សេចក្ដីណែនាំចុះហត្ថលេខាដោយលោក ស ខេង ជាឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ កាលពីថ្ងៃទី២១ មិថុនា សរសេរថា ដើម្បីធានាឲ្យកាន់តែល្អប្រសើរនូវបរិយាកាសសន្តិសុខ សណ្ដាប់ធ្នាប់ របៀបរៀបរយ សម្រាប់កិច្ចដំណើរការបោះឆ្នោតទាំងមូលនោះ គឺត្រូវបន្តជំរុញអនុវត្តគោលនយោបាយភូមិឃុំមានសុវត្ថិភាពឲ្យក្លាយជាយុទ្ធនាការមួយព្រមៗគ្នា គ្រប់ភូមិ ឃុំ សង្កាត់ ទូទាំងប្រទេស។
អាជ្ញាធរមានសមត្ថកិច្ចគ្រប់លំដាប់ថ្នាក់ ទោះក្នុងករណីណាក៏ដោយ ត្រូវខិតខំស្រាវជ្រាវស៊ើបអង្កេតឲ្យបានម៉ត់ចត់នូវបទល្មើសនានាដែលកើតឡើង ជាពិសេសបទល្មើសព្រហ្មទណ្ឌ ដែលមានការចោទប្រកាន់ពាក់ព័ន្ធរឿងនយោបាយ និងឧបទ្ទវហេតុនានា ពាក់ព័ន្ធបរិយាកាសនយោបាយ ដូចជាគំរាមកំហែង បំភិតបំភ័យ ឬការទម្លាក់ស្លាក ផ្ដួលរំលំស្លាកគណបក្ស ការលាបពណ៌ផ្សេងៗលើស្លាកគណបក្សនានា។
ត្រូវបន្តយកចិត្តទុកដាក់សហការ រៀបចំ និងចាត់វិធានការការពារសន្តិសុខ សុវត្ថិភាពនៅគ្រប់គោលសំខាន់ៗ គឺទីកន្លែងជួបជុំ ទីស្នាក់ការគណបក្សនយោបាយឈរឈ្មោះបោះឆ្នោត ការិយាល័យបោះឆ្នោត និងរាប់សន្លឹកឆ្នោត។ ឧទាហរណ៍ មធ្យោបាយ សម្ភារៈឃោសនា ទីតាំងរក្សាទុក ឬក្បួនដឹកជញ្ជូនសម្ភារៈ និងឯកសារបោះឆ្នោតរបស់ គ.ជ.ប ឬគណៈកម្មការរៀបចំការបោះឆ្នោតគ្រប់លំដាប់ថ្នាក់។
គណៈបញ្ជាសន្តិសុខអចិន្ត្រៃយ៍ថ្នាក់រាជធានី ខែត្រ ត្រូវធានារបបរាយការណ៍១ថ្ងៃ២ដង ព្រឹកម៉ោង ៨ និងរសៀលម៉ោង ៤ ចាប់ពីពេលនេះ រហូតដល់ការបោះឆ្នោតបានចប់សព្វគ្រប់ជាស្ថាពរ លើកលែងករណីបន្ទាន់ ជះឥទ្ធិពលផ្នែកនយោបាយ ត្រូវរាយការណ៍ជាសាមញ្ញជូនមកលេខាធិការដ្ឋាននៃគណៈបញ្ជាការសន្តិសុខអចិន្ត្រៃយ៍ ដើម្បីមានវិធានការដោះស្រាយទាន់ពេលវេលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។