លេខាគណៈកម្មការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថាខុមហ្វ្រែល (COMFREL) ខេត្តរតនគិរី លោក ជួន ភីនណារ៉ា មានប្រសាសន៍បញ្ជាក់ថា តំបន់ដាច់ស្រយាលក្នុងភូមិចំនួន៣ គឺភូមិស្រែពកធំ ស្រែពកតូច និងភូមិនាងដី ក្នុងឃុំសេរីមង្គល ស្រុកកូនមុំ មានសកម្មភាពមេភូមិ មេឃុំ ក្រុមប្រឹក្សាឃុំ និងក្រុមហ៊ុនសម្បទានសេដ្ឋកិច្ចវៀតណាម ឈ្មោះ ហ័ងអាញ់ លំផាត់ នៅព្រឹកថ្ងៃទី២៨ ខែមិថុនា បានចែកអំណោយដល់ប្រជាពលរដ្ឋជិត ៥០០គ្រួសារ។ ប្រជាពលរដ្ឋក្នុង១គ្រួសារទទួលបានអង្ករ ៥០គីឡូក្រាម ស្ករស ២គីឡូក្រាម អំបិល ២គីឡូក្រាម។
លោកបន្តថា មន្ត្រីមូលដ្ឋានខ្លះបានពាក់មួកមានស្លាកសញ្ញាគណបក្សប្រជាជន ក្នុងពិធីចែកអំណោយនោះទៀតផង៖ «ពីបទទិញដូរសន្លឹកឆ្នោត អាជ្ញាធរគាត់ចែកហ្នឹង គាត់ពាក់មួកគណបក្សប្រជាជន គាត់ឈរចែក។ ក្នុងផ្លូវច្បាប់រាល់អំណោយរាល់សកម្មភាពទាំងឡាយដែលពាក់ព័ន្ធដំណើរការបោះឆ្នោត គឺគេមិនឲ្យមានការចែកអំណោយសព្វតាំងពីលុយកាក់ តាំងពីសម្ភារៈអ្វីផ្សេងៗ»។
ប្រធានគណៈកម្មការខេត្តរៀបចំការបោះឆ្នោត ហៅកាត់ថាប៉ិច (PEC) លោក ប៉ែន ឈុនឌី មានប្រសាសន៍បញ្ជាក់ថា លោកមិនទាន់ទទួលបានសេចក្តីរាយការណ៍ពីករណីនេះនៅឡើយ។ យ៉ាងនេះក្តី លោកបានអះអាងថា ច្បាប់មិនអនុញ្ញាតឲ្យចែកអំណោយក្នុងថ្ងៃឃោសនាបោះឆ្នោតទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។