សម្ដេចក្រុមព្រះ នរោត្តម រណឫទ្ធិ ព្រះប្រធានគណបក្សរាជានិយមហ៊្វុនស៊ិនប៉ិច (FUNCINPEC) មានបន្ទូលថា គណបក្សហ៊្វុនស៊ិនប៉ិច រលាយដោយសារមានអ្នកស៊ីបាយបោកឆ្នាំង ប៉ុន្តែទ្រង់មិនបង្ហាញឈ្មោះថា បុគ្គលនេះជាអ្នកណាទេ។ ទាក់ទងរឿងនេះដែរ លោក ញឹក ប៊ុនឆៃ ដែលធ្លាប់ធ្វើបក្សប្រហារបណ្ដេញសម្ដេចក្រុមព្រះចេញពីបក្សនិយាយថា លោកមិនយល់ហេតុអីព្រះអង្គមានបន្ទូលបែបនេះ។ ករណីនេះ អ្នកវិភាគបញ្ហាសង្គមយល់ឃើញថា គណបក្សហ៊្វុនស៊ិនប៉ិច នឹងបែកបាក់ផ្ទៃក្នុងជាថ្មីម្ដងទៀត។
ការលើកឡើងរបស់អ្នកវិភាគពីដំណើរទៅរកការបែកបាក់ជាថ្មីរបស់គណបក្សរាជានិយមមួយនេះ បន្ទាប់ពីសម្ដេចក្រុមព្រះ នរោត្តម រណឫទ្ធិ ជាព្រះប្រធានគណបក្ស និងលោក ញឹក ប៊ុនឆៃ ជាអនុប្រធានបក្ស បង្ហាញការមិនចុះសម្រុងនឹងគ្នានៅរយៈពេលចុងក្រោយនេះ។
សម្ដេចក្រុមព្រះ នរោត្តម រណឫទ្ធិ មានបន្ទូលថា បើសមាជិកគណបក្សហ៊្វុនស៊ិនប៉ិច មិនពេញចិត្តការដឹកនាំរបស់ព្រះអង្គ ពួកគេអាចដើរចេញពីគណបក្សនេះបាន។ ប៉ុន្តែព្រះអង្គបញ្ជាក់ថា មិនបណ្ដេញអ្នកណាម្នាក់ចេញពីបក្សទេ។ ព្រះអង្គរំលឹករឿងចាស់ថា គណបក្សពីមានសំឡេងឆ្នោតនៅក្នុងសភា រហូតគ្មានកៅអីសូម្បីតែមួយដូចនេះ ព្រោះមានអ្នកខ្លះស៊ីបាយហើយបោកឆ្នាំងចោល៖ « ដោយសារតែអ្នកហ៊្វុនស៊ិនប៉ិច ស៊ីបាយហើយបោកឆ្នាំង ដល់តែបោកឆ្នាំងបានអីដាំទៀត ចាញ់ម្តងហើយ ឥឡូវចង់បោកទៀត » ។
ទោះថ្លែងមិនចេញឈ្មោះចំពោះអ្នកមិនពេញចិត្តក្នុងការដឹកនាំរបស់ព្រះអង្គ ប៉ុន្តែអនុប្រធានគណបក្សហ៊្វុនស៊ិនប៉ិច លោក ញឹក ប៊ុនឆៃ ទើបលើកឡើងនៅពេលថ្មីៗនេះថា ការដឹកនាំរបស់សម្ដេចក្រុមព្រះមួយឆ្នាំ ប្រជាប្រិយភាពបក្សមានតែធ្លាក់ចុះ។
អ្នកសិក្សាការអភិវឌ្ឍសង្គម លោក មាស នី និយាយថា ស្ថានភាពគណបក្សហ៊្វុនស៊ិនប៉ិច នៅពេលនេះ ស្ថិតក្នុងមាត់ជ្រោះនៃការបែកបាក់ម្ដងទៀត ប្រសិនបើស្ថានភាពដូចសព្វថ្ងៃនេះ។ លោកបន្តថា គណបក្សនេះបានញែកជាពីរក្រុម គឺក្រុមសម្ដេចក្រុមព្រះ និងក្រុមលោក ញឹក ប៊ុនឆៃ ហើយគណបក្សនេះមិនបានយកមេរៀនចាស់មករៀនសូត្រឡើងវិញទេ៖ «យើងមើលទៅគណបក្សហ៊្វុនស៊ិនប៉ិច បើទោះជាឥឡូវនេះរួមគ្នាក៏ដោយ ប៉ុន្តែអត់ឃើញយកមេរៀនចាស់នោះសិក្សាឡើងវិញទេ ថាហេតុអីរលាយពីមុន? ហើយត្រូវដើរយ៉ាងម៉េចទេ ?» ។
ក្នុងពិធីជួបជុំសមាជិកគណបក្សជាង ១០០នាក់នៅទូទាំងរាជធានីភ្នំពេញ នៅថ្ងៃទី៣០ ខែមករា មិនឃើញមានវត្តមានលោក ញឹក ប៊ុនឆៃ ចូលរួមទេ។ ដូចគ្នានេះដែរ ក្នុងពិធីប្រគល់ត្រាដល់ប្រធានគណៈកម្មការប្រតិបត្តិរាជធានី ខេត្ត ស្រុក ឃុំ ទូទាំងប្រទេស កាលពីថ្ងៃទី១៦ ខែមករា ក៏គ្មានវត្តមានលោក ញឹក ប៊ុនឆៃ ដែរ។
ទាក់ទងរឿងនេះដែរ អនុប្រធានគណបក្សគណបក្សហ៊្វុនស៊ិនប៉ិច លោក ញឹក ប៊ុនឆៃ ឆ្លើយតបថា លោកមិនដឹង ហើយក៏មិនយល់ថា តើបន្ទូលសម្ដេចក្រុមព្រះ ថាអ្នកស៊ីបាយបោកឆ្នាំងសំដៅទៅលើអ្នកណា ហើយដើម្បីអ្វី? លោក ញឹក ប៊ុនឆៃ នៅតែអះអាងថា លោកមិនចាកចេញពីគណបក្សនេះជាដាច់ខាត៖ «ខ្ញុំមិនដឹងថាលោកថាឲ្យអ្នកណាទេ ស៊ីបាយបោកឆ្នាំង ឬក៏អ្នកដែលមកដង្ហែព្រះអង្គ ឬក៏ចង់ថាឲ្យខ្ញុំក៏មិនដឹង»។
កាលពីឆ្នាំ២០០៦ លោក ញឹក ប៊ុនឆៃ បានធ្វើបក្សប្រហារទម្លាក់សម្ដេចក្រុមព្រះចេញពីប្រធានគណបក្សដោយចោទប្រកាន់ប្រព្រឹត្តអំពើពុករលួយ និងលក់ទីស្នាក់ការកណ្ដាលរបស់គណបក្ស។
លោក ញឹក ប៊ុនឆៃ នៅតែបន្តរិះគន់សម្ដេចក្រុមព្រះថា ការដឹកនាំរបស់ព្រះអង្គជាងមួយឆ្នាំនេះ ការសម្រេចតែងតាំងសមាជិកផ្ទៃក្នុងបក្សធ្វើឲ្យមន្ត្រីខ្លះបាត់បង់ការងារ និងតួនាទី។ លោកថា ការសម្រេចនោះទៀតសោត សម្ដេចក្រុមព្រះមិនបានជជែកជាមួយលោក ដែលទង្វើនេះខុសពីកិច្ចព្រមព្រៀងនៃការរួបរួមគ្នាឡើងវិញកាលពីដើមឆ្នាំ២០១៥។ លោក ញឹក ប៊ុនឆៃ បង្ហាញភាពខ្មាសអៀន ព្រោះសម្ដេចក្រុមព្រះតែងតាំងក្បាលម៉ាស៊ីនបក្សឲ្យមានអនុប្រធាន ៦នាក់ និងអគ្គលេខាធិការរង ១២នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។