មេដឹកនាំសហភាពការងារកម្ពុជា និងសហជីពធំៗមួយចំនួនអះអាងថា អ្នកបញ្ជាទិញទំនិញពីបរទេស នឹងបន្តបញ្ជាទិញទំនិញពីកម្ពុជា កាន់តែច្រើនថែមទៀត បើសិនជារដ្ឋាភិបាល និងថៅកែរោងចក្រ ព្រមព្រៀងគ្នាដំឡើងប្រាក់ខែគោលជូនកម្មករឲ្យបានសមរម្យ ក្នុងឆ្នាំ២០១៤ នេះ។ ប៉ុន្តែ មន្ត្រីរដ្ឋាភិបាល និងភាគីថៅកែរោងចក្រថ្លែងថា ជំនួបចរចាដំឡើងប្រាក់ឈ្នួលកម្មករ នឹងចាប់ផ្ដើមបន្តទៀតនាឆ្នាំ២០១៥ ខាងមុខ។
មេដឹកនាំកម្មករឲ្យដឹងថា ស្ថានភាពការងាររបស់ក្រុមកម្មករ កំពុងបម្រើការងារក្នុងវិស័យកាត់ដេរ និងផលិតស្បែកជើង បច្ចុប្បន្នកំពុងជួបបញ្ហារំលោភសិទ្ធិ និងគាបសង្កត់ពីភាគីថៅកែរោងចក្រ។ ចំណែករដ្ឋាភិបាល និងភាគីពាក់ព័ន្ធដទៃទៀត មិនទាន់រកដំណោះស្រាយដំឡើងប្រាក់ខែជូនកម្មករឲ្យបានជាស្ថាពរ ទៅតាមការទាមទាររបស់ក្រុមកម្មករទេ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា អ្នកបញ្ជាទិញទំនិញពីក្រៅប្រទេស បញ្ជាក់រួចហើយថា បើភាគីពាក់ព័ន្ធពិចារណាដំឡើងប្រាក់បៀវត្សជូនកម្មករសមរម្យ ឲ្យបានជាស្ថាពរក្នុងឆ្នាំ២០១៤ នេះ អ្នកបញ្ជាទិញទំនិញពីកម្ពុជា នឹងកើនច្រើនចាប់ពីខែតុលា តទៅ ប៉ុន្តែបើសិនបញ្ហានេះមិនបានដោះស្រាយទេ ទំនងជាអ្នកបញ្ជាទិញនឹងកាត់បន្ថយច្រើនបំផុត។
លោក អាត់ ធន់៖ «ខាងអ្នកបញ្ជាទិញគេបានជជែកជាមួយសហជីពយើងថា គេនឹងបន្តដំឡើងនូវការបញ្ជាទិញ ក៏ដូចជាគាំទ្រទិញទំនិញពីប្រទេសកម្ពុជា បន្តទៀតនាថ្ងៃអនាគត បើសិនជារដ្ឋាភិបាល និងក្រុមហ៊ុនអ្នកផលិតហ្នឹង គាត់ដោះស្រាយបញ្ហាការចាប់ខ្លួនកម្មករទាំង ២១នាក់ និងការដកចេញការចោទប្រកាន់ទាំងស្រុង ព្រមទាំងការសងជំងឺចិត្តផ្សេងៗ បូកទាំងបញ្ឈប់ការរើសអើងផ្សេងៗទៅលើចលនារបស់សហជីព។ បញ្ហាទី២ គឺពាក់ព័ន្ធនឹងការចរចាផ្តល់ប្រាក់ឈ្នួលអប្បបរមា ដែលជាប្រភពបញ្ហានេះ ត្រូវតែបញ្ចប់ ដើម្បីកុំឲ្យកម្មករហ្នឹងអត់អារម្មណ៍ធ្វើការ ហើយអ្នកបញ្ជាទិញគាត់អត់មានជំនឿចិត្តថា គាត់កុម្ម៉ង់ទិញទំនិញពីកម្ពុជា ទៅ អាចផលិតទាន់ ឬក៏អាចនាំចេញបានដែរឬយ៉ាងណា ដោយសារតែទឹកចិត្តរបស់កម្មករនោះ»។
លោក អាត់ ធន់ ឲ្យដឹងដូច្នេះនៅក្នុងសន្និសីទស្ដីពី "ការលើកកម្ពស់ស្តង់ដារការងារស្នូល ឆ្ពោះទៅកាន់ការងារសមរម្យសម្រាប់កម្មករនិយោជិកនៅកម្ពុជា" ព្រឹកថ្ងៃពុធ ទី២ ខែកក្កដា នាសណ្ឋាគារកាំបូឌីយ៉ាណា (Cambodiana Hotel) ក្រុងភ្នំពេញ។
ទាក់ទិនបញ្ហានេះ អគ្គលេខាធិការសមាគមរោងចក្រកាត់ដេរនៅកម្ពុជា លោក កេន លូ បញ្ជាក់ថា ការចរចាដំឡើងប្រាក់បៀវត្សដែលកម្មករទាមទារ ១៦០ដុល្លារក្នុង១ខែ នឹងមិនមានទៀតទេក្នុងឆ្នាំ២០១៤ នេះ ប៉ុន្តែនឹងអាចពិចារណានៅឆ្នាំ២០១៥ ខាងមុខ។ លោកចោទថា ការធ្វើបាតុកម្មខុសច្បាប់របស់កម្មកររោងចក្រតាមការញុះញង់របស់សហជីពមួយចំនួន ជាដើមហេតុនាំឲ្យអ្នកបញ្ជាទិញទំនិញពីក្រៅប្រទេសធ្លាក់ចុះ ហើយរោងចក្រមួយចំនួនប្រឈមបិទទ្វារ។
លោកឲ្យដឹងថា ចាប់ពីខែមករា ដើមឆ្នាំ២០១៤ មក ការបញ្ជាទិញទំនិញពីក្រៅប្រទេសបានធ្លាក់ចុះ ប៉ុន្តែតំណាងរោងចក្ររូបនេះមិនបញ្ជាក់ថា ការធ្លាក់ចុះការបញ្ជាទិញនោះមានត្រឹមកម្រិតណាទេ។
លោក កេន លូ បារម្ភថា បើចន្លោះពី ៣ ទៅ ៦ខែទៅមុខទៀត អ្នកបញ្ជាទិញពីក្រៅប្រទេសបានកាត់បន្ថយការទិញទំនិញពីកម្ពុជា ទំនងរោងចក្រមួយចំនួនត្រូវបិទទ្វារ ហើយកម្មករនឹងត្រូវអត់ការងារធ្វើរាប់ម៉ឺននាក់៖ «ប៉ះពាល់ដល់អ្នកកុម្ម៉ង់ទិញ ពីព្រោះអ្នកបញ្ជាទិញគេមើល គឺគេបារម្ភហើយ។ គាត់បារម្ភថា ឥវ៉ាន់របស់គាត់កុម្ម៉ង់ទិញហ្នឹង តើអាចទទួលបានឥវ៉ាន់ ឬទំនិញទាន់ពេលវេលាឬអត់? ពីព្រោះអត់ដឹងថ្ងៃណាកើតឡើងបញ្ហាកូដកម្មបាតុកម្មរបស់កម្មករ ទោះបីរោងចក្រធ្វើល្អហើយ ប៉ុន្តែកម្មករលើកឡើងបញ្ហាច្បាប់ វាអាចឈានដល់ការធ្វើកូដកម្មបាតុកម្ម នាំឲ្យអ្នកបញ្ជាទិញគេបារម្ភ។ អ៊ីចឹងអ្នកបញ្ជាទិញច្រើនណាស់ គេកាត់បន្ថយបញ្ជាទិញបីខែទៅមុខ»។
បញ្ហានេះ កាលពីថ្ងៃទី២៤ ខែធ្នូ ឆ្នាំ២០១៣ ក្រុមកម្មករ និងសហជីពមួយចំនួន បានទាមទារដំឡើងប្រាក់ខែទាបបំផុត ១៦០ដុល្លារក្នុង១ខែ និងឈានដល់ក្រុមកម្មករប្រមូលផ្តុំគ្នាធ្វើបាតុកម្មចន្លោះពីថ្ងៃទី២៤ ខែធ្នូ ឆ្នាំ២០១៣ ដល់ថ្ងៃទី៣ ខែមករា ឆ្នាំ២០១៤។
ការតវ៉ានេះ ត្រូវសមត្ថកិច្ចចម្រុះប្រដាប់អាវុធរដ្ឋាភិបាលបង្ក្រាបដោយហិង្សា ដោយបណ្ដាលឲ្យកម្មករស្លាប់ ៥នាក់ និងរងរបួសរាប់សិបនាក់។ ក្នុងនោះសមត្ថកិច្ចបានចាប់ខ្លួនមនុស្សចំនួន ២៣នាក់ យកទៅផ្ដន្ទាទោសដាក់ពន្ធនាគារ។
ទោះយ៉ាងណា ការទាមទាររបស់ក្រុមកម្មករមិនទាន់ទទួលបានលទ្ធផលល្អទេ គឺរដ្ឋាភិបាលបានសម្រេចដំឡើងប្រាក់ខែគោលជូនកម្មករត្រឹមចំនួន ១០០ដុល្លារក្នុង១ខែ ហើយចាប់អនុវត្តពីខែកុម្ភៈ ឆ្នាំ២០១៤ មក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។