លោក ហ៊ុន សែន ទៅធ្វើទស្សនកិច្ចនៅទ្វីបអឺរ៉ុប
2014.04.20
លោក ហ៊ុន សែន ថ្លែងក្នុងកិច្ចពិភាក្សារវាងរដ្ឋាភិបាល និងវិស័យឯកជន លើកទី១៧ ដើម្បីដោះស្រាយបញ្ហាក្នុងការធ្វើជំនួញនៅប្រទេសកម្ពុជា នាវិមានសន្តិភាព នៅថ្ងៃទី៤ ខែមីនា ឆ្នាំ២០១៤។
លោកនាយករដ្ឋមន្ត្រី ហ៊ុន សែន បំពេញទស្សនកិច្ចទៅកាន់ទ្វីបអឺរ៉ុបជាលើកទី១ បន្ទាប់ពីការបោះឆ្នោតអាណត្តិទី៥។ ទស្សនកិច្ចផ្លូវការនេះ ចាប់ពីថ្ងៃទី២០ ដល់ថ្ងៃទី២៦ ខែមេសា។
លោក ហ៊ុន សែន និងគណៈប្រតិភូនឹងធ្វើដំណើរទៅកាន់ប្រទេសអាហ្សេបៃហ្សង់ (Azerbaijan) និងប្រទេសបេឡារូស (Belarus)។
មន្ត្រីជាន់ខ្ពស់រដ្ឋាភិបាល លោក ស្រ៊ី ថាមរុង្គ មានប្រសាសន៍ប្រាប់អ្នកកាសែតថា លោក ហ៊ុន សែន នឹងជួបពិភាក្សាការងារជាមួយនាយករដ្ឋមន្ត្រី និងប្រធានរដ្ឋសភាអាហ្សេបៃហ្សង់ ចាប់ពីថ្ងៃទី២១ ដល់ថ្ងៃទី២៣ ខែមេសា ដោយខ្លឹមសារសំខាន់គឺការចុះអនុស្សរណៈយោគយល់គ្នាស្ដីពីកិច្ចការពង្រឹងទំនាក់ទំនងការទូតរវាងប្រទេសទាំងពីរ។
ចំពោះដំណើរទៅកាន់ប្រទេសបេឡារូសវិញ ប្រមុខរដ្ឋាភិបាលកម្ពុជា នឹងពិភាក្សាជាមួយប្រធានាធិបតី និងរដ្ឋសភាប្រទេសបេឡារូស ព្រមទាំងធ្វើជាសាក្សីក្នុងពិធីចុះហត្ថលេខាលើកិច្ចសន្យាសហការគ្នារវាងវិស័យមួយចំនួននៃប្រទេសទាំងពីរទៀតផង។
ទស្សនកិច្ចរបស់នាយករដ្ឋមន្ត្រីកម្ពុជានេះ ធ្វើឡើងស្របពេលដែលមេដឹកនាំគណបក្សសង្គ្រោះជាតិ លោក សម រង្ស៉ី កំពុងធ្វើទស្សនកិច្ចនៅក្នុងសហគមន៍អឺរ៉ុប ក្នុងទ្វីបអឺរ៉ុបដូចលោក ហ៊ុន សែន ដែរ។
ទាក់ទងនឹងបញ្ហានេះ អ្នកជំនាញវិទ្យាសាស្ត្រនយោបាយ លោកបណ្ឌិត សុខ ទូច មានប្រសាសន៍ថា អ្នកនយោបាយកម្ពុជា កំពុងស្វែងរកផលចំណេញផ្នែកនយោបាយរៀងៗខ្លួន។ លោកបន្តថា លោកនាយករដ្ឋមន្ត្រី ហ៊ុន សែន ទៅកាន់ប្រទេសដែលជាស្ថិតក្រោមអតីតសហភាពសូវៀត ដើម្បីប្រយោជន៍ការទូត និងនយោបាយ ហើយលោក ហ៊ុន សែន ក៏អាចរៀនសូត្រមេរៀននយោបាយដ៏រឹងមាំពីប្រធានាធិបតីបេឡារូសដែរ។ ចំពោះទស្សនកិច្ចរបស់លោក សម រង្ស៉ី វិញ ជាដំណើរស្វែងរកផលប្រយោជន៍នយោបាយដូចគ្នា។
លោក សម រង្ស៉ី នឹងស្នើឲ្យសហគមន៍អឺរ៉ុបជួយដាក់សម្ពាធមកលើកម្ពុជា ក្នុងបញ្ហានយោបាយ។ លោកសន្និដ្ឋានថា អ្នកនយោបាយកំពូលរបស់កម្ពុជា ទៅកាន់ទ្វីបអឺរ៉ុបដូចគ្នាមែន តែមិនអាចមានឱកាសជួបគ្នាទេ។
លោក សុខ ទូច៖ «សម្ដេចនាយករដ្ឋមន្ត្រីទៅគាត់អាចរៀនសូត្រពីប្រធានាធិបតីបេឡារូស ថាធ្វើម៉េចអាចរក្សាអំណាចបាន ហើយគណបក្សប្រឆាំងហ្នឹងទៅសហគមន៍អឺរ៉ុបនេះ កុំឲ្យសហគមន៍អឺរ៉ុបហ្នឹងមានការជ្រោមជ្រែងណាមួយ បើគ្មានការដោះស្រាយ។ ទឹកដីបេឡារូស អាចទទួលលោក សម រង្ស៉ី ហើយលោក សម រង្ស៉ី ក៏មិនទៅទីនោះដែរ ចំណែកលោក ហ៊ុន សែន វិញ ក៏រវល់ជាមួយប្រទេសម្ចាស់ផ្ទះដែរ»។
លោកនាយករដ្ឋមន្ត្រី ហ៊ុន សែន និងលោក សម រង្ស៉ី កាលពីមុនថ្ងៃចូលឆ្នាំបានពិភាក្សាគ្នាតាមទូរស័ព្ទរយៈពេលជិត ៥០នាទី។ ខ្លឹមសារសំខាន់ គឺពិភាក្សាពីការកែទម្រង់ការបោះឆ្នោត និងដោះស្រាយភាពមិនចុះសម្រុងគ្នាលើបញ្ហានយោបាយ ប៉ុន្តែមកដល់ពេលនេះ មិនមានការព្រមព្រៀងគ្នាណាមួយជាថ្មីនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា