នៅទីបំផុតគណបក្សប្រជាជនកម្ពុជា របស់លោក ហ៊ុន សែន បានទទួលជ័យជំនះលើការបោះឆ្នោតអសកល គឺបោះឆ្នោតជ្រើសតាំងសមាជិកព្រឹទ្ធសភាភ្ល្លូកទឹកភ្លូកដី តាមផែនការគ្រោងទុកដោយគ្មានដៃគូប្រកួតប្រជែងដ៏ធំចូលរួមនោះ។ គណបក្សកាន់អំណាចបានអាសនៈព្រឹទ្ធសភាទាំងស្រុងនៃការបោះឆ្នោតព្រឹទ្ធសភា នៅគ្រាដែលគណបក្សតូចៗ បីផ្សេងទៀត គ្មានអង្គបោះឆ្នោតគ្រប់គ្រាន់សម្រាប់ទទួលបានអាសនៈព្រឹទ្ធសភានោះ។
លទ្ធផលបោះឆ្នោតអសកលគឺបោះឆ្នោតព្រឹទ្ធសភានីតិកាលទី៤នេះ គ្មានការតវ៉ា ឬព័ត៌មានពីភាពមិនប្រក្រតីអ្វីកើតឡើងនៅថ្ងៃបោះឆ្នោតឡើយ ដោយសារតែគណបក្សប្រជាជនកម្ពុជា គ្មានគូប្រកួតដែលលមានកម្លាំងប្រហាក់ប្រហែលគ្នាចូលរួម។
សម្រាប់គូប្រកួតបីទៀត គឺគណបក្សហ្វ៊ុនស៊ិនប៉ិច របស់ព្រះអង្គម្ចាស់នរោត្តម រណឫទ្ធិ ទើបតែរីកមុខមាត់ឡើងវិញនៅក្នុងសភា ក្រោយពីលោក ហ៊ុន សែន បានចែកអាសនៈរបស់គណបក្សប្រឆាំងជូនគណបក្សខ្មែររួបរួមជាតិ របស់លោក ញឹក ប៊ុនឆៃ កំពុងជាប់ឃុំឃាំង និងគណបក្សថ្មីថ្មោងគ្មានសំឡេង ឬអង្គបោះឆ្នោតទាល់តែសោះរបស់លោក ពេជ្រ ស្រស់ នោះ ត្រូវបានគេមើលឃើញថា គ្រាន់តែជាគណបក្សដែលចូលរួមដើម្បីបង្គ្រប់កិច្ចឲ្យគេមើលឃើញថា មានគណបក្សចម្រុះចូលរួមបោះឆ្នោតតែប៉ុណ្ណោះ ព្រោះថា គណបក្សទាំងបីនេះ គ្មានអង្គបោះឆ្នោតគ្រប់គ្រាន់ដើម្បីទទួលកៅអីនៅក្នុងព្រឹទ្ធសភាឡើយ។
សមាជិកព្រឹទ្ធសភារបស់គណបក្ស សម រង្ស៊ី លោក សោ ចាន់ដេត មានប្រសាសន៍កាលពីថ្ងៃទី២៦ ខែកុម្ភៈ ថា សមាជិកសភាថ្មីចាប់ពីពេលនេះតទៅគ្មានភាពស្របច្បាប់ និងគ្មានន័យសម្រាប់ស្ថាប័ននីតិប្បញ្ញត្តិ ដែលជាស្ថាប័នកំពូលរបស់របស់ជាតិទៀតហើយ ព្រោះថា របបរបស់លោក ហ៊ុន សែន បានធ្វើអ្វីៗសព្វបែបយ៉ាងដើម្បីបន្តកាន់កាប់ ក្ដោបក្ដាប់អំណាចតទៅមុខទៀត គឺក្ដោបក្ដាប់អំណាចនីតិប្រតិបត្តិ នីតិប្បញ្ញត្តិ និងអំណាចតុលាការ។ លោកបញ្ជាក់ថា តួនាទីរបស់ស្ថាប័នព្រឹទ្ធសភាបីសំខាន់ៗ តួនាទីនីតិកម្ម ការធ្វើច្បាប់ និងអនុម័តច្បាប់ តួនាទីត្រួតពិនិត្យការអនុវត្តរបស់រដ្ឋាភិបាល និងតួនាទីជាអ្នកតំណាងប្រជាពលរដ្ឋមានសារសំខាន់ណាស់ តែផ្ទុយទៅវិញស្ថាប័ននេះ គ្មានអនុវត្តទៅតាមតួនាទីរបស់ខ្លួនឡើយ៖ «»។
លទ្ធផលបោះឆ្នោតព្រឹទ្ធសភាកាលពីថ្ងៃអាទិត្យ ទី២៥ ខែកុម្ភៈ នេះ គឺគណបក្សប្រជាជនទទួលបាន៥៨ អាសនៈទាំងស្រុង ក្រៅពីចំនួន ៤អាសនៈទៀត ត្រូវបានចាត់តាំងដោយព្រះមហាក្សត្រ និងជ្រើសតាំងពីសភាតាមមតិភាគច្រើនដាច់ខាត។ ក៏ប៉ុន្តែអ្នកឃ្លាំមើលការបោះឆ្នោតលើកឡើងថា បើសិនជាគណបក្សសង្គ្រោះជាតិ បានចូលរួមនៅក្នុងការបោះឆ្នោតសមាជិកព្រឹទ្ធសភានេះដែរនោះ គឺគណបក្សប្រជាជនកម្ពុជា ទទួលបានតែ ៣៣អាសនៈប៉ុណ្ណោះ រីឯគណបក្សសង្គ្រោះជាតិ នឹងទទួលបាន ២៥អាសនៈ នេះបើយោងតាមសមាជិកក្រុមប្រឹក្សាឃុំ-សង្កាត់ សមាជិកស្រុក-ខណ្ឌ និងសមាជិកក្រុមប្រឹក្សាខែត្រ-រាជធានី ដែលជាអង្គបោះឆ្នោតរបស់គណបក្សទាំងពីរដែលមានរៀងៗខ្លួនស្រាប់។
អតីតមន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត លោក រ៉ុង ឈុន អះអាងថា ការបោះឆ្នោតព្រឹទ្ធសភានេះ គឺធ្វើឡើងផ្ទុយពីច្បាប់ស្ដីពីការរៀបចំការបោះឆ្នោត និងរដ្ឋធម្មនុញ្ញ ព្រោះការបោះឆ្នោតនេះ មិនមែនកើតចេញឆន្ទៈប្រជាពលរដ្ឋទេ ហើយម្យ៉ាងទៀត ស្ថាប័នគណៈកម្មាធិការជាតិរៀបចំការបោះឆ្នោត (គ.ជ.ប) ក៏មិនមែនជាស្ថាប័នស្របច្បាប់ដែរ ព្រោះថា នៅក្នុងច្បាប់ស្ដីពីការរៀបចំនិងការប្រព្រឹត្តទៅនៃការបោះឆ្នោត ស្ថាប័ន គ.ជ.ប កើតចេញពីរូបមន្ត ៤-៤-១ នៃគណបក្សជាប់ឆ្នោតកាលពីឆ្នាំ២០១៣ គឺ ៤រូប ជ្រើសចេញពីគណបក្សប្រជាជនកម្ពុជា ៤រូប ជ្រើសចេញពីគណបក្សសង្គ្រោះជាតិ និងមួយរូបទៀតជ្រើសចេញពីអង្គការក្រៅរដ្ឋាភិបាល៖ «»។
ក៏ប៉ុន្តែទោះបីជាយ៉ាងនេះក្ដី សភាគណបក្សប្រជាជនកម្ពុជា បានធ្វើវិសោធនកម្មច្បាប់ចំនួន៤ ទាក់ទងនឹងការបោះឆ្នោតដែលគេមើលឃើញថា លោក ហ៊ុន សែន ធ្វើវិសោធនកម្មច្បាប់ទាំង៤ នោះ ដើម្បីរំលាយគណបក្សប្រឆាំងកាលពីឆ្នាំ២០១៧។
ទាក់ទងនឹងបញ្ហានេះ លោក សោ ចាន់ដេត បញ្ជាក់ថា លោក ហ៊ុន សែន ប្រើច្បាប់គណបក្សយកមកអនុវត្តដើម្បីរំលាយគណបក្សសង្គ្រោះជាតិ។ លោកបញ្ជាក់ថា ច្បាប់ទាំង៤ ដែលសភារបស់គណបក្សកាន់អំណាចបានកែប្រែនោះ មិនមែនជាច្បាប់ប្រើប្រាស់ដើម្បីបម្រើដោយស្មើភាព និងផលប្រយោជន៍ជាតិឡើយ៖ «»។
លោក សោ ចាន់ដេត បញ្ជាក់ទៀតថា របបលោក ហ៊ុន សែន បច្ចុប្បន្នប្រៀបដូចជារបបខ្មែរក្រហមដូច្នោះដែរ ទោះបីជារបបក្រុងភ្នំពេញ មិនបានសម្លាប់មនុស្សដូចរបប ប៉ុល ពត ក្ដី ប៉ុន្តែរបបលោក ហ៊ុន សែន បានសម្លាប់សេដ្ឋកិច្ចប្រជាពលរដ្ឋ ចាប់ចងអ្នកមានមតិផ្ទុយពីខ្លួន ហើយចាត់ទុកពួកគេជាសត្រូវ ឬក្រុមបដិវត្តន៍ពណ៌ បិទសិទ្ធិសេរីភាពពលរដ្ឋសព្វបែបយ៉ាងឲ្យមានសកម្មភាពអ្វីឡើយ ក៏ប៉ុន្តែសំដែងសុទិដ្ឋិនិយមថា របបផ្ដាច់ការរបស់លោក ហ៊ុន សែន នេះនឹងមិនបានយូរអង្វែងឡើយ ពលរដ្ឋនឹងរើបម្រាស់ប្រឆាំងនឹងរបបជិះជាន់នេះមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។