សារនយោបាយបែបសច្ចាមួយរបស់លោកនាយករដ្ឋមន្ត្រី ហ៊ុន សែន នៅចុងឆ្នាំ២០១៥ គឺការកាត់ដៃចោល បើលោកចុះហត្ថលេខាលើលិខិតស្នើសុំលើកលែងទោសដល់ លោក សម រង្ស៊ី។ ប៉ុន្តែមន្ត្រីគណបក្សសង្គ្រោះជាតិ មើលឃើញថា ស្ថានការណ៍នយោបាយនៅកម្ពុជា តែងមិនទៀងទាត់។
មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ ចាត់ទុកស្ថានការណ៍នយោបាយនៅកម្ពុជា ថា តែងតែប្រែប្រួលស្មានមិនបាន។ លោក យឹម សុវណ្ណ លើកឡើងបែបនេះ ធ្វើឡើងភ្លាមៗបន្ទាប់ពី លោក ហ៊ុន សែន ប្ដេជ្ញាចិត្តនៅថ្ងៃទី២៨ ធ្នូ ថា នឹងកាត់ដៃលោកចោល បើសិនជាលោកចុះហត្ថលេខាលើកលែងទោសឲ្យអ្នកណាម្នាក់ដោយមិនសំដៅចំឈ្មោះក្ដី តែត្រូវគេមើលឃើញថា លោកចង់សំដៅទៅលើ លោក សម រង្ស៊ី។ លោក យឹម សុវណ្ណ ចាត់ទុកសារនយោបាយបែបនេះថា ជានយោបាយមិនទៀងទាត់៖ «បើយើងក្រឡេកមើលស្ថានការណ៍នយោបាយប៉ុន្មានឆ្នាំកន្លងមកនេះ ស្ថានការណ៍នយោបាយវិវឌ្ឍន៍ប្រែប្រួលទៅតាមពេលវេលា ទៅតាមឆន្ទៈរបស់ប្រជាពលរដ្ឋ ទៅតាមនិន្នាការនយោបាយរបស់សកលលោក។ ដូច្នេះ យើងមិនអាចទាយទុកជាមុនថា វានឹងវិវឌ្ឍន៍ដូចម្ដេចទេនៅពេលខាងមុខ»។
លោកនាយករដ្ឋមន្ត្រី ហ៊ុន សែន កន្លងមក ដែលតែងតែចុះហត្ថលេខាលើលិខិតលើកលែងទោសឲ្យ លោក សម រង្ស៊ី ចំនួនពីរលើកមកហើយនោះ បែរជាពេលនេះ លោកប្រកាសថា លោកនឹងកាត់ដៃចោលទៅវិញ៖ «ឥឡូវសុំកុំសង្ឃឹម។ ខ្ញុំប្រកាស បើខ្ញុំចុះហត្ថលេខាលើកទោសឲ្យនរណា ខ្ញុំនឹងកាត់ដៃស្ដាំខ្ញុំគ្រវាត់ចោល។ អ្នកឯងចាំទៅ។ មានឯងអត់អញ មានអញអត់ឯង គឺអ្នកឯងអ្នកដាក់។ អ្នកឯងធ្វើស្អីចំពោះខ្ញុំ? ហួសពេលហើយអូន។ ដល់តែត្រូវប៉ុន្មានកំផ្លៀងទៅ ទើបមកនិយាយបង្រួបបង្រួមជាតិ។ មានតែខ្មែរទេ ដែលអាចរួមបាននិយាយគ្នាបាន ពឹងបរទេសអត់បាន។ ប៉ុន្តែទៅពឹងអឺរ៉ុប ឲ្យកាត់ជំនួយ។ វាទៅជាអ៊ីចឹងទៅ។ ខ្ញុំប្រកាសជូនឲ្យហើយ ព្រោះលើកទីពីរហើយ។ លើកទីបី ហ៊ុន សែន នឹងកាត់ដៃខ្លួនឯងគ្រវាត់ចោល។ នេះជាសារចុងឆ្នាំ ប្រាប់ឲ្យហើយ។ អីក៏ខូចម្ល៉េះ!»។
ទោះបីជាសាររបស់ លោក ហ៊ុន សែន ដែលធ្វើឡើងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច នៅកោះពេជ្រ រាជធានីភ្នំពេញ មិនចំឈ្មោះនរណាម្នាក់ក្ដី ក៏សាច់រឿងនេះ គឺសំដៅលើប្រធានគណបក្សសង្គ្រោះជាតិ គឺលោក សម រង្ស៊ី។
លោក សម រង្ស៊ី កំពុងគេចពីការចាប់ខ្លួនរបស់រាជរដ្ឋាភិបាល ទាក់ទងនឹងរឿងក្ដីក្ដាំនៅតុលាការជាមួយរដ្ឋមន្ត្រីការបរទេស លោក ហោ ណាំហុង។ លោក ហ៊ុន សែន ថ្លែងថា រឿងក្ដីក្ដាំ លោក សម រង្ស៊ី ជាមួយរាជរដ្ឋាភិបាល បានដោះរួចហើយ ប៉ុន្តែរឿងបន្តទៀតនេះ លោកមិនអាចបំពានសិទ្ធិ លោក ហោ ណាំហុង បានទេ។
ទាក់ទងនឹងការគេចខ្លួនរបស់ លោក សម រង្ស៊ី នេះដែរ លោក ហ៊ុន សែន ប្រកាសថា នៅឆ្នាំ២០១៦ គណបក្សប្រជាជនកម្ពុជា នឹងធ្វើច្បាប់កំណត់ប្រធានគណបក្សនយោបាយ និងស្ថាប័នមួយចំនួន ឲ្យមានសញ្ជាតិតែមួយ៖ «ខាងគណបក្សប្រជាជន កំពុងតែគិតគូរ ដោយសារយើងមានច្បាប់មួយរួចទៅហើយ ប្រធាន និងសមាជិកគណៈកម្មាធិការជាតិរៀបចំការបោះឆ្នោត ត្រូវតែជាសញ្ជាតិខ្មែរ។ ដូច្នេះ ពេលខាងមុខ ច្បាប់ស្ដីពីបក្សនយោបាយ ចាំបាច់ត្រូវកំណត់ប្រធានបក្សនយោបាយ ត្រូវតែសញ្ជាតិខ្មែរតែមួយ ដើម្បីកុំឲ្យមានរឿងអី កាន់ប៉ាសស្ព័របរទេសរត់ ហើយបរទេសមកអន្តរាគមន៍។ យើងពិនិត្យមើល បើគណៈកម្មាធិការជាតិរៀបចំការបោះឆ្នោត និងសមាជិកគណៈកម្មការរៀបចំការបោះឆ្នោត ត្រូវមានសញ្ជាតិខ្មែរតែមួយហើយ តើប្រធានបក្សនយោបាយត្រូវទេ? វាត្រូវ។ អ៊ីចឹងត្រូវរៀបចំប្រធានក្រុមប្រឹក្សាធម្មនុញ្ញ ប្រធានរដ្ឋសភា ប្រធានព្រឹទ្ធសភា ប្រធានតុលាការកំពូល អគ្គព្រះរាជអាជ្ញាអមតុលាការកំពូល ត្រូវសញ្ជាតិខ្មែរទាំងអស់ រាប់អគ្គសវនករ ប្រធានក្រុមប្រឹក្សាប្រឆាំងអំពើពុករលួយ ត្រូវសញ្ជាតិខ្មែរទាំងអស់»។
ជាការឆ្លើយតប មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ ហៅការប៉ុនប៉ងធ្វើច្បាប់បែបនេះ ថាជាការរើសអើង ហើយគណបក្សលោកមិនគាំទ្រការធ្វើវិសោធនកម្មច្បាប់បែបនេះទេ៖ «យើងមិនគួររើសអើងបងប្អូនប្រជាពលរដ្ឋខ្មែររាប់លាននាក់ ដែលកំពុងរស់នៅក្រៅប្រទេស ហើយមានសញ្ជាតិពីរ ខ្មែរ និងបរទេសនោះទេ ពីព្រោះគេក៏ជាកូនខ្មែរ គេមានឈាមជ័រជាខ្មែរ គេស្រឡាញ់ទឹកដីខ្មែរ។ គេចង់ចូលរួមធ្វើនយោបាយនៅក្នុងប្រទេសខ្មែរ។ ដូច្នេះគួរតែបើកទូលាយ ដើម្បីឲ្យប្រទេសជាតិរបស់យើងប្រមែប្រមូលធនធានមនុស្សទាំងអស់ មកជួយប្រទេសជាតិ ដែលកំពុងខ្វះខាតធនធានមនុស្សនោះ»។
លោកនាយករដ្ឋមន្ត្រី ហ៊ុន សែន ហៅសារខ្លាំងៗរបស់លោកនៅពេលនេះ ថាជាសារជូនពរចូលឆ្នាំថ្មីសម្រាប់អ្នកទាំងអស់គ្នា រាប់ទាំងអ្នកជាប់គុកផង ដោយលោកដៀមដាមថា អ្នកជាប់គុកនៅក្រៅប្រទេស គឺនៅប៉ារីស មិនមែនជាការជាប់គុកពិបាក។ លោកទាមទារឲ្យអ្នកនយោបាយ ត្រូវមានសុជីវធម៌ ព្រោះកន្លងមក មានអ្នកនយោបាយខ្លះប្រៀបធៀបលោកទៅនឹងចោរ និងជនផ្ដាច់ការលីប៊ី ឈ្មោះ ហ្គាដាហ្វី (Gaddafi) ជាដើម។
ទោះជាបែបនេះក្ដី តុលាការចេញដីកាចាប់ខ្លួន លោក សម រង្ស៊ី ជាបន្តបន្ទាប់នោះ ត្រូវបានអ្នកឃ្លាំមើលសិទ្ធិមនុស្សលើកឡើងថា ជាហេតុផលនយោបាយ។ អ្នកវិភាគលើកឡើងថា ការប្រកាសរបស់ លោក ហ៊ុន សែន នៅពេលនេះ ជាការបិទផ្លូវរបស់ លោក សម រង្ស៊ី ក្នុងការវិលចូលស្រុកវិញ នៅខណៈលោកកំពុងនិរទេសខ្លួននៅប្រទេសបារាំង នោះ។ ទោះជាយ៉ាងនេះក្ដី អ្នកវិភាគសង្កត់ធ្ងន់ថា ការប្រកាសរបស់ លោក ហ៊ុន សែន នេះ គ្មានអ្វីឋិតថេរទេ អ្នកនយោបាយតែងតែផ្លាស់ប្ដូរនៅពេលមានការវិវឌ្ឍនយោបាយចុងក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។