យស្មារតីសាមគ្គីជាតិ»។
វប្បធម៌សន្ទនាត្រូវបាន លោក ហ៊ុន សែន និងលោក សម រង្ស៊ី អះអាងថា ខ្លួនជាស្ថាបនិកបង្កើតវប្បធម៌នេះកាលពីឆ្នាំ២០១៤ ក្រោយពីគណបក្សសង្គ្រោះជាតិ យល់ព្រមចូលសភា។ អ្នកវិភាគមួយចំនួនទស្សន៍ទាយថា វប្បធម៌សន្ទនានឹងបែកបាក់នៅពេលបោះឆ្នោតឃុំសង្កាត់ឆ្នាំ២០១៧ ឬការបោះឆ្នោតតំណាងរាស្ត្រឆ្នាំ២០១៨ ខាងមុខ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ស្វាគមន៍ចំពោះគ្រប់គណបក្សនយោបាយប្រើប្រាស់វប្បធម៌សន្ទនា ដើម្បីដោះស្រាយបញ្ហាប្រទេសជាតិ ប៉ុន្តែមិនមែនប្រើវប្បធម៌ដើម្បីដណ្ដើមអំណាចគ្នានោះទេ។ អ្នកនាំពាក្យបក្សប្រឆាំងរូបនេះអះអាងថា គណបក្សលោកក៏បានប្រើវប្បធម៌សន្ទនាជាមួយគណបក្សផ្សេងក្រៅពីគណបក្សប្រជាជនកម្ពុជា ដែរ៖ «មានតែផ្លូវសន្ទនាហ្នឹងហើយជាការល្អ ដូច្នេះបើអ្នកនយោបាយជ្រើសរើសវប្បធម៌នេះដើម្បីជជែកដោះស្រាយបញ្ហាជាតិ ជាការត្រឹមត្រូវ»។
កន្លងមកគណបក្សហ៊្វុនស៊ិនប៉ិច ក៏ធ្លាប់ប្រើវប្បធម៌សន្ទនាជាមួយគណបក្សប្រជាជនកម្ពុជា ដែរ ប៉ុន្តែដែលកាលពីមុនគេប្រើពាក្យបង្រួបបង្រួមជាតិ ដែលជាការសម្របសម្រួលផ្នែកនយោបាយ ហើយគណបក្សនេះបង្កើតរដ្ឋាភិបាលចម្រុះជាមួយគ្នាតាំងពីអាណត្តិទី១ រហូតមកដល់អាណត្តិទី៥ គណបក្សហ៊្វុនស៊ិនប៉ិច បាត់អាសនៈរដ្ឋសភា។
សម្ព័ន្ធមិត្តចាក់ទឹកមិនលិចរបស់គណបក្សប្រជាជនកម្ពុជា ដែលតែងតែជូនបាច់ផ្ការាល់មានកម្មវិធីបក្សធំៗរបស់គណបក្សប្រជាជនកម្ពុជា គឺគណបក្សហ៊្វុនស៊ិនប៉ិច យល់ថា មានតែការសន្ទនាគ្នាទេ ទើបមានការជជែកពិភាក្សា។ អនុប្រធានទី២ នៃគណបក្សហ៊្វុនស៊ិនប៉ិច លោក ញឹក ប៊ុនឆៃ មានប្រសាសន៍ថា នៅពេលមានបញ្ហាអ្វីកើតឡើង មានតែការសន្ទនាទេអាចដោះស្រាយមានប្រសិទ្ធភាពជាងយន្តការផ្សេងៗ ឬការប្រឈមមុខដាក់គ្នា៖ «យើងនិយាយគ្នា ជជែកគ្នា ទទួលបានផលប្រយោជន៍ជាងយើងធ្វើអ្វីផ្សេងៗ»។
ថ្លែងក្នុងពិធីអបអរសាទរខួបលើកទី៦៤ នៃការបង្កើតគណបក្សប្រជាជនកម្ពុជា នៅថ្ងៃទី២៨ ខែមិថុនា លោក ហ៊ុន សែន រំពឹងថា វប្បធម៌សន្ទនាបញ្ចប់ការប្រឈមមុខដាក់គ្នារវាងគណបក្សនយោបាយទាំងអស់។
យ៉ាងណាក៏ដោយចុះ អ្នកសិក្សាស្រាវជ្រាវផ្នែកអភិវឌ្ឍន៍សង្គម លោកបណ្ឌិត កែម ឡី សង្កេតឃើញថា វប្បធម៌សន្ទនារវាងគណបក្សកាន់អំណាច និងគណបក្សប្រឆាំងដែលកំពុងអនុវត្តសព្វថ្ងៃនេះ គ្រាន់តែជាការបិទមាត់បក្សប្រឆាំងមិនឲ្យរិះគន់ប៉ុណ្ណោះ។ លោក កែម ឡី ទាមទារឲ្យមានការបង្កើតយន្តការមួយ ដែលអ្នកចូលរួមគ្រប់ភាគី ដៃគូអភិវឌ្ឍន៍ រួមទាំងសង្គមស៊ីវិល ទើបវប្បធម៌នេះទទួលបានជោគជ័យ៖ «វាគ្រាន់តែល្អមើល គ្រាន់តែជាឆាកល្ខោន គ្រាន់តែជាវប្បធម៌មួយដើម្បីបំបិទមាត់សង្គមស៊ីវិល និងបក្សប្រឆាំង»។
បន្ថែមពីនេះ លោក កែម ឡី លើកជាឧទាហរណ៍ថា ប្រសិនបើគណបក្សប្រជាជនកម្ពុជា ចេះប្រើវប្បធម៌សន្ទនាមែននោះ មិនមែនធ្វើច្បាប់គ្រប់គ្រងអង្គការ សមាគម និងសហជីព មិនហៅគណបក្សប្រឆាំង ឬសង្គមស៊ីវិលមកជជែកពិភាក្សានោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។