លោក ហ៊ុន សែន ដែលទើបឡើងកាន់តំណែងជាប្រធានគណបក្សប្រជាជនកម្ពុជា នោះ លោកបានប្រកាសប្រឆាំងដាច់ខាតចំពោះរាល់ទង្វើជ្រៀតជ្រែកពីមជ្ឈដ្ឋានបរទេសណា ដែលហ៊ានលូកដៃចូលក្នុងដំណើរការអនុម័តច្បាប់អង្គការ សមាគម និងច្បាប់សហជីព។
ការលើកឡើងនេះ ធ្វើឡើងភ្លាមៗនៅស្របពេលដែលអង្គការ សមាគម សហជីព ធ្វើយុទ្ធនាការបង្ហាញជំហរមិនគាំទ្រមិនឲ្យមានច្បាប់សមាគម និងអង្គការមិនមែនរដ្ឋាភិបាល ដែលពួកគេរាប់រយនាក់នាំគ្នាតវ៉ានៅមុខរដ្ឋសភា ប្រឆាំងនឹងការអនុម័តសេចក្ដីព្រាងច្បាប់នេះ នៅព្រឹកថ្ងៃទី២៨ មិថុនា។
លោកនាយករដ្ឋមន្ត្រី ហ៊ុន សែន បានប្រកាសជាថ្មីម្ដងទៀតថា លោកគាំទ្រសេចក្ដីព្រាងច្បាប់ស្ដីពីសមាគម អង្គការមិនមែនរដ្ឋាភិបាល ដែលគេបញ្ជូនទៅដល់សភារួចហើយ រង់ចាំតែការអនុម័តនោះ។
ការលើកឡើងរបស់ លោក ហ៊ុន សែន ប្រធានថ្មីគណបក្សប្រជាជនកម្ពុជា នៅពេលនេះ ធ្វើឡើងនៅក្នុងពិធីរំឭកខួប ៦៤ឆ្នាំនៃថ្ងៃបង្កើតគណបក្សប្រជាជនកម្ពុជា នៅព្រឹកថ្ងៃទី២៨ មិថុនា។ ថ្លែងទៅកាន់អ្នកចូលរួមនៅក្នុងពិធីនេះ លោក ហ៊ុន សែន ប្រធានថ្មីគណបក្សប្រជាជនកម្ពុជា មានប្រសាសន៍ថា គណបក្សប្រជាជនកម្ពុជា ប្រកាន់ជំហរគាំទ្រទាំងស្រុងលើការបង្កើតច្បាប់ស្ដីពីសមាគម និងអង្គការមិនមែនរដ្ឋាភិបាល ព្រមទាំងសេចក្តីព្រាងច្បាប់សហជីព លោក ហ៊ុន សែន ព្រមានចំពោះជនបរទេសណាដែលជ្រៀតជ្រែកក្នុងការអនុម័តសេចក្ដីព្រាងច្បាប់ទាំងនេះ ថាជាការបំពានឯករាជ្យ និងអធិបតេយ្យភាពរបស់កម្ពុជា។
លោកបន្តថា ច្បាប់នេះនឹងធានានូវតម្លាភាព ការពារទ្រទ្រង់សិទ្ធិសេរីភាព និងផលប្រយោជន៍របស់សមាគម អង្គការមិនមែនរដ្ឋាភិបាល និងសហជីពទាំងអស់ និងប្រកបដោយគោលការណ៍នីតិរដ្ឋ៖ «ច្បាប់នេះដើម្បីការពារទ្រទ្រង់សិទ្ធិសេរីភាព និងផលប្រយោជន៍របស់សមាគម អង្គការមិនមែនរដ្ឋាភិបាល និងសហជីពទាំងអស់ និងផលប្រយោជន៍សាធារណៈ ព្រមទាំងធានាឲ្យកិច្ចដំណើរការរបស់អង្គការទាំងនេះ ប្រព្រឹត្តទៅប្រកបដោយប្រសិទ្ធភាព ស្របតាមគោលការណ៍នីតិរដ្ឋ និងអភិបាលកិច្ចល្អ ហើយអំពាវនាវឲ្យមានការគោរពចំពោះព្រះរាជាណាចក្រកម្ពុជា ដែលជារដ្ឋអធិបតេយ្យ និងជាសមាជិកមួយនៃអង្គការសហប្រជាជាតិ»។
ការប្រកាសគាំទ្រសេចក្ដីព្រាងច្បាប់ដ៏ចម្រូងចម្រាសនេះ ស្របពេលក្រុមអង្គការសង្គមស៊ីវិល សហជីព ព្រះសង្ឃ សហគមន៍នានា កម្មករ និងប្រជាពលរដ្ឋ ដែលមកពីគ្រប់វិស័យជាង ៥០០ បានធ្វើយុទ្ធនាការប្រឆាំងនឹងសេចក្ដីព្រាងច្បាប់នេះចាប់ផ្ដើមនៅខាងមុខរដ្ឋសភា កាលពីព្រឹកថ្ងៃទី២៨ មិថុនា។ ក្រុមអ្នកតវ៉ាទាំងនោះ មិនគាំទ្រឲ្យមានច្បាប់នេះ និងសម្ដែងពីការព្រួយបារម្ភពីការគាបសង្កត់អង្គការសង្គមស៊ីវិល នៅក្រោយពេលសេចក្ដីព្រាងច្បាប់នេះត្រូវបានអនុម័ត។ ទន្ទឹមនឹងនេះ ពួកគេថែមទាំងបានព្រមានថា នឹងឈប់បោះឆ្នោតជូនគណបក្សនយោបាយណាដែលជំរុញឲ្យមានការអនុម័តសេចក្ដីច្បាប់ស្ដីពីពីសមាគម អង្គការមិនមែនរដ្ឋាភិបាល និងច្បាប់សហជីពទៀតផង។
មន្ត្រីអង្គការសមធម៌កម្ពុជា លោក ចាន់ វិចិត្រ ថ្លែងឲ្យដឹងនៅពេលធ្វើយុទ្ធនាការក្នុងចំណោមមន្ត្រីអង្គការសង្គមស៊ីវិលរាប់រយនាក់ផ្សេងទៀតថា នៅក្នុងកាលៈទេសៈនេះ កម្ពុជា មិនទាន់ចាំបាច់ត្រូវមានច្បាប់គ្រប់គ្រងអង្គការ សមាគម និងសហជីពនោះទេ ព្រោះច្បាប់នេះនឹងប៉ះពាល់ផលប្រយោជន៍ពលរដ្ឋកម្ពុជា។ លោក ចាន់ វិចិត្រ បានដាក់ការសង្ស័យថា រាល់ការគាំទ្ររបស់គណបក្សប្រជាជនកម្ពុជា និងការប្រកាសប្រឆាំងចំពោះមជ្ឈដ្ឋានបរទេសនៅពេលនេះ គឺជាចេតនានយោបាយ ដើម្បីដាក់សម្ពាធ និងបំបិទសិទ្ធិសេរីភាពសង្គមស៊ីវិល និងពលរដ្ឋកម្ពុជា៖ «ច្បាប់នេះខ្ញុំគិតថា រឹតត្បិតសេរីភាពរបស់អង្គការសង្គមស៊ីវិលនៅកម្ពុជា។ ខ្ញុំមិនពេញចិត្ត និងមិនគាំទ្រឲ្យមានច្បាប់នេះនោះទេ»។
សេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល បច្ចុប្បន្នកំពុងឋិតនៅគណៈកម្មការទី៦ គឺគណៈកម្មការនីតិកម្ម និងយុត្តិធម៌នៃរដ្ឋសភា។
អ្នកតំណាងរាស្ត្រមណ្ឌលភ្នំពេញ មកពីគណបក្សប្រជាជនកម្ពុជា និងជាសមាជិកគណៈកម្មការទី១ រដ្ឋសភា គឺគណៈកម្មការការពារសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា អ្នកស្រី ឡោក ខេង បានឲ្យដឹងនៅថ្ងៃទី២៨ មិថុនា នេះថា ច្បាប់នេះគណៈកម្មការទី៦ នៃរដ្ឋសភា កំពុងតែពិនិត្យ និងសិក្សាស្រាវជ្រាវ។ អ្នកស្រីឲ្យដឹងទៀតថា សភានឹងរៀបចំសិក្ខាសាលាពិគ្រោះយោបល់លើច្បាប់នេះនៅសប្ដាហ៍ទី១ នៃខែសីហា ខាងមុខនេះ ដោយមានវត្តមានទាំងអង្គការសង្គមស៊ីវិលជាតិ និងអន្តរជាតិ ចូលរួមក្នុងសិក្ខាសាលានោះ។
កាលពីពេលថ្មីៗនេះ មជ្ឈដ្ឋានអន្តរជាតិដូចជាអង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ដែលឃ្លាំមើលបញ្ហាសិទ្ធិមនុស្សនៅលើពិភពលោក បានប្រកាសថា ប្រសិនបើរដ្ឋសភាកម្ពុជា អនុម័តសេចក្តីព្រាងច្បាប់សមាគម និងអង្គការក្រៅរដ្ឋាភិបាល ដែលគណៈរដ្ឋមន្ត្រីទើបអនុម័តនោះ នឹងមានផលប៉ះពាល់យ៉ាងខ្លាំងដល់ដំណើរការងាររបស់អង្គការសមាគមជាតិ និងអន្តរជាតិ។
សេចក្ដីព្រាងច្បាប់ស្ដីពីសមាគម អង្គការមិនមែនរដ្ឋាភិបាល ត្រូវបានរដ្ឋាភិបាលចងក្រងធ្វើសេចក្ដីព្រាងរាប់ឆ្នាំមកហើយ ប៉ុន្តែកន្លងមក ដោយសារតែអង្គការសង្គមស៊ីវិល រួមទាំងអង្គទូតមួយចំនួនទៀត សម្ដែងពីការព្រួយបារម្ភពីការរឹតត្បិត សេចក្ដីព្រាងច្បាប់នេះត្រូវបានរដ្ឋាភិបាលទុកចោលមួយរយៈ ប៉ុន្តែនៅដើមឆ្នាំ២០១៥ នេះ លោក ហ៊ុន សែន បានប្រកាសគាំទ្រសេចក្ដីព្រាងច្បាប់នេះឡើងវិញ ស្រាប់តែទីស្ដីការគណៈរដ្ឋមន្ត្រីបានពិនិត្យ និងបញ្ជូនបន្តទៅឲ្យរដ្ឋសភា ដើម្បីពិនិត្យ និងអនុម័ត។ ក៏ប៉ុន្តែមកទល់ពេលនេះ គេមិនទាន់ដឹងនៅឡើយថា តើរដ្ឋសភានឹងយកសេចក្ដីព្រាងច្បាប់នេះអនុម័ត ឬផ្អាកសិន ទៅតាមការទាមទាររបស់អង្គការសង្គមស៊ីវិល?៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។