ក្រុមមេធាវី និងក្រុមគ្រួសារប្រធានគណបក្សសង្គ្រោះជាតិ បានទៅសួរសុខទុក្ខលោក កឹម សុខា ដែលកំពុងជាប់ឃុំនៅក្នុងពន្ធនាគារត្រពាំងផ្លុង ខេត្តត្បូងឃ្មុំ នៅថ្ងៃទី៤ កញ្ញា។ ចំណែកតំណាងអយ្យការអមសាលាដំបូងរាជធានីភ្នំពេញ ៣រូប ក៏បានបញ្ចប់ការសាកសួរចម្លើយលោក កឹម សុខា ដែរ ហើយនឹងបន្តនីតិវិធីរបស់ខ្លួននៅថ្ងៃទី៥ កញ្ញា។ យ៉ាងនេះក្តី ក្រុមមេធាវីនឹងរិះរកគ្រប់មធ្យោបាយដើម្បីជួយកូនក្តីរបស់ខ្លួន។
ក្រុមមេធាវីការពារក្តីឲ្យប្រធានគណបក្សប្រឆាំងបញ្ជាក់ថា ស្ថានភាពសុខភាពលោក កឹម សុខា គឺរឹងមាំ និងមានស្មារតីល្អ ដើម្បីឆ្លើយតបទៅនឹងការសាកសួររបស់ក្រុមតំណាងអយ្យការអមសាលាដំបូងរាជធានីភ្នំពេញទៀតផង។ ការថ្លែងដូចនេះ ក្រោយពេលក្រុមមេធាវីបានចូលទៅជួបកូនក្តីរបស់ខ្លួននៅក្នុងមណ្ឌលកែប្រែទី៣ ឬហៅថាពន្ធនាគារត្រពាំងផ្លុង នៅរសៀលថ្ងៃទី៤ កញ្ញា។
មេធាវីការពារក្តីឲ្យលោក កឹម សុខា ម្នាក់ក្នុងចំណោមមេធាវីទាំងអស់ ៥នាក់ មានប្រសាសន៍ថា ព្រះរាជអាជ្ញារងអមសាលាដំបូងរាជធានីភ្នំពេញចំនួន ៣នាក់ បានបញ្ចប់ការសាកសួរយកចម្លើយពីកូនក្តីរបស់លោក ប៉ុន្តែមិនទាន់មានការចោទប្រកាន់នោះទេ ព្រោះនេះគ្រាន់តែជាដំណាក់កាលស៊ើបអង្កេតបឋមប៉ុណ្ណោះ។ ចំណែកកូនក្តីរបស់លោក ក៏មានស្មារតីល្អដើម្បីឆ្លើយដោះបន្ទុកចំពោះការសាកសួររបស់ព្រះរាជអាជ្ញារងទាំងបីនាក់ ជុំវិញករណីសង្ស័យ រហូតដល់មានការចាប់ខ្លួនលោកនោះ៖ « មកដល់ពេលនេះ យើងមិនទាន់ដឹងនីតិវិធីបន្ទាប់យ៉ាងម៉េចទេ សូម្បីខាងព្រះរាជអាជ្ញាក៏គាត់មិនដឹងថាធ្វើម៉េចដែរ។ ដំណាក់កាលនេះ ដំណាក់កាលគាត់សួររកចម្លើយ ហើយគាត់សិក្សាលើភស្តុតាងផ្សេងៗទៀត ដើម្បីពិនិត្យ និងសម្រេចនៅពេលក្រោយ »។
ប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួនកាលពីយប់រលងអធ្រាត្រឈានចូលថ្ងៃទី៣ កញ្ញា ដោយចោទពីបទក្បត់ជាតិ យោងលើឃ្លីបវីដេអូរបស់លោក កឹម សុខា ឈរនិយាយទៅកាន់អ្នកគាំទ្រគណបក្សសង្គ្រោះជាតិ នៅប្រទេសអូស្ត្រាលី កាលពីឆ្នាំ២០១៤។
ការចាប់ខ្លួនលោក កឹម សុខា ទាំងយប់នេះដែរ ក្រុមមេធាវីរបស់លោកមើលឃើញថា គឺជាការអនុវត្តខុសច្បាប់ ទោះបីជាបទល្មើសជាក់ស្តែងក៏ដោយ ព្រោះគេត្រូវរង់ចាំដល់ព្រឹកឡើងហួសពីម៉ោង ៦ព្រឹក ទើបសមត្ថកិច្ចអាចចូលទៅឆែកឆេរ ឬឃាត់ខ្លួនបាន៖ « ដោយសារក្រមនីតិព្រហ្មទណ្ឌបានចែងពាក់ព័ន្ធពេលវេលានៃការចូលឆែកឆេរ ចូលឃាត់ខ្លួនក៏ដូចជាចូលលំនៅឋានរបស់ជនណាមួយហ្នឹង គេអាចធ្វើពីរយៈពេលពីម៉ោង ៦ព្រឹកដល់ម៉ោង ៦ល្ងាច »។
អ្នកនាំពាក្យអយ្យការអមសាលាដំបូងរាជធានីភ្នំពេញ លោក លី សុផាណា បញ្ជាក់ថា តំណាងអយ្យការបានបញ្ចប់ការសួរចម្លើយលោក កឹម សុខា នារសៀលថ្ងៃទី៤ កញ្ញា ព្រមទាំងកំពុងពិនិត្យលើឯកសារ និងភស្តុតាងនានា ហើយនឹងបន្តចំណាត់ការតាមនីតិវិធីនៅថ្ងៃទី៥ កញ្ញា បន្តទៀត។
ក្រៅពីមេធាវីរបស់ប្រធានគណបក្សប្រឆាំង ប្រពន្ធរបស់លោក កឹម សុខា អ្នកស្រី តែ ច័ន្ទមនោ ក៏បានចូលទៅជួបស្វាមីនៅម៉ោងប្រមាណ ៦ព្រលប់ថ្ងៃដដែលបានប៉ុន្មាននាទីប៉ុណ្ណោះ ប៉ុន្តែអ្នកស្រីមិនបានប្រាប់អ្នកសារព័ត៌មានបែបណាទេ។ ចំណែកមន្ត្រីគណបក្សសង្គ្រោះជាតិ និងតំណាងរាស្ត្រមួយចំនួនផង មិនត្រូវបានអនុញ្ញាតឲ្យចូលជួបលោក កឹម សុខា ឡើយ។
នៅខាងក្រៅពន្ធនាគារ គឺមិនមានសកម្មជន និងពលរដ្ឋដែលគាំទ្រគណបក្សប្រឆាំងទៅចូលរួមតាមដាននោះទេ ក្រៅពីមន្ត្រីសង្គមស៊ីវិល អ្នកសារព័ត៌មានមួយចំនួន និងមន្ត្រីសមត្ថកិច្ចដែលដាក់ជាច្រើនកន្លែង និងជាច្រើននាក់នៅក្បែរមណ្ឌលកែប្រែទី៣ នោះ។
ក្រុមមេធាវីដដែលបញ្ជាក់ថា នឹងសិក្សាស្រាវជ្រាវ ព្រមទាំងប្រមូលរកភស្តុតាងផ្សេងៗដើម្បីដោះបន្ទុកកូនក្តីរបស់ខ្លួនឲ្យរួចផុតពីការចោទប្រកាន់ទាំងឡាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។