ចៅក្រមស៊ើបសួរសាលាដំបូងរាជធានីភ្នំពេញ បានបន្តការសាកសួរមន្ត្រីគណបក្សសង្គ្រោះជាតិ ដែលកំពុងជាប់ឃុំទាំង ៦រូបបន្តទៀត នៅថ្ងៃទី១៧ កក្កដា នេះ។
នៅថ្ងៃទី១៧ កក្កដា នេះ ការសាកសួរមន្ត្រីគណបក្សសង្គ្រោះជាតិ ដែលកំពុងជាប់ឃុំទាំង ៦រូបនោះ ត្រូវបានធ្វើឡើងពេញមួយថ្ងៃនៅពន្ធនាគារព្រៃស ក្នុងសង្កាត់ព្រៃស ខណ្ឌដង្កោ រាជធានីភ្នំពេញ។
ប្រភពព័ត៌មានពីមេធាវីសុំមិនបញ្ចេញឈ្មោះមួយរូប ដែលការពារក្ដីឱ្យមន្ត្រីគណបក្សសង្គ្រោះជាតិ កំពុងជាប់ឃុំទាំង ៦រូបនោះ មានប្រសាសន៍ថា ចៅក្រមបានសាកសួរមន្ត្រីបក្សសង្គ្រោះជាតិ ទាំង ៦រូបនោះឡើងវិញ ដោយសារតែកាលពីម្សិលមិញ មន្ត្រីទាំងនោះមិនបានឆ្លើយអ្វីពេញលេញទេនៅឯសាលាដំបូងរាជធានីភ្នំពេញនោះ។ មេធាវីដដែលបញ្ជាក់ថា នៅថ្ងៃទី១៧ កក្កដា នេះ មន្ត្រីទាំងនោះក៏នៅរក្សាជំហរមិនឆ្លើយអ្វីច្រើនដែរ។ លោកបញ្ជាក់ថា ជំហរបែបនេះ គឺជាសិទ្ធិរបស់ពួកគាត់។
ស្ថានភាពនៅឯខាងក្រៅពន្ធនាគារ ដូចគ្នាពេលនៅសាលាដំបូងរាជធានីភ្នំពេញ កាលពីថ្ងៃទី១៦ កក្កដា ដែរ គឺគ្រប់ច្រកចូលទៅពន្ធនាគារ ត្រូវបានការពារយ៉ាងតឹងតែងដោយកម្លាំងនគរបាលចម្រុះប្រមាណ ២០០នាក់ ដែលមកពីមូលដ្ឋាននោះ និងកម្លាំងអន្តរាគមន៍ប្រឆាំងបាតុកម្មពីខាងក្រៅ។
ក្រៅពីនេះ ក៏មានកម្លាំងសន្តិសុខខណ្ឌដង្កោ រាប់សិបនាក់ទៀត ត្រូវដាក់បន្ថែម ដែលមួយក្រុមស្លៀកពាក់ខៀវក្រមៅ និងមួយក្រុមទៀត ស្លៀកពាក់ពណ៌កាគីខ្ចី ពាក់មួយសុវត្ថិភាពពណ៌ស។ នៅឯចិញ្ចើមថ្នល់ម្ខាងទៀត មានអ្នកគាំទ្រគណបក្សសង្គ្រោះជាតិ ប្រមាណ ២០នាក់ នាំគ្នាប្រមូលផ្ដុំគ្នានៅទល់មុខកម្លាំងសន្តិសុខនៅច្រកចូលខាងត្បូង ដែលចូលទៅមណ្ឌលអប់រំកែប្រែទី១។ ក៏ប៉ុន្តែ អ្នកគាំទ្រទាំងនោះ មិនបានធ្វើសកម្មភាពលើកបដាតវ៉ាស្រែកទាមទារអ្វីទេ គឺគ្រាន់តែនាំគ្នាសម្លឹងទៅនគរបាលដែលឈរយាមនៅច្រកចូលនោះ។
ក្រុមអ្នកគាំទ្រគណបក្សសង្គ្រោះជាតិ ទាំងនោះបានសម្រេចរំសាយគ្នាវិញនៅវេលាម៉ោងជិត ៤រសៀល ហើយងាកទៅពិចារណាថា នឹងត្រូវធ្វើអ្វីទៀតនៅថ្ងៃស្អែក និងថ្ងៃបន្តបន្ទាប់ទៀត។ ទោះជាយ៉ាងនេះក្ដី ការប្រមូលផ្ដុំគ្នានោះ មិនមានការប៉ទង្គិចគ្នាទេ ទាំងពាក្យសម្ដី និងអំពើហិង្សា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។