លោកនាយករដ្ឋមន្ត្រី ហ៊ុន សែន ផ្តល់អនុសាសន៍ឲ្យក្រសួងការងារ និងភាគីពាក់ព័ន្ធ ត្រូវតែស្វែងរកថវិកាយ៉ាងណាដើម្បីបើកប្រាក់ឈ្នួលជូនកម្មករ-កម្មការិនីឲ្យបានគ្រប់ៗគ្នាជាមុនសិន ចាំដោះស្រាយបញ្ហាផ្សេងៗទៀតតាមក្រោយ ចំពោះករណីថៅកែរត់ ឬបិទរោងចក្រ។ រីឯសហជីពសាទរចំពោះវិធានការនេះ តែនៅមិនទាន់ជឿលើក្រសួងការងារថា អាចអនុវត្តបានរលូននោះទេ។
នៅចុងអាណត្តិទី៥ និងនៅមុនការបោះឆ្នោតអាណត្តិទី៦ ដ៏ខ្លីខាងមុខនេះ លោកនាយករដ្ឋមន្ត្រី ហ៊ុន សែន ហាក់ដូចជាបង្ហាញការយកចិត្តទុកដាក់ខ្លាំងចំពោះសុខទុក្ខកម្មកររោងចក្រ ខណៈកន្លងមករដ្ឋាភិបាលរបស់លោកហាក់ដូចជាធុញទ្រាន់ និងតែងតែបង្ក្រាបស្ទើររាល់ករណីតវ៉ារបស់កម្មកររហូតដល់មានកម្មករស្លាប់ជាច្រើននាក់ទៀតផង កាលពីដើមអាណត្តិទី៥។
ថ្លែងនៅចំពោះមុខកម្មករ-កម្មការិនី នៅសង្កាត់ទឹកថ្លា ខណ្ឌសែនសុខ នៅព្រឹកថ្ងៃទី២១ ខែកុម្ភៈ លោក ហ៊ុន សែន មានបំណងផ្ដល់អនុសាសន៍ថ្មីមួយទៀតដល់ក្រសួងការងារ និងភាគីពាក់ព័ន្ធ ត្រូវតាមដានឲ្យបានដិតដល់ និងដោះស្រាយបញ្ហាភ្លាមៗ ចំពោះបណ្ដារោងចក្រមួយចំនួនដែលថៅកែរត់ចោល ឬបិទរោងចក្រ ដោយមិនត្រូវទុកបញ្ហានេះឲ្យនៅរ៉ាំរ៉ៃ ហើយកម្មករធ្វើការតវ៉ានោះទេ៖ «កើតមានសកម្មភាពភ្លាម ដោះស្រាយបញ្ហាភ្លាម ដកថវិកាយ៉ាងណាដើម្បីដោះស្រាយនូវប្រាក់បៀវត្សឲ្យកម្មករជំនួសសិន ខ្ចីប្រាក់ពីក្រសួងសេដ្ឋកិច្ច និងហិរញ្ញវត្ថុ ឬក៏ប្រាក់ណាក៏ដោយ ដើម្បីយកមកដោះស្រាយឲ្យកម្មករ-កម្មការិនីសិន បន្ទាប់ទៅជំហានបន្តចាំយើងដោះស្រាយរបៀបម៉េចទៀត កុំឲ្យកម្មករគ្នាខ្វះប្រាក់ខែនៅក្នុងពេលវេលាហ្នឹង ចាំយើងដោះស្រាយបន្ត លក់ឡាយឡុងរោងចក្រយ៉ាងម៉េច ហ្នឹងជារឿងមួយទៀត ប៉ុន្តែមិនត្រូវឲ្យកម្មករតវ៉ាដោយគ្មានដំណោះស្រាយជាក់លាក់នោះទេ ត្រូវខិតខំដោះស្រាយនូវរឿងនេះ»។
ការលើងឡើងរបស់លោក ហ៊ុន សែន នេះ ធ្វើឡើងបន្ទាប់ពីមួយរយៈចុងក្រោយនេះ មានរោងចក្រប្រមាណជិត ១០រោងចក្រ ត្រូវបានបិទទ្វារ និងថៅកែរត់ចោលដោយមិនទាន់ទូទាត់ប្រាក់ឈ្នួល និងប្រាក់បំណាច់ជូនកម្មករ បណ្ដាលឲ្យកម្មកររាប់ពាន់នាក់ផ្ទុះការតវ៉ារ៉ាំរ៉ៃ ទាមទារដំណោះស្រាយពីក្រសួងការងារ។
រោងចក្រដែលថៅកែរត់ចោលនោះ មានរោងចក្រ ហ្គាវ័ន អាប់ភើរឹល (Gawon Apparel Co., Ltd.) នៅក្រុងតាខ្មៅ ខេត្តកណ្ដាល រោងចក្រ ហ្វើស ហ្គាវ័ន (First Gawon) នៅសង្កាត់ចាក់អង្រែក្រោម រោងចក្រ អេហ្វ.អ.អ៊ី. ហ្គាមេន (FRE Garment) រោងចក្រយូដា ហ្គាមេន អ៊ិនដាស់ស្ទ្រាល (UDA Garment Industrial) ស្ថិតនៅភូមិត្រពាំងជ្រៃ សង្កាត់ចោមចៅ និងរោងចក្រ អ៊ីហ្វា ហ្គាមេន អ៊ិនដាស់ស្ទ្រាល (EFA Garment Industrial) ស្ថិតនៅក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។ កម្មករនៅរោងចក្រទាំងនេះនៅមិនទាន់ទទួលបានដំណោះស្រាយនោះទេ ហើយកំពុងធ្វើការតវ៉ា។ កម្មករលើកឡើងថា អាជ្ញាធរ ឬស្ថាប័នពាក់ព័ន្ធមិនត្រឹមតែមិនជួយរកដំណោះស្រាយនោះទេ ថែមទាំងគំរាមកំហែងលើកកម្មករទៀតផង។
ប្រធានសហព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ មានប្រសាសន៍ថា ប្រសិនបើរដ្ឋាភិបាលផ្ដល់អនុសាសន៍បែបនេះ ហើយក្រសួងការងារនឹងយកទៅអនុវត្តបាននោះ គឺវាជារឿងល្អសម្រាប់កម្មកររាប់ពាន់នាក់ដែលកំពុងរង់ចាំដំណោះស្រាយពាក់ព័ន្ធនឹងករណីថៅកែរត់ចោលនេះ។
លោកកត់សម្គាល់ថា កន្លងមកកម្មករតវ៉ាខ្លាំងហើយយូរណាស់ ទើបបានដំណោះ ស្រាយ ហើយបើកម្មករធ្វើការតវ៉ាល្មមៗនោះ គឺគ្មានដំណោះស្រាយឡើយ៖ «ជាការមួយល្អដែលក្រសួងអាចបញ្ចេញសាច់ប្រាក់សម្រាប់ធ្វើបុរេប្រទានជូនកម្មករជាមុននេះ ព្រោះកម្មករបានលុយនេះអាចដោះស្រាយបញ្ហាមួយចំនួនធំ។ រឿងនេះខ្ញុំមិនទាន់ច្បាស់ទេថា គិតតែប្រាក់ខែ ឬក៏គិតដល់អតីតភាពការងារឲ្យកម្មករដែរ។ ប្រសិនបើគិតតែប្រាក់ខែ គឺបានមួយរយៈទេ តែបើគិតទាំងអតីតភាពការងារដើម្បីបញ្ចប់ ហើយបន្ទាប់មកលក់ឡាយឡុងតាមក្រោយនេះគឺជារឿងល្អមែនទែន»។
ទន្ទឹមគ្នានេះ លោក អាត់ ធន់ យល់ថា ក្រសួងការងារ គួរតែតម្រូវឲ្យថៅកែក្រុមហ៊ុនដាក់តម្កល់ប្រាក់អតីតភាពការងារកម្មករនៅធនាគារជាតិ ឬក្រសួងស្ថាប័នរដ្ឋសម្រាប់ត្រៀមដកយកមកបើកជូនកម្មករ ក្នុងករណីថៅកែរត់ចោល។
ម្យ៉ាងវិញទៀត លោកស្នើឲ្យក្រសួងការងារ និងអាជ្ញាធរពាក់ព័ន្ធ ត្រូវចាត់វិធានការទប់ស្កាត់ឲ្យបានឆាប់រហ័ស ប្រសិនបើថៅកែនោះ បម្រុងរត់ចោល ឬបិទរោងចក្រ ដើម្បីងាយស្រួលដោះស្រាយជូនកម្មករ ដោយមិនត្រូវបណ្តោយឲ្យថៅកែនោះរត់ចោលកម្មករឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។