ក្រុមជនពិការមកពីតាមបណ្ដាខេត្តមួយចំនួន មានបំណងអោយរដ្ឋាភិបាលថ្មីយកចិត្តទុកដាក់ដល់ជនពិការ តាមរយៈគោលការណ៍សង្គមកិច្ចពិសេស ក្នុងនោះរួមទាំងការអប់រំ ការងារ និងសេវាសុខភាព។
ដៃម្ខាងកាន់ឈើច្រត់ ដៃម្ខាងទៀតកាន់បដាគណបក្សសង្គ្រោះជាតិ លោក ជា ឌី បានព្យាយាមដើរទាំងលំបាកតាមក្បួនរបស់ក្រុមអ្នកគាំទ្រគណបក្សសង្គ្រោះជាតិ ចេញពីទីលានប្រជាធិបតេយ្យឆ្ពោះទៅស្ថានទូតបារាំង បន្ទាប់មក គឺស្ថានទូតចក្រភពអង់គ្លេស និងស្ថានទូតសហរដ្ឋអាមេរិក។
ក្នុងវ័យជាង ៤០ឆ្នាំ បុរសពិការ ជា ឌី មកពីស្រុកស្នួល ខេត្តក្រចេះ រូបនេះបានអោយដឹងថា លោកបានធ្លាក់ខ្លួនពិការដោយជាន់មីន។ ក្នុងជីវិតជាជនពិការជាង ២០ឆ្នាំមកហើយ លោកពុំធ្លាប់ទទួលបានការគិតគូរយកចិត្តទុកដាក់ណាមួយពីសំណាក់អាជ្ញាធរពាក់ព័ន្ធឡើយ។ បច្ចុប្បន្ន វ័យកាន់តែច្រើន លោកហាក់ចាប់ផ្ដើមអស់សង្ឃឹមក្នុងជីវិត។
លោកប្រាថ្នាអោយមានការផ្លាស់ប្ដូរអ្នកដឹកនាំប្រទេស ដែលលោកគិតថា នឹងអាចជួយអោយជនពិការទទួលបានការយកចិត្តទុកដាក់ដ៏ពិតប្រាកដ ដែលទំនងថានឹងមានជីវភាពសមរម្យ វៀរចាកការមាក់ងាយ ឬការប្រមាថនានា។
លោក ជា ឌី រំលឹកថា ធ្លាប់មានអាជ្ញាធរចុះស្រង់ស្ថិតិជនពិការ ដែលមានទាំងរូបលោកផងនោះ ដោយសន្យាថា ផ្ដល់ប្រាក់សង្គមកិច្ចជួយសម្រួលជីវភាពរស់នៅរបស់ជនពិការ។ ប៉ុន្តែពេលវេលាបានកន្លងទៅជាង ៨ឆ្នាំហើយ លោកនៅតែមិនទាន់បានប្រាក់សង្គមកិច្ចនោះ។
អតីតយុទ្ធជនមួយរូបដែលបានធ្លាក់ខ្លួនពិការក្នុងសង្គ្រាម កាលពីឆ្នាំ១៩៩៣ ជាអ្នកមកពីស្រុកកណ្ដាលស្ទឹង ខេត្តកណ្ដាល លោក ហ៊ីង ប៊ុនធឿន មានប្រសាសន៍ថា លោកចង់ឃើញការអនុវត្តគោលការណ៍យកចិត្តទុកដាក់ចំពោះពលរដ្ឋក្រីក្ររបស់គណបក្សសង្គ្រោះជាតិ។
លោក ប៊ុនធឿន រំលឹកថា នៅពេលមួយនោះដែលកូនឈឺធ្ងន់ លោកបានសម្រេចលក់ឈ្មោះជាយោធិនពិការក្នុងតម្លៃជាង ១លានរៀល ដើម្បីយកប្រាក់ទៅព្យាបាលជំងឺកូន។
តាម លោក ប៊ុនធឿន អ្នកក្រីក្រដូចរូបលោក គឺប្រឈមខ្លាំងនឹងបញ្ហាគ្មានប្រាក់ព្យាបាលជំងឺ។ ស្របគ្នានេះ អំពើពុករលួយ និងបក្ខពួកនិយម ក៏នឹងរុញច្រានអោយកូនចៅជំនាន់ក្រោយរបស់ពួកគាត់ ប្រឈមនឹងអនាគតមិនច្បាស់លាស់។
នៅគោលនយោបាយ ៧ចំណុចរបស់គណបក្សសង្គ្រោះជាតិ បានធានាពីចំណុចមួយចំនួនទាក់ទងដល់ប្រាក់សង្គមកិច្ច និងផ្ដល់សេវាសុខាភិបាលដោយពុំយកប្រាក់។
យ៉ាងនេះក្ដី សម្រាប់រដ្ឋាភិបាលកម្ពុជា អាណត្តិទី៥ ក៏បានប្រកាសពីការកែទម្រង់វិស័យជាច្រើន។
លោកនាយករដ្ឋមន្ត្រី ហ៊ុន សែន បានថ្លែងនៅក្នុងកិច្ចប្រជុំគណៈរដ្ឋមន្ត្រីលើកដំបូង កាលពីថ្ងៃទី២៥ ខែកញ្ញា ថានឹងពង្រឹងការយកចិត្តទុកដាក់ចំពោះជនពិការ។
ជាមួយគ្នានេះ លោកនាយករដ្ឋមន្ត្រី ហ៊ុន សែន ក៏បានលើកឡើងពីគម្រោងកែលំអសេវាកម្មសុខាបាលសម្រាប់ជនក្រីក្រ។
ដ្បិតថាមានការធានាអះអាងបែបនេះ អ្នកវិភាគសង្គមបានមើលឃើញថា កំណែទម្រង់របស់រដ្ឋាភិបាល គឺពិបាកនឹងបានសម្រេច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។