ក្រុមអ្នកឃ្លាំមើលស្ថានការណ៍សង្គម អះអាងថា ការគំរាមរបស់ លោក ហ៊ុន សែន អំពីមហន្តរាយសង្គមនឹងកើតមានពេលអវត្តមានរូបលោកនោះ គឺជាការបង្ហាញអំពីការមើលស្រាលព្រះរាជតួនាទីរបស់ព្រះមហាក្សត្រ ក្នុងការធានាស្ថិរភាពសង្គម និងជាការបំបាក់ស្មារតីរបស់រាស្ត្រឲ្យភ័យខ្លាច ចំពោះសង្គ្រាមក្នុងស្រុក ដើម្បីផលប្រយោជន៍ផ្ទាល់ខ្លួន។
អ្នកវិភាគអំពីការអភិវឌ្ឍសង្គម លោក កែម ឡី បានសម្ដែងការមិនពេញចិត្តចំពោះប្រសាសន៍របស់លោកនាយករដ្ឋមន្ត្រី ហ៊ុន សែន ដែលថា ប្រសិនបើរូបលោកស្លាប់មែន ប្រទេសនឹងជួបភាពចលាចលនោះ គឺកំពុងយកប្រជាពលរដ្ឋខ្មែរ និងក្រុមគ្រួសារខ្លួនឯង ធ្វើជាចំណាប់ខ្មាំងនៃការគ្រប់គ្រងអំណាច។
លោក កែម ឡី បន្តថា ការគំរាមរបស់ លោក ហ៊ុន សែន គឺធ្វើឡើងដោយខ្វះការទទួលខុសត្រូវ និងជាការបង្ហាញនូវភាពទន់ខ្សោយរបស់គណៈរដ្ឋមន្ត្រី។
ប្រតិកម្មនេះធ្វើឡើងបន្ទាប់ពី លោក ហ៊ុន សែន ក្នុងពិធីចុះសួរសុខទុក្ខជនពិការនៅតំបន់កោះស្លា ស្រុកឈូក ខេត្តកំពត កាលពីថ្ងៃទី១០ ខែមិថុនា មានប្រសាសន៍គំរាមធ្ងន់ៗទៅលើក្រុមមេដឹកនាំបក្សប្រឆាំងថា ប្រសិនបើលោកស្លាប់មែននោះ ប្រទេសនឹងជួបភាពវឹកវរ ហើយក្រុមប្រឆាំងត្រូវត្រៀមខ្លួនរត់អោយហើយទៅ។
ទោះបីជាយ៉ាងណាក៏ដោយ លោក កែម ឡី អះអាងថា ដើម្បីឲ្យសង្គម និងក្រុមគ្រួសាររបស់ លោក ហ៊ុន សែន មានស្ថិរភាពទៅបាននោះ លុះត្រាមេដឹកនាំប្រទេសត្រូវធ្វើឲ្យប្រព័ន្ធតុលាការមានភាពឯករាជ្យ ធ្វើឲ្យរដ្ឋសភាឯករាជ្យ និងរដ្ឋាភិបាលឯករាជ្យ។ លោកបន្តថា ការគំរាមដ៏ធ្ងន់ធ្ងររបស់ លោក ហ៊ុន សែន អំពីមហន្តរាយសង្គមអាចនឹងកើតមាន ប្រសិនបើលោកអស់ជីវិតនោះ គឺជាការមើលស្រាលមួយទៅលើព្រះរាជតួនាទីរបស់ព្រះមហាក្សត្រ ក្នុងការធានានូវស្ថិរភាពសង្គម និងជាការបង្ហាញឲ្យឃើញថា ការគ្រប់គ្រងប្រទេសរបស់គណបក្សប្រជាជនកម្ពុជា ក្រោមការដឹកនាំរបស់ លោក ហ៊ុន សែន ជាច្រើនឆ្នាំកន្លងមកនេះ មិនបានជួយបង្កើតអោយកម្ពុជា មានគោលការណ៍និរន្តរភាព ឬការផ្ទេរអំណាចដោយសន្តិវិធីឡើយ។
ការអះអាងរបស់ លោក កែម ឡី ធ្វើឡើងនៅក្នុងវេទិកាអ្នកស្ដាប់វិទ្យុអាស៊ីសេរី ក្នុងទីក្រុងភ្នំពេញកាលពីយប់ថ្ងៃព្រហស្បតិ៍។ នេះមិនមែនជាការគំរាមលើកទីមួយរបស់ លោក ហ៊ុន សែន នោះទេ។ ជារឿយៗ លោកតែងគំរាមថា ប្រសិនបើគណបក្សប្រជាជនកម្ពុជា ដែលកំពុងដឹកនាំនេះចាញ់ការបោះឆ្នោតជាតិឆ្នាំ២០១៣ នោះនឹងមានសង្គ្រាមក្នុងស្រុកកើតឡើង។
កន្លងមក លោក ប្រ៊ែដ អាដាម (Brad Adams) នាយកប្រតិបត្តិនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃ វ៉ច្ឆ (Human Rights Watch) ធ្លាប់មានប្រសាសន៍ថា លោក ហ៊ុន សែន តែងគិតថា លោក និងបក្ខពួកគ្រួសាររបស់លោកជាម្ចាស់របស់ប្រទេសកម្ពុជា។
សាស្ត្រាចារ្យខាងផ្នែកវិទ្យាសាស្ត្រនយោបាយ លោកបណ្ឌិត សុខ ទូច បានហៅការគ្រប់គ្រងអំណាចនៅកម្ពុជា កន្លងមក ជាការគ្រប់គ្រងបែបអំណាចទេវរាជ ឬជាការប្រើអំណាចអញនិយម ដែលធ្វើឲ្យមានសង្គ្រាមស៊ីវិល មានបដិវត្តន៍ ឬរដ្ឋប្រហារជាច្រើនកើតឡើងមិនចេះចប់។ លោកបណ្ឌិត សុខ ទូច អះអាងថា អំណាចដែលកើតចេញពីការបោះឆ្នោតដោយលទ្ធិប្រជាធិបតេយ្យ ខុសគ្នាពីអំណាចដែលដណ្ដើមពីការធ្វើសង្គ្រាមទាំងនោះ។
ទាក់ទិននឹងបញ្ហានេះដែរ លោក កែម ឡី បានផ្តល់អនុសាសន៍ដល់ លោក ហ៊ុន សែន ថា ដើម្បីការពារកុំឲ្យមានស្ថានភាពវឹកវរក្រោយពេលអវត្តមានលោកជាអចិន្ត្រៃយ៍មែននោះ លោក ហ៊ុន សែន គួរផ្ទេរអំណាចដោយសន្តិវិធីជាមុន។ ជាមួយគ្នានេះដែរ លោកបណ្ឌិត សុខ ទូច បានជំរុញឲ្យ លោក ហ៊ុន សែន គួរចូលនិវត្តន៍ ហើយថែរក្សាសុខភាពដើម្បីក្រុមគ្រួសាររបស់លោកទៅវិញប្រសើរជាង។ ពាក្យចចាមអារ៉ាមជាច្រើនរាលសុះសាយសឹងទូទាំងពិភពលោក កាលពីសប្ដាហ៍កន្លងទៅនេះថា លោកនាយករដ្ឋមន្ត្រី ហ៊ុន សែន ស្លាប់ដោយជំងឺដាច់សរសៃឈាម បន្ទាប់ត្រូវបានបញ្ជូនទៅព្យាបាលនៅប្រទេសសិង្ហបុរី ហើយក្រោយមក លោក ហ៊ុន សែន បានលេចមុខជាសាធារណៈ ដោយខឹងសម្បារយ៉ាងខ្លាំងទៅលើក្រុមបក្សប្រឆាំង ចោទថាជាអ្នកបង្កើតព័ត៌មានមិនពិតនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។