ប្រមុខរដ្ឋាភិបាល លោក ហ៊ុន សែន ប្រធានសភា លោក ហេង សំរិន ប្រធានព្រឹទ្ធសភា លោក សាយ ឈុំ និងរដ្ឋមន្ត្រីក្រសួងមហាផ្ទៃ លោក ស ខេង ជួបអ្នកសង្កេតការណ៍បោះឆ្នោតអន្តរជាតិចំនួន ៣ក្រុម នៅថ្ងៃទី៣ ខែមិថុនា។
ក្រុមអ្នកសង្កេតការណ៍អន្តរជាតិទាំង ៣ក្រុមនោះមានអ្នកសង្កេតការណ៍សរុបចំនួន ៣០នាក់។
អ្នកសង្កេតការណ៍ទាំងនោះមកពីសន្និសីទអន្តរជាតិនៃគណបក្សនយោបាយនៅអាស៊ី (ICAPP) អង្គការអ្នកប្រជាធិបតេយ្យនិយមកណ្ដាលអាស៊ីប៉ាស៊ីហ្វិក (CAPDI) និងអង្គការអ្នកប្រជាធិបតេយ្យនិយមកណ្ដាលអន្តរជាតិ (CDI)។ ក្រុមនេះដឹកនាំដោយអតីតប្រធានាធិបតីនៃប្រទេសកូឡុំប៊ី (Colombia) លោក អាន់ដ្រេ ប៉ាស្ត្រាណា (Andre Pastrana) ដែលជាប្រធាន ICAPP។
លោកនាយករដ្ឋមន្ត្រី ហ៊ុន សែន បានសរសេរនៅលើហ្វេសប៊ុក (Facebook) របស់លោកនៅថ្ងៃទី៣ ខែមិថុនា ថា កម្ពុជាអញ្ជើញក្រុមអ្នកសង្កេតការណ៍ទាំងនេះ គឺធ្វើយ៉ាងណាអោយបានឃើញភាពជាក់ស្ដែងអំពីដំណើរការបោះឆ្នោត ដែលនឹងប្រព្រឹត្តទៅនៅថ្ងៃទី៤ ខែមិថុនា។
លោក អាន់ដ្រេ ប៉ាស្ត្រាណា បានប្រាប់លោក ហ៊ុន សែន ដែរថា ពួកគេមានបំណងសិក្សាបទពិសោធន៍ពីការបោះឆ្នោតនៅកម្ពុជា។
ក្រុមអង្គការសង្គមស៊ីវិលផ្នែកបោះឆ្នោតធ្លាប់រិះគន់ថា របាយការណ៍ដែលបានពីក្រុមអ្នកសង្កេតការណ៍ទាំងនេះអាចពិបាកនឹងជឿទុកចិត្ត ដ្បិតការចំណាយទៅលើការស្នាក់នៅ ម្ហូបអាហារ និងថ្លៃធ្វើដំណើររបស់ពួកគេគឺរ៉ាប់រងដោយរដ្ឋាភិបាលកម្ពុជា ដែលគ្រប់គ្រងដោយគណបក្សប្រជាជនកម្ពុជា ជាភាគីប្រកួតប្រជែងនៅក្នុងការបោះឆ្នោតដែរ។
ក្រុមអ្នកសង្កេតការណ៍អន្តរជាតិទាំង ៣ក្រុមនោះ នឹងធ្វើសន្និសីទព័ត៌មានពីការសង្កេតការណ៍បោះឆ្នោតនៅកម្ពុជានេះ នៅម៉ោង ៤រសៀល ថ្ងៃទី៤ ខែមិថុនា នៅសណ្ឋាគារសូហ្វីតែល ភ្នំពេញ ភូកិត្រា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។