តំណាងគណបក្សកាន់អំណាចនិងគណបក្សប្រឆាំង ព្រមព្រៀងគ្នាបង្កើតយន្តការចុះឈ្មោះអ្នកបោះឆ្នោតឡើងវិញ និងគ្រោងបង្កើតច្បាប់ស្តីពីហិរញ្ញវត្ថុគណបក្សនយោបាយ។
ការព្រមព្រៀងគ្នានេះ ធ្វើឡើងក្នុងកិច្ចប្រជុំគណៈកម្មការចម្រុះរបស់គណបក្សទាំងពីរ នៅព្រឹកថ្ងៃទី៣ ខែមីនា ដើម្បីសិក្សា និងរៀបចំក្របខ័ណ្ឌកែទម្រង់ការបោះឆ្នោត។ កិច្ចប្រជុំនេះធ្វើឡើងនៅវិមានព្រឹទ្ធសភា នៅរាជធានីភ្នំពេញ។
បន្ទាប់ពីជួបពិភាក្សាគ្នាអស់រយៈពេលជាង ៤ម៉ោងរួចមក មន្ត្រីជាន់ខ្ពស់គណបក្សទាំងពីរប្រកាសថា គណៈកម្មការកែទម្រង់ការបោះឆ្នោតនេះ នឹងបើកកិច្ចប្រជុំម្ដងទៀតនៅថ្ងៃច័ន្ទ ទី១០ ខែមីនា ខាងមុខ។
គណបក្សសង្គ្រោះជាតិ ស្នើកែទម្រង់លើបញ្ហាមួយចំនួនរួមមាន៖ ការរៀបចំបញ្ជីឈ្មោះ និងចុះឈ្មោះអ្នកបោះឆ្នោតថ្មី ការបង្កើតច្បាប់ស្ដីពីហិរញ្ញវត្ថុគណបក្សនយោបាយ ការកែទម្រង់ស្ថាប័នរៀបចំការបោះឆ្នោត យន្តការនៃការដោះស្រាយវិវាទពេលបោះឆ្នោត បញ្ហាប្រព័ន្ធផ្សព្វផ្សាយសម្រាប់គណបក្សនយោបាយ រួមទាំងការទាមទារឲ្យមានការបោះឆ្នោតឡើងវិញ។ ប៉ុន្តែបក្សទាំងពីរបានឯកភាពគ្នាលើចំណុចពីរជាមុនសិន គឺរៀបចំការចុះឈ្មោះអ្នកបោះឆ្នោត និងបញ្ជីឈ្មោះបោះឆ្នោតឡើងវិញ និងការបង្កើតច្បាប់ស្តីពីហិរញ្ញវត្ថុគណបក្សនយោបាយ។
ប្រធានក្រុមការងារគណបក្សសង្គ្រោះជាតិ លោក សុន ឆ័យ មានប្រសាសន៍ថា គណបក្សទាំងពីរនឹងពិភាក្សាគ្នាលម្អិតលើចំណុចដែលនៅសល់បន្តទៀត ដូចជាកំណែទម្រង់ស្ថាប័ន គ.ជ.ប. យន្តការដោះស្រាយបណ្ដឹង និងប្រព័ន្ធផ្សព្វផ្សាយជាដើម។ លោកបន្តថា ជំនួបថ្មីនេះ ជាយន្តការមួយបើកផ្លូវឲ្យមានកិច្ចចរចារវាងមេដឹកនាំកំពូលនៃគណបក្សទាំងពីរ។ លោកបន្តថា គណបក្សប្រឆាំងនៅតែទាមទារឲ្យបោះឆ្នោតឡើងវិញដោយមិនកែប្រែឡើយ។
ឆ្លើយនឹងសំណួរដែលសួរថា តើគណបក្សសង្គ្រោះជាតិនឹងចូលសភា ដើម្បីធ្វើការកែទម្រង់ ឬទេ?
លោក សុន ឆ័យ ឆ្លើយយ៉ាងដូចនេះថា៖ «ឧទាហរណ៍ថា អនុម័តច្បាប់ថាត្រូវចូលអីហ្នឹងនោះណា វាតម្រូវថា ត្រូវចូលអីហ្នឹងវាអាចទៅជាមួយគ្នាអីដែរ វាការងារទៅមុខមួយជំហានដែរ តែមិនបានន័យថា ការកែទម្រង់ហ្នឹងអាចទាញគណបក្សសង្គ្រោះជាតិ ឲ្យចូលសភាទាំងទទឹងទិសនោះទេ»។
ឆ្លើយតបនឹងបញ្ហានេះ ប្រធានក្រុមការងារគណបក្សប្រជាជនកម្ពុជា លោក ប៊ិន ឈិន បញ្ជាក់ថា គណបក្សប្រជាជនកម្ពុជា រង់ចាំបើកទ្វារចំហសម្រាប់កិច្ចចរចានយោបាយរវាងមេដឹកនាំកំពូលនៃបក្សទាំងពីរ។ លោកបន្តថា នៅដំណាក់កាលចុងក្រោយ គណបក្សសង្គ្រោះជាតិ នៅតែត្រូវចូលទៅក្នុងសភាដោយជៀសមិនរួចឡើយ ព្រោះថា បើចង់កែទម្រង់ ឬបង្កើតច្បាប់ គឺមិនអាចធ្វើនៅក្រៅរបងសភាបានទេ៖ «រឿងសម្បទានហ្នឹង គឺសម្បទានហើយ តែឯកឧត្ដម សុន ឆ័យ គាត់លើកមិញហ្នឹង តែរឿងកែទម្រង់ហ្នឹង ធ្វើឡើងកុំឲ្យមានបញ្ហាដូចការបោះឆ្នោតអាណត្តិហ្នឹងទៀតណា»។
ការប្រជុំរវាងក្រុមការងារកំណែទម្រង់ការបោះឆ្នោតនេះ ធ្វើឡើងតាមសេចក្ដីថ្លែងការណ៍រួមនៃជំនួបកំពូលរវាងមេដឹកនាំបក្សទាំងពីរ កាលពីថ្ងៃទី១៦ ខែកញ្ញា ឆ្នាំ២០១៣ និងកិច្ចប្រជុំរវាងក្រុមការងារបច្ចេកទេសនៃបក្សទាំងពីរ កាលពីថ្ងៃទី១៨ ខែកុម្ភៈ ឆ្នាំ២០១៤។
កន្លងទៅសង្គមស៊ីវិលធ្លាប់រកឃើញថា ភាពមិនត្រឹមត្រូវនៃបញ្ជីឈ្មោះបោះឆ្នោតបានបង្កជាឧបសគ្គមួយផ្នែកធំសម្រាប់អ្នកបោះឆ្នោត។ អង្គការខុមហ្វ្រែល ធ្លាប់បានរកឃើញថា អ្នកបោះឆ្នោតជាង ១លាននាក់ បានបាត់ឈ្មោះចេញពីបញ្ជីឈ្មោះអ្នកបោះឆ្នោត។ ប៉ុន្តែគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានរិះគន់ថា របាយការណ៍របស់សង្គមស៊ីវិលមិនគួរជាទីទុកចិត្តឡើយ។
ចំពោះច្បាប់ស្ដីពីហិរញ្ញវត្ថុគណបក្សនយោបាយវិញ ត្រូវបានសង្គមស៊ីវិលពណ៌នាថា វាជាឧបករណ៍សម្រាប់ឲ្យគណបក្សនយោបាយប្រកួតប្រជែងគ្នាដោយស្មើភាព និងតម្លាភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។