អ្នក​ចូលរួម​ឃោសនា​បក្ស​ប្រជាជន​នៅ​ខេត្ត​ស្ទឹងត្រែង​ភាគច្រើន​ជា​មន្ត្រី​រាជការ

0:00 / 0:00

គណបក្ស​ប្រជាជន​កម្ពុជា ខែត្រ​ស្ទឹងត្រែង ដង្ហែ​ក្បួន​ឃោសនា​បោះឆ្នោត​នៅ​ព្រឹក​ថ្ងៃ​ទី​១ មិថុនា ដោយ​មាន​អ្នក​ចូលរួម​រាប់​ពាន់​នាក់។ អ្នក​ចូលរួម​ភាគច្រើន​ជា​មន្ត្រី​រាជការ អ្នក​ជំនួញ និង​អ្នក​មាន​ឥទ្ធិពល​ក្នុង​ខែត្រ​ស្ទឹងត្រែង។ គណបក្ស​ប្រជាជន​កម្ពុជា ខែត្រ​ស្ទឹងត្រែង បាន​ហែ​ក្បួន​ទ្រង់ទ្រាយ​ធំ​លើក​ចុង​ក្រោយ​មាន​វត្តមាន​អភិបាល​ខែត្រ​ស្ទឹងត្រែង និង​តំណាងរាស្ត្រ​មណ្ឌល​ខែត្រ​ស្ទឹងត្រែង រួម​ទាំង​អ្នក​គាំទ្រ​រាប់​ពាន់​នាក់។

មន្ត្រី​ជាន់​ខ្ពស់​គណបក្ស​ប្រជាជន​កម្ពុជា លោក ឡូយ សុផាត បាន​ថ្លែង​ក្នុង​ពិធី​នោះ​ផ្ដោត​សំខាន់​លើ​ការ​អភិវឌ្ឍ​ហេដ្ឋារចនាសម្ព័ន្ធ ដូចជា​សាលារៀន ផ្លូវ​ថ្នល់ វត្ត​អារាម និង​ការ​ស្វែងរក​សុខ​សន្តិភាព​ជូន​ពលរដ្ឋ។ លោក​បញ្ជាក់​ថា គណបក្ស​ប្រជាជន​កម្ពុជា មាន​គោល​នយោបាយ​ឯកភាព​ជាតិ ស្ថិរភាព​សង្គម ហើយ​ប្រជាជន​គ្រប់​រូប​មាន​សិទ្ធិ​ពេញលេញ​បំពេញ​ការងារ​របស់​ខ្លួន​តាម​គ្រប់​ស្ថាប័ន​រដ្ឋ និង​ឯកជន​នៅ​គ្រប់​មូលដ្ឋាន៖ « បាន​ធ្វើ​ការ​អភិវឌ្ឍ​សេដ្ឋកិច្ច​សង្គម​ឲ្យ​មាន​ការ​រីក​ចម្រើន​លើ​គ្រប់​វិស័យ ហេដ្ឋារចនាសម្ព័ន្ធ ផ្លូវ ស្ពាន សាលារៀន »

យ៉ាង​ណា មន្ត្រី​រាជការ​មួយ​ចំនួន​បាន​បង្ហើប​ថា ពួក​គេ​ត្រូវ​ថ្នាក់​ដឹកនាំ​អង្គភាព​បង្គាប់​ឲ្យ​ហែ​ក្បួន​ឃោសនា​បោះឆ្នោត​ឲ្យ​គណបក្ស​ប្រជាជន​កម្ពុជា បើ​ពុំ​ដូច្នេះ​ទេ គេ​នឹង​កត់​ចំណាំ និង​ធ្វើ​ទុក្ខបុកម្នេញ​ផ្នែក​ការងារ។

មន្ត្រី​រាជការ​ម្នាក់​ថ្លែង​សុំ​មិន​បញ្ចេញ​ឈ្មោះ និង​សំឡេង ឲ្យ​ដឹង​នៅ​ថ្ងៃ​ទី​១ ឧសភា ថា មន្ត្រី​រាជការ​តាម​អង្គភាព​នានា​ជុំវិញ​ខែត្រ ដូចជា​មន្ទីរ​នានា ត្រូវ​បាន​ប្រធាន​អង្គភាព​តម្រូវ​ឲ្យ​ចូលរួម​ដង្ហែ​ក្បួន​ឲ្យ​គណបក្ស​ប្រជាជន​កម្ពុជា។ បើ​មន្ត្រី​រាជការ​ណា​ជំទាស់ នឹង​ប្រឈម​បញ្ហា​ផ្នែក​ការងារ។ លោក​ថា បើ​ពួក​គេ​មាន​និន្នាការ​គាំទ្រ​ការ​ដឹកនាំ​របស់​គណបក្ស​នយោបាយ​ផ្សេង​ក្រៅ​ពី​បក្ស​កាន់​អំណាច បាន​ត្រឹម​ទុក​ក្នុង​ចិត្ត និង​ត្រូវ​បង្ខំ​ចិត្ត​ចូលរួម​ឃោសនា​បោះឆ្នោត​ឲ្យ​គណបក្ស​កាន់​អំណាច ព្រោះ​ពុំ​មាន​ជម្រើស។ លោក​បន្ថែម​ថា កន្លង​ទៅ មាន​មន្ត្រី​រាជការ​មួយ​ចំនួន​គាំទ្រ​គណបក្ស​សង្គ្រោះ​ជាតិ ដោយ​ចំហ ត្រូវ​គេ​ដក​មុខ​តំណែង និង​ត្រូវ​ផ្ទេរ​ការងារ​ទៅ​ខែត្រ​ផ្សេង ជាដើម។ លោក​ចាត់​ទុក​បញ្ហា​នេះ​ថា​ជា​ការ​រើសអើង និង​ប្រកាន់​និន្នាការ​បក្ស​នយោបាយ​ផ្ទុយ​ពី​ក្របខ័ណ្ឌ​ច្បាប់។

អាស៊ីសេរី មិន​អាច​ទាក់ទង​អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន ដើម្បី​សុំ​ការ​បំភ្លឺ​ជុំវិញ​បញ្ហា​នេះ​បាន​ទេ​នៅ​ថ្ងៃ​ទី​១ មិថុនា ព្រោះ​ទូរស័ព្ទ​ហៅ​ចូល​ពុំ​មាន​អ្នក​ទទួល។

ប្រធាន​គណបក្ស​សង្គ្រោះ​ជាតិ ខែត្រ​ស្ទឹងត្រែង លោក ពុយ ចាន់ថាឡា ទទួល​ស្គាល់​ថា មន្ត្រី​រាជការ​ធ្វើ​ការ​ក្នុង​ស្ថាប័ន​រដ្ឋ​នានា កំពុង​ប្រឈម​ការ​គាប​សង្កត់​ផ្នែក​នយោបាយ​ពី​ប្រធាន​អង្គភាព​របស់​ខ្លួន។ លោក​ថា បើ​មន្ត្រី​រាជការ​ណា​មួយ​ប្រកាន់​ជំហរ​គាំទ្រ​គណបក្ស​នយោបាយ​ផ្សេង​ក្រៅ​ពី​គណបក្ស​កាន់​អំណាច​ដោយ​បើក​ចំហ នឹង​ប្រឈម​បញ្ឈប់​ពី​តំណែង។ ជាក់ស្តែង​កាល​ពី​ឆ្នាំ​២០១៦ ប្រធាន​ការិយាល័យ​មន្ទីរ​អភិវឌ្ឍន៍​ជនបទ ម្នាក់ ត្រូវ​បាន​គេ​បញ្ឈប់​ពី​តំណែង ព្រោះ​តែ​គាំទ្រ​គណបក្ស​សង្គ្រោះ​ជាតិ។ លោក​ចាត់​ទុក​បញ្ហា​នេះ​ផ្ទុយ​ពី​គោលការណ៍​លទ្ធិប្រជាធិបតេយ្យ និង​ផ្ទុយ​ពី​ក្របខ័ណ្ឌ​ច្បាប់។ លោក​បញ្ជាក់​ថា បើ​គណបក្ស​សង្គ្រោះ​ជាតិ ឈ្នះ​ឆ្នោត​ដឹកនាំ​រដ្ឋាភិបាល នឹង​បើក​ទូលាយ​ឲ្យ​មន្ត្រី​រាជការ​ទាំងអស់​មាន​សិទ្ធិ​ពេញលេញ​គាំទ្រ​គណបក្ស​នយោបាយ​ដែល​ពួក​គេ​ពេញ​ចិត្ត៖ « ជា​ការ​ពិត​ណាស់ បើ​មន្ត្រី​រាជការ​ណា​ដែល​ហ៊ាន​គាំទ្រ​គណបក្ស​ណា​ជា​ចំហ គាត់​នឹង​ប្រឈម​មុខ​បញ្ឈប់​ពី​តំណែង។ ការ​រើសអើង​នេះ​ជា​ការ​ខុស​ច្បាប់ ខុស​ពី​គោលការណ៍​ប្រជាធិបតេយ្យ​ដែល​ជា​គោលការណ៍​មួយ​បែប​កុម្មុយនីស្ត​ផ្ដាច់ការ និង​គាប​សង្កត់​សិទ្ធិ​សេរីភាព​ប្រជាធិបតេយ្យ​មន្ត្រី​រាជការ ក៏ដូចជា​ប្រជាពលរដ្ឋ »

ពលរដ្ឋ​ដែល​ចូលរួម​ហែ​ក្បួន​របស់​គណបក្ស​ប្រជាជន​កម្ពុជា រស់នៅ​សង្កាត់​សាមគ្គី ក្រុង​ស្ទឹងត្រែង លោក ស៊ុន ស៊ាត ឲ្យ​ដឹង​ថា មូលហេតុ​ដែល​លោក​គាំទ្រ​គណបក្ស​ប្រជាជន​កម្ពុជា ដោយសារ​រដ្ឋ​អំណាច​មិន​បាន​ហាមឃាត់​ពលរដ្ឋ​ដែល​ជា​កសិករ ទៅ​ចាប់​ដី​ព្រៃ​ធ្វើ​ស្រែ​ចម្ការ​នោះ​ទេ ហើយ​ការ​អភិវឌ្ឍ​មាន​ការ​រីក​ចម្រើន​គ្រប់​វិស័យ៖ « ខ្ញុំ​ជា​កសិករ​ចឹង ទៅ​ធ្វើ​កន្លែង​ណា​គេ​មិន​ហាមឃាត់​ទេ ចង់​ធ្វើ​ត្រង់​ណា​ក៏​បាន ប៉ុន្តែ​កុំ​ឲ្យ​ទៅ​កាប់​ដី​ក្រុមហ៊ុន និង​ដី​របស់​គេ »

នៅ​ខែត្រ​ស្ទឹងត្រែង មាន​ឃុំ-សង្កាត់​ចំនួន​៣៦ និង​មាន​គណបក្ស​នយោបាយ​ចំនួន​៤ រួម​មាន​គណបក្ស​ប្រជាជន​កម្ពុជា គណបក្ស​សង្គ្រោះ​ជាតិ គណបក្ស​ហ៊្វុនស៊ិនប៉ិច និង​គណបក្ស​ខ្មែរ​រួបរួម​ជាតិ បាន​ដាក់​បញ្ជី​បេក្ខជន​ឈរ​ឈ្មោះ​សម្រាប់​ការ​បោះឆ្នោត​ក្រុម​ប្រឹក្សា​ឃុំ-សង្កាត់​នៅ​ថ្ងៃ​ទី​៤ ខែ​មិថុនា ខាង​មុខ​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។