នៅថ្ងៃដំបូងនៃដំណើរការចុះឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ មានពលរដ្ឋប្រមាណជិត ៤ពាន់នាក់ (៣,៩៨២) បានចូលចុះឈ្មោះក្នុងការិយាល័យចំនួន ៧៧៦ការិយាល័យ នៅទូទាំងខេត្តកំពង់ឆ្នាំង។ ដំណើរការចុះឈ្មោះថ្ងៃដំបូងនេះមានបញ្ហាមួយចំនួន។
នៅតាមការិយាល័យចុះឈ្មោះបោះឆ្នោតចំនួន៦ គឺនៅសង្កាត់កំពង់ឆ្នាំង ផ្សារឆ្នាំង ខ្សាម ប្អេរ នៃក្រុងកំពង់ឆ្នាំង ឃុំជ្រៃបាក់ និងឃុំស្រែថ្មី ស្រុករលាប្អៀរ ដែលអាស៊ីសេរី បានចុះសង្កេតការណ៍នៅថ្ងៃទី១ ខែកញ្ញា មានបញ្ហាផ្នែកបច្ចេកទេសកុំព្យូទ័រ និងមានការរំខានមួយចំនួនក្នុងដំណើរការចុះឈ្មោះ។
នៅការិយាល័យខ្លះ មិនបានសម្រួលដល់មនុស្សចាស់ជរា ជនពិការ និងអ្នកពោះធំឲ្យបានចុះឈ្មោះមុននោះទេ និងមិនចុះឈ្មោះជូនពលរដ្ឋដែលមកពីភូមិផ្សេងខុសកាលវិភាគដែលអាជ្ញាធរឃុំ-សង្កាត់ បានកំណត់ទីតាំងការិយាល័យចុះឈ្មោះបោះឆ្នោតនៅតាមភូមិ។ ពលរដ្ឋខ្លះបោះបង់ការចុះឈ្មោះនៅថ្ងៃដំបូង បន្ទាប់ពីក្រុមការងារចុះឈ្មោះបោះឆ្នោតចេញលិខិតបដិសេធការចុះឈ្មោះដោយពុំមានឯកសារគ្រប់គ្រាន់ ហើយមេឃុំ ឬចៅសង្កាត់បានឈរ ឬជជែកគ្នាលេងក្នុងការិយាល័យទៀតផង។
ប្រធានគណៈកម្មការរៀបចំការបោះឆ្នោតខេត្តកំពង់ឆ្នាំង (PEC) អ្នកស្រី នួន ចាន់នី ទទួលស្គាល់ថា នៅថ្ងៃចុះឈ្មោះដំបូងនេះមានបញ្ហាបច្ចេកទេសកុំព្យូទ័រច្រើន ហើយបញ្ហាបន្តិចបន្តួចផ្សេងទៀតមិនបានរាំងស្ទះដល់ដំណើរការចុះឈ្មោះនោះទេ។ ចំពោះបញ្ហាសណ្ដាប់ធ្នាប់ និងការមិនចុះឈ្មោះជូនពលរដ្ឋដែលបានរកឃើញអ្នកស្រីថា នឹងណែនាំដល់ក្រុមការងារបន្ថែម និងធ្វើការកែតម្រូវ៖ «ការពិតយើងធ្វើការចុះឈ្មោះនៅសាលាឃុំនេះ គឺប្រជាពលរដ្ឋរស់នៅក្នុងឃុំហ្នឹង ភូមិណាមកចុះក៏បានដែរ។ អ៊ីចឹងគាត់ចុះទៅអនុប្រធាន និងប្រធាន នឹងរៀបចំគាត់ទៅតាមភូមិហើយ បញ្ចូលឈ្មោះគាត់ក្នុងកុំព្យូទ័រទៅតាមការិយាល័យដែលគាត់រស់នៅក្នុងភូមិហ្នឹងទៅណា។ អត់មានប្រកាន់ថា អ្នកភូមិនេះ អ្នកនោះ ភូមិនោះ ចុះឲ្យភូមិនេះ អត់ចុះភូមិនោះ អត់ទេ! ធ្វើខុសហើយ អត់អីទេក្មួយ ខ្ញុំនឹងជម្រាបជូនរួចកែតម្រូវ»។
អ្នកសង្កេតការណ៍របស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (COMFREL) លោក លាភ ប៊ុនលាង ថ្លែងថា ថ្ងៃដំបូង នៃដំណើរការចុះឈ្មោះបោះឆ្នោតនេះ មានកំហុសនីតិវិធីក្នុងការរៀបចំសណ្ដាប់ធ្នាប់បានកើតមានក្នុងការិយាល័យមួយចំនួនតូច ប៉ុន្តែមិនរំខានដល់ដំណើរការចុះឈ្មោះនោះទេ។ លោកស្នើឲ្យមានការសម្រួលសណ្ដាប់ធ្នាប់ប្រសើរជាងនេះ «ខ្ញុំសូមអំពាវនាវដល់គណៈកម្មាធិការជាតិរៀបចំការបោះឆ្នោត ត្រូវណែនាំបន្ថែមដល់អាជ្ញាធរឃុំ សង្កាត់ ដើម្បីឲ្យមានអ្នករៀបចំសណ្ដាប់ធ្នាប់ជូនអ្នកដែលមកសុំចុះឈ្មោះបោះឆ្នោត ព្រោះថា ថ្ងៃដំបូងនេះ ខ្ញុំសង្កេតឃើញថា នៅតាមឃុំ សង្កាត់មួយចំនួនហ្នឹង គឺមិនមានអ្នកដែលរៀបចំនៅមុខការិយាល័យប៉ឆ្នោតទេ»។
ការចុះឈ្មោះតាមប្រព័ន្ធបច្ចេកទេសកុំព្យូទ័រទំនើបចាប់ពីថ្ងៃទី១ ខែកញ្ញា ដល់ថ្ងៃទី២៩ ខែវិច្ឆិកា ឆ្នាំ២០១៦ នេះ ដើម្បីបម្រើដល់ការរៀបចំបញ្ជីឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់នៅថ្ងៃទី៤ ខែមិថុនា ឆ្នាំ២០១៧ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។