លោកនាយករដ្ឋមន្ត្រី ហ៊ុន សែន ប្រកាសថា គណបក្សប្រជាជនកម្ពុជា ដែលទទួលបានអាសនៈច្រើននាំមុខក្នុងការបោះឆ្នោត នឹងអាចបង្កើតរដ្ឋាភិបាលដោយងាយ បើទោះបីជាគណបក្សសង្គ្រោះជាតិ ពហិការមិនចូលរួមកិច្ចប្រជុំសភាលើកដំបូងក៏ដោយ។
ថ្លែងនៅក្នុងពេលចុះជួបប្រជាពលរដ្ឋនៅក្នុងស្រុកកណ្ដាលស្ទឹង ខេត្តកណ្ដាល នៅព្រឹកថ្ងៃទី២ ខែសីហា លោក ហ៊ុន សែន មានប្រសាសន៍ថា ការបង្កើតក្បាលម៉ាស៊ីនដឹកនាំប្រទេស ទាំងរដ្ឋសភា និងរដ្ឋាភិបាល នឹងមិនជាប់គាំងឡើយ។ លោក ហ៊ុន សែន សម្អាងថា រដ្ឋធម្មនុញ្ញដែលបានឆ្លងកាត់វិសោធនកម្មជាច្រើនសា និងនៅមានសុពលភាពក្នុងពេលបច្ចុប្បន្ន បានធានាថា គណបក្សដែលទទួលបានសំឡេងគាំទ្រដាច់ខាត អាចចាប់ផ្ដើមកិច្ចប្រជុំសភាជាលើកដំបូងបានដោយពុំចាំបាច់ត្រូវការសំឡេង ២ភាគ៣ ឡើយ។
ការអះអាងរបស់លោកនាយករដ្ឋមន្ត្រី ហ៊ុន សែន ធ្វើបន្ទាប់ពីមានការវែកញែកនៅក្នុងចំណោមអ្នកច្បាប់ និងមន្ត្រីនៃគណបក្សប្រឆាំង ដែលថា ការបង្កើតរដ្ឋាភិបាលថ្មីនៅក្រោយការបោះឆ្នោតអាណត្តិទី៥ នេះ អាចនឹងជាប់គាំង ក៏ដោយសារតែសភាពុំអាចបើកការប្រជុំលើកដំបូងរបស់ខ្លួនបាន។ លោក ហ៊ុន សែន បានជំរុញអោយគណបក្សប្រឆាំង ត្រូវចូលរួមកិច្ចប្រជុំសភាទៅតាមការកោះហៅរបស់ព្រះមហាក្សត្រ។
អនុប្រធានគណបក្សសង្គ្រោះជាតិ លោក កឹម សុខា មានប្រសាសន៍ថា យ៉ាងណា រដ្ឋសភាត្រូវការវត្តមានសមាជិកទាំងអស់ ដើម្បីដំណើរការកិច្ចប្រជុំលើកដំបូងរបស់ខ្លួន។ លោក កឹម សុខា បន្តថា ផ្លូវច្បាប់ គឺពុំមានចំណុចណាមួយដែលបញ្ជាក់ថា គេអាចដកហូតអាសនៈសមាជិកសភារបស់គណបក្សណាមួយឡើយ។
នៅក្នុងមាត្រា ៨២ថ្មីនៃរដ្ឋធម្មនុញ្ញ បានចែងថា រដ្ឋសភាបើកសម័យប្រជុំដំបូង ៦០ថ្ងៃយ៉ាងយូរ ក្រោយការបោះឆ្នោតតាមការកោះប្រជុំរបស់ព្រះមហាក្សត្រ។ រដ្ឋសភាត្រូវប្រកាសសុពលភាពនៃអាណត្តិរបស់សមាជិកនីមួយៗ ត្រូវបោះឆ្នោតជ្រើសរើសដាច់ដោយឡែកពីគ្នានូវប្រធាន អនុប្រធានរដ្ឋសភា និងសមាជិកទាំងអស់នៃគណៈកម្មការនានារបស់រដ្ឋសភា ដោយមតិភាគច្រើនដាច់ខាតនៃចំនួនសមាជិករដ្ឋសភាទាំងមូល។
ទាក់ទិននឹងទិដ្ឋភាពច្បាប់ ក្រុមអង្គការមិនមែនរដ្ឋាភិបាលលើកឡើងថា គ្រប់ភាគីអាចបកស្រាយទៅតាមការយល់ឃើញរៀងៗខ្លួន ប៉ុន្តែត្រូវតម្កល់ផលប្រយោជន៍ជាតិ និងសំឡេងរបស់ពលរដ្ឋជាធំ។ ករណីនេះ អង្គការមិនមែនរដ្ឋាភិបាល អំពាវនាវអោយមានការសម្របសម្រួលដោះស្រាយបញ្ហាដោយសន្តិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។