ប្រមុខរដ្ឋាភិបាលនៃប្រទេសកម្ពុជា ថ្លែងថា ពិធីបុណ្យឆ្នាំថ្មីប្រពៃណីជាតិខ្មែរឆ្នាំនេះ គឺជាឆ្នាំដ៏ពិសេសជាងគេក្នុងរយៈពេលជិត ៣០ឆ្នាំមកហើយ។ ការចាត់ទុកបែបនេះ ដោយសារតែមានវត្តមានមេបក្សប្រឆាំងអញ្ជើញចូលរួមក្នុងពិធីបើកព្រឹត្តិការណ៍អង្គរសង្ក្រាន្តជាមួយគ្នាជាលើកដំបូងដែលពុំធ្លាប់មានពីមុនមក។
លោក ហ៊ុន សែន នាយករដ្ឋមន្ត្រីនៃរដ្ឋាភិបាលកម្ពុជា និងប្រធានគណបក្សសង្គ្រោះជាតិ លោក សម រង្ស៊ី បានចូលរួមធ្វើជាគណៈអធិបតីនៃការបើកព្រឹត្តិការណ៍អង្គរសង្ក្រាន្តលើកទី៣ ជាមួយគ្នានៅមុខប្រាសាទបាយ័ននៃបរិវេណអង្គរធំ ខេត្តសៀមរាប កាលពីព្រឹកថ្ងៃអង្គារ ទី១៤ ខែមេសា។
វត្តមានរបស់ប្រមុខរដ្ឋាភិបាល និងមេបក្សប្រឆាំង ដែលបង្កើតឱ្យមានជាប្រវត្តិសាស្ត្រនេះ គឺធ្វើឡើងនៅខេត្តសៀមរាប មុនពេលវេលាមានការប្រកាស ការយាងមកដល់នៃទេវតាថ្មី ដើម្បីប្ដូរវេនជាមួយទេវតាឆ្នាំចាស់។ លោក ហ៊ុន សែន បានថ្លែងទៅកាន់សាធារណជននៅក្នុងពិធីបើកព្រឹត្តិការណ៍អង្គរសង្ក្រាន្តលើកទី៣ ឆ្នាំ២០១៥ ថា នេះគឺឆ្នាំដ៏ពិសេសដែលលោកសុខចិត្តលុបចោលដំណើរទៅកាន់សាធារណរដ្ឋកូរ៉េ ដើម្បីយកឱកាសចូលរួមជាមួយប្រជាពលរដ្ឋខ្មែរដែលកំពុងប្រារព្ធព្រឹត្តិការណ៍អង្គរសង្ក្រាន្តអបអរឆ្នាំថ្មីវិញ។
លោក ហ៊ុន សែន បញ្ជាក់ទៀតថា ពេលនេះប្រទេសកម្ពុជា បានដើរដល់ដំណាក់កាលថ្មីមួយទៀត ដោយសារមានវត្តមានរបស់លោក សម រង្ស៊ី និងភរិយា ចូលរួមក្នុងព្រឹត្តិការណ៍អង្គរសង្ក្រាន្តនេះ។ លោកថា នៅថ្ងៃនេះ វប្បធម៌សន្ទនាមួយបានចាប់ផ្ដើមនៅលើទឹកដីកម្ពុជា ជំនួសឱ្យការប្រទូសរ៉ាយ។ គ្មានការដោះស្រាយតាមរយៈជម្លោះប្រដាប់អាវុធ ឬការប្រទូសរ៉ាយនយោបាយណាមានលទ្ធផលល្អជាជាងការសន្ទនាគ្នាទេ។ ឥឡូវនេះយើងត្រូវលើកកម្ពស់ការសន្ទនារវាងអ្នកនយោបាយ៖ «វប្បធម៌សន្ទនារបស់យើងគោលដៅសំខាន់ ២យ៉ាង ១ពង្រឹងសន្តិភាពមួយទៀតជំរុញការអភិវឌ្ឍប្រទេសជាតិចេះធ្វើការជាមួយគ្នា»។
ទោះយ៉ាងណា លោក សម រង្ស៊ី ប្រធានគណបក្សសង្គ្រោះជាតិ និងភរិយារបស់លោកដែលទើបតែចូលរួមលើកដំបូងនៅក្នុងពិធីរបស់រដ្ឋាភិបាលនោះ មិនត្រូវបានគេរៀបចំកម្មវិធីឱ្យថ្លែងសន្ទរកថា ទៅកាន់សាធារណជនដែលចូលរួមយ៉ាងអធិកអធមនោះឡើយ។
កម្មវិធីអង្គរសង្ក្រាន្តដែលមាននាយករដ្ឋមន្ត្រីនៃរាជរដ្ឋាភិបាល និងប្រធានគណបក្សប្រឆាំងចូលរួមនោះ គឺមានសភាពអធិកអធម្មយ៉ាងក្រៃលែង ដោយលោក ហ៊ុន សែន និងលោក សម រង្ស៊ី បានដើរទស្សនាទិដ្ឋភាពប្លែកៗជាច្រើនកន្លែងជាមួយគ្នា។
លោកនាយករដ្ឋមន្ត្រី ហ៊ុន សែន បានចាត់ទុកព្រឹត្តិការណ៍អង្គរសង្ក្រាន្តលើកទី៣ ដើម្បីអបអរបុណ្យចូលឆ្នាំថ្មីប្រពៃណីខ្មែរឆ្នាំមមែនេះថា គឺជាការជួបជុំមហាគ្រួសារខ្មែរទាំងផ្នែកវប្បធម៌ និងនយោបាយ។
លោក ហ៊ុន សែន ក៏បានថ្កោលទោសក្រុមជនដែលបានលួចដុតបំផ្លាញខ្លោងទ្វារអង្គរសង្ក្រាន្ត នៅប៉ែកខាងលិចអង្គរវត្ត កាលពីរាត្រីថ្ងៃទី៧ ខែមេសា កន្លងទៅថា គឺជាអំពើជ្រុលនិយម ហើយលោកបានអំពាវនាវឲ្យអាជ្ញាធរខេត្តសៀមរាប ចាត់វិធានការស្វែងរកជនដៃដល់យកមកផ្ដន្ទាទោសតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។