គណបក្សប្រជាធិបតេយ្យមូលដ្ឋាន ទាមទារឱ្យដោះលែងអ្នកដឹកនាំគណបក្សនយោបាយទាំងអស់ ដើម្បីឲ្យពួកគេអាចដឹកនាំគណបក្ស ចូលរួមប្រកួតប្រជែងការបោះឆ្នោតជាតិនាឆ្នាំ២០១៨ ខាងមុខ ដោយស្មើភាព និងយុត្តិធម៌។
សេចក្ដីថ្លែងការណ៍របស់គណបក្សប្រជាធិបតេយ្យមូលដ្ឋានចេញនៅថ្ងៃទី១៣ ខែតុលា លើកឡើងថា នៅសល់រយៈពេលមិនដល់១០ខែទៀតទេ ដែលប្រទេសកម្ពុជានឹងរៀបចំការបោះឆ្នោតជ្រើសតាំងតំណាងរាស្ត្រអាណត្តិទី៦។
សេចក្ដីថ្លែងការណ៍ដដែលបន្តថា គណបក្សនេះព្រួយបារម្ភយ៉ាងខ្លាំង ចំពោះបរិយាកាសនយោបាយកម្ពុជាបច្ចុប្បន្ន ដែលជះឥទ្ធិពលអវិជ្ជមានដល់ដំណើរការបោះឆ្នោតជ្រើសតាំងតំណាងរាស្ត្រ នាពេលខាងមុខ ដ្បិតបញ្ហានេះនឹងធ្វើឱ្យការបោះឆ្នោតមិនមានភាពសេរី យុត្តិធម៌ និងអាចទទួលយកបាន ដោយទូលំទូលាយពីសហគមន៍ជាតិ និងអន្តរជាតិឡើយ។
គណបក្សនេះមើលឃើញថា លក្ខខណ្ឌសំខាន់មួយនៃការបោះឆ្នោតប្រកបដោយសេរី និងយុត្តិធម៌គឺគណបក្សនយោបាយទាំងអស់ រួមទាំងគណបក្សសង្គ្រោះជាតិ មានឱកាស និងសេរីភាពចូលរួមប្រកួតប្រជែងដូចៗគ្នា។
មកដល់ពេលនេះមានប្រធានគណបក្សនយោបាយចំនួន ៣នាក់ កំពុងជាប់ក្នុងឃុំក្នុងពន្ធនាគារ។ អតីតប្រធានគណបក្សអំណាចខ្មែរ លោក សួន សេរីរដ្ឋា ត្រូវចៅក្រមនៅសាលាដំបូងរាជធានីភ្នំពេញ កាលពីខែសីហាសម្រេចដាក់គុក ៥ឆ្នាំ និងពិន័យលុយចំនួន ១០លានរៀល ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ បទធ្វើឲ្យខូចទឹកចិត្តកងទ័ព និងបទល្មើសមួយទៀត គឺញុះញង់កុំឲ្យយោធិនស្ដាប់បង្គាប់។
ចំណែកអតីតឧបនាយករដ្ឋមន្ត្រីកូតាខាងគណបក្សរាជានិយមហ៊្វុនស៊ិនប៉ិច (FUNCINPEC) និងជាប្រធានគណបក្សខ្មែររួបរួមជាតិ លោក ញឹក ប៊ុនឆៃ ត្រូវបានសមត្ថកិច្ចចាប់ខ្លួនកាលពីថ្ងៃទី៣ ខែ សីហាពាក់ព័ន្ធការផលិតគ្រឿងញៀន។ រីឯ លោក កឹម សុខា ប្រធានគណបក្សសង្គ្រោះជាតិ ក៏កំពុងជាប់ឃុំនៅពន្ធនាគារត្រពាំងផ្លុង ក្រោមបទចោទពាក់ព័ន្ធនឹងអំពើក្បត់ជាតិ ឃុបឃិតនឹងបរទេស។ លើសពីនេះគណបក្សប្រជាជនកម្ពុជា ដែលកាន់អំណាចក៏កំពុងដំណើរការផ្លូវច្បាប់ឆ្ពោះទៅរំលាយគណបក្សសង្គ្រោះជាតិ និងប៉ុនប៉ងរឹបអូសអាសនៈសភាគណបក្សនេះ ទៅបែងចែងអោយគណបក្សផ្សេងថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។