មន្ត្រីគណបក្សសង្គ្រោះជាតិ នៅស្រុកមេមត់ ខេត្តត្បូងឃ្មុំ អះអាងថា ពួកគេកំពុងរៀបចំពាក្យបណ្តឹងរួម នៅតាមឃុំនីមួយៗ ដែលមានពលរដ្ឋបាត់ឈ្មោះដើម្បីស្នើឱ្យក្រុមប្រឹក្សាឃុំ ឬគណៈកម្មាធិការជាតិរៀបចំការបោះឆ្នោត បញ្ចូលឈ្មោះពួកគាត់ឡើងវិញ។ ជាងនេះទៀត ពួកគាត់បញ្ជាក់ថា ករណីបាត់ឈ្មោះពលរដ្ឋក្នុងបញ្ជីឈ្មោះបោះឆ្នោតដំបូង តាមឃុំមួយចំនួន អាជ្ញាធរបានដោះស្រាយបណ្ដើរៗហើយ។
មន្ត្រីគណបក្សប្រឆាំងរកឃើញថា ក្នុងចំណោមឃុំចំនួន ៨ នៅស្រុកមេមត់ មានឃុំចំនួន២ ដែលមានករណីបាត់ឈ្មោះពលរដ្ឋនោះ គឺអាជ្ញាធរបានដោះស្រាយ និងរកឃើញឈ្មោះពួកគាត់វិញហើយ។ ឃុំទាំងពីរនោះ រួមមានឃុំទ្រាក និងឃុំរំចេក ដែលមានចំនួនពលរដ្ឋជាង ១០០នាក់។ ដោយឡែកឃុំចំនួន ៦ ទៀត ពលរដ្ឋចាប់ផ្តើមមកដាក់ពាក្យបណ្តឹងបណ្តើរៗ ហើយខាងមន្ត្រីគណបក្សប្រឆាំងនៅតាមមូលដ្ឋានជំរុញផ្សព្វផ្សាយឱ្យពលរដ្ឋនាំគ្នាមកពិនិត្យបញ្ជីឈ្មោះរបស់ខ្លួន និងដាក់ពាក្យប្តឹងទៅអាជ្ញាធរឃុំដើម្បីស្នើឱ្យដោះស្រាយករណីនេះ។
សមាជិកក្រុមប្រឹក្សាស្រុកមេមត់ មកពីគណបក្សសង្គ្រោះជាតិ លោក គង់ សំអាន មានប្រសាសន៍ថា ខាងលោកនឹងរៀបចំឱ្យមានពាក្យបណ្តឹងរួម ដោយជ្រើសរើសតំណាងពលរដ្ឋម្នាក់មកដាក់ពាក្យប្តឹងតវ៉ាជុំវិញករណីបាត់ឈ្មោះពួកគេ ពីព្រោះពលរដ្ឋដែលបាត់ឈ្មោះទាំងអស់នឹងមិនអាចមកមើលឈ្មោះ ឬប្តឹងតវ៉ាបានគ្រប់គ្នាឡើយ។ ប៉ុន្តែលោកបារម្ភថា ប្រសិនបើអាជ្ញាធរមិនទទួលយកនីតិវិធីបែបនេះ នឹងពិបាកជាមិនខាន ពីព្រោះមានពលរដ្ឋមួយចំនួនចំណាកស្រុកទៅរកស៊ីនៅតំបន់ឆ្ងាយៗ ដែលមិនអាចត្រឡប់មកពិនិត្យបញ្ជីឈ្មោះរបស់ខ្លួនបាន៖ «ទម្រង់តវ៉ាទីមួយសុំឱ្យស្រាវជ្រាវរកឈ្មោះហ្នឹងដើម្បីឱ្យគ្រប់ទៅនឹងចំនួន ដែលក្រុមចុះឈ្មោះបោះឆ្នោតគេបានបញ្ជូនទៅតាមឃុំនីមួយៗហ្នឹង»។
សមាជិកក្រុមប្រឹក្សាស្រុករូបនេះបន្តថា ឃុំចំនួន ៦ ទៀត ដែលមានករណីបាត់ឈ្មោះ គឺមានចំនួនពលរដ្ឋប្រមាណ ៣០០នាក់។ លោកមើលឃើញថា ដំណើរការពិនិត្យបញ្ជីឈ្មោះនៅស្រុកមេមត់ ប្រជាពលរដ្ឋហាក់មិនបានចាប់អារម្មណ៍ឡើយ ពោលគឺមានពលរដ្ឋតិចតួចណាស់ដែលបានទៅពិនិត្យបញ្ជីឈ្មោះរបស់ខ្លួនក្នុងរយៈពេល ១០ថ្ងៃកន្លងទៅ។
ទាក់ទងបញ្ហានេះ ប្រធានលេខាធិការដ្ឋាននៃគណៈកម្មការរៀបចំការបោះឆ្នោតខេត្តត្បូងឃ្មុំ លោក សុខ ឈិន មានប្រសាសន៍ថា ខាងលោកកំពុងពិនិត្យលើបញ្ហានេះ៖ «កំពុងដោះស្រាយ កំពុងពិនិត្យរឿងហ្នឹង ព្រោះឥឡូវមិនទាន់ក្តាប់សភាពការណ៍បាន»។
ជំទប់ទី២ ឃុំជាំក្រវៀន លោក អ៊ិន សុខុន បញ្ជាក់ថា ពលរដ្ឋនៅឃុំរបស់លោកជាង ១០០នាក់ ដែលមិនមានឈ្មោះក្នុងបញ្ជីឈ្មោះបោះឆ្នោតថ្មី ប៉ុន្តែមានពលរដ្ឋជាង ២០នាក់ប៉ុណ្ណោះដែលបានដាក់ពាក្យប្តឹងមកអាជ្ញាធរឃុំ។ បញ្ហានេះលោកបារម្ភថា ពលរដ្ឋមួយចំនួននឹងអាចបាត់បង់សិទ្ធិបោះឆ្នោត ប្រសិនបើឈ្មោះរបស់ពួកគាត់មិនបានបញ្ចូលក្នុងបញ្ជីឡើងវិញ៖ «បារម្ភខ្លាំងចំពោះប្រជាពលរដ្ឋដែលបាត់ឈ្មោះក្នុងបញ្ជីឈ្មោះបោះឆ្នោតហ្នឹង ពីព្រោះវាប៉ះពាល់ដល់លទ្ធផលនៃការបោះឆ្នោត»។
លោកឱ្យដឹងទៀតថា ករណីបាត់ឈ្មោះពលរដ្ឋក្នុងបញ្ជីឈ្មោះបោះឆ្នោត គឺអាជ្ញាធរ និងមន្ត្រីគណបក្សនយោបាយទាំងអស់បានខិតខំស្វែងរកដែរ ប៉ុន្តែកត្តាសំខាន់គឺមិនមានឈ្មោះពលរដ្ឋទាំងនោះក្នុងបញ្ជីតែម្តង។
មន្ត្រីជាន់ខ្ពស់ផ្នែកតស៊ូមតិនៃអង្គការខុមហ្វ្រែល (COMFREL) លោក កង សាវាង្ស ធ្លាប់មានប្រសាសន៍ថា ដំណាក់កាលពិនិត្យបញ្ជីឈ្មោះបោះឆ្នោតដំបូង ពលរដ្ឋអាចដាក់ពាក្យប្តឹងតវ៉ាទៅសមាជិកក្រុមប្រឹក្សាឃុំ ឬសង្កាត់ ប្រសិនបើពួកគេរកឃើញភាពមិនប្រក្រតី ឬករណីបាត់ឈ្មោះក្នុងបញ្ជីជាដើម។ បន្ថែមពីនេះ ពួកគេអាចប្តឹងទៅ គ.ជ.ប បន្តទៀត ប្រសិនបើដំណោះស្រាយនៅដំណាក់ឃុំ សង្កាត់ មិនអាចធ្វើឱ្យពលរដ្ឋស្ងប់ចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។