រដ្ឋាភិបាលកម្ពុជាបានស្នើឲ្យរដ្ឋាភិបាលនៃប្រទេសឥណ្ឌា បញ្ជូនអ្នកអង្កេតការណ៍បោះឆ្នោតមកកម្ពុជា។ លោក ហ៊ុន សែន សរសេរនៅលើទំព័រហ្វេសប៊ុក (Facebook) របស់លោកថា រដ្ឋាភិបាលកម្ពុជាបានស្នើឲ្យប្រទេសឥណ្ឌា បញ្ជូនអ្នកសង្កេតការណ៍បោះឆ្នោតរបស់ខ្លួន ទៅពិនិត្យ និងតាមដានអំពីការបោះឆ្នោត នៅកម្ពុជា នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ដោយសារឥណ្ឌាជាប្រទេសប្រជាធិបតេយ្យដ៏ធំមួយ ដែលអាចវាយតម្លៃបានអំពីការបោះឆ្នោត នៅកម្ពុជាអំពីភាពសេរី ត្រឹមត្រូវ និងយុត្តិធម៌ ក្នុងពេលបោះឆ្នោតខាងមុខនេះ។ ការស្នើរបស់លោក ហ៊ុន សែន ធ្វើឡើងនៅក្នុងកិច្ចពិភាក្សាជាមួយ អ្នកស្រី ស៊ុសស្មា ស្វារ៉ាជ (Sushma Swaraj) រដ្ឋមន្ត្រីក្រសួងការបរទេសឥណ្ឌា កាលពីថ្ងៃទី២៧ ខែមករា កន្លងទៅនេះ។
កន្លងមកលោក ហ៊ុន សែន ក៏ធ្លាប់បានទិញចំនួន Like ដ៏ច្រើនសន្ធឹក សន្ធាប់ពីប្រទេសឥណ្ឌាដែរ ដើម្បីបង្ហាញសាធារណជនថាលោក មានការគាំទ្រខ្លាំងពីក្រុមអ្នកប្រើប្រាស់បណ្ដាញសង្គមហ្វេសប៊ុក។ ក្រោយពីការទិញចំនួន Like ដ៏ច្រើននេះរួចមក នៅខែមេសា ឆ្នាំ២០១៦ លោកហ៊ុន សែន បានប្រកាសតែងតាំងខ្លួនជាអធិរាជហ្វេសបុក ហើយនៅពេលនោះលោក រំពឹងថា នឹងមានចំនួន Likes នៅលើហ្វេសប៊ុករបស់លោក កើនឡើងដល់បួនលាននាក់។
ពាក់ព័ន្ធនឹងការស្វែងរកភាពស្របច្បាប់នៃការបោះឆ្នោតជាតិនៅខែកក្កដា ខាងមុខនេះ ប្រទេសចិនដែលជាប្រទេសកុម្មុយនិស្តគ្មានបទពិសោធន៍ក្នុងការបោះឆ្នោតបន្តិចណាសោះនោះ បានសន្យាថានឹងបញ្ជូនក្រុមអ្នកអង្កេតការណ៍បោះឆ្នោតរបស់ខ្លួនមកកម្ពុជា ហើយដែលមន្ត្រីជាន់ខ្ពស់នៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ធ្លាប់សម្ដែងការអស់សំណើច ជាខ្លាំងចំពោះប្រទេសកុម្មុយនិស្តមកឃ្លាំមើលដំណើរការប្រជាធិបតេយ្យនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។