រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ថា រដ្ឋាភិបាលមិនបានបិទវិទ្យុអាស៊ីសេរី និងវិទ្យុសំឡេងសហរដ្ឋអាមេរិក (VOA) ទេនៅពេលនេះ។
លោក ខៀវ កាញារីទ្ធ ថ្លែងដូចនេះក្នុងសន្និសីទកាសែតមួយនាទីស្ដីការក្រសួងព័ត៌មាន នៅព្រឹកថ្ងៃទី២៤ សីហា ដោយលោកច្រានចោលព័ត៌មានដែលថា រដ្ឋាភិបាលកំពុងបិទវិទ្យុទាំងពីរនេះ។ លោកថា វិទ្យុបរទេសទាំងពីរនេះនៅតែអាចជួលការផ្សាយបន្តពីវិទ្យុក្នុងស្រុកបាន ចំពោះវិទ្យុណាដែលមានច្បាប់អនុញ្ញាតត្រឹមត្រូវ។ ប៉ុន្តែលោកថា នឹងរង់ចាំមើលទស្សនៈ និងជំហររបស់វិទ្យុទាំងពីរនេះថាឆ្លើយយ៉ាងម៉េច ដើម្បីលោកសម្រេចការបើកការិយាល័យរបស់វិទ្យុទាំងពីរនេះនៅកម្ពុជា៖ «តែខ្ញុំចង់បញ្ជាក់មួយពីបញ្ហានេះ គឺកុំក្រឡាស់ឲ្យសោះក្រសួងអត់បានបិទវិទ្យុអាស៊ីសេរី និងវីអេអូទេ។ គឺសុំឲ្យច្បាប់ពីចំណុចនេះ។ កន្លងមកគឺការបំភាន់ប្រជាជន គឺថាក្រសួងកំពុងបិទវិទ្យុអាស៊ីសេរី និងវីអូអេ។ ហើយខ្ញុំកំពង់តែចាំមើលមើលទស្សនៈ និងជំហរវិទ្យុទាំងពីរនេះ ឆ្លើយតបយ៉ាងម៉េច ដើម្បីខ្ញុំសម្រេចការបើកការិយាល័យរបស់វិទ្យុទាំងពីរនេះ»។
កាលពីថ្ងៃទី២៣ សីហា ក្រសួងព័ត៌មានបានសម្រេចបញ្ឈប់ការផ្សាយទាំងស្រុង របស់ស្ថានីយវិទ្យុមហានគរ FM ៩៣.៥ ដែលផ្សាយបន្តកម្មវិធីវិទ្យុវីអូអេ និងអាស៊ីសេរី និងកម្មវិធីគោលនយោបាយរបស់គណបក្សសង្គ្រោះជាតិ ក្រោមហេតុផលថា ការផ្សាយកម្មវិធីវិទ្យុនេះពីប្រភពខាងក្រៅ មិនសុំការអនុញ្ញាតពីក្រសួង។ ខណៈវិទ្យុជាយដែន នាខេត្តពាយព្យប្រទេស ក៏ត្រូវបានក្រសួងបញ្ឈប់ការផ្សាយដូចគ្នា។
ចំណែកវិទ្យុស្ត្រី FM ១០២ ក៏បានសម្រេចឈប់ផ្សាយព័ត៌មានបន្តពីវិទ្យុទាំងពីរនេះ ចាប់ពីយប់ថ្ងៃទី២៣ សីហា បន្ទាប់ពីក្រសួងព័ត៌មានថា វិទ្យុនេះអនុវត្តខុសកិច្ចសន្យាជាង១០ឆ្នាំហើយ។
លោក ខៀវ កាញារីទ្ធ អះអាងថា ការបញ្ឈប់ការផ្សាយរបស់វិទ្យុក្នុងស្រុកទាំងនេះ មិនមែនជារឿងនយោបាយទេ តែជាផ្លូវច្បាប់ ហើយលោកព្រមានចាត់វិធានការលើម្ចាស់វិទ្យុទាំងនោះទៅតុលាការផង ទាក់ទងនឹងបទរំលោភលើសេចក្ដីទុកចិត្ត និងរំលោភលើកិច្ចសន្យា។
ក្រៅពីការបញ្ឈប់ការផ្សាយបន្តពីវិទ្យុអាមេរិកាំងនេះ វិទ្យុសារិកា ដែលផ្សាយកម្មវិធីព័ត៌មានវិទ្យុ វីអូឌី (VOD) របស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) ក៏ត្រូវបានក្រសួងព័ត៌មានបញ្ឈប់ការផ្សាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។