លោក កឹម សុខា ថា​អយុត្តិធម៌​សង្គម​ធ្វើ​ឲ្យ​ពលរដ្ឋ​បោះឆ្នោត​ឲ្យ​បក្ស​ប្រឆាំង​ច្រើន

0:00 / 0:00

ប្រធាន​គណបក្ស​សង្គ្រោះ​ជាតិ មាន​ជំនឿ​ថា គណបក្ស​នេះ​នឹង​ឈ្នះ​ការ​បោះឆ្នោត​ជ្រើសរើស​តំណាងរាស្ត្រ​នៅ​ឆ្នាំ​២០១៨ ខាង​មុខ។ លោក កឹម សុខា បញ្ជាក់​ថា មូលហេតុ​ដែល​អះអាង​ដូចនេះ ដោយសារ​ឃើញ​លទ្ធផល​ការ​បោះឆ្នោត​ឆ្នាំ​២០១៧ មាន​ពលរដ្ឋ​គាំទ្រ​កើន​ឡើង​ខ្លាំង បើ​ធៀប​នឹង​ការ​បោះឆ្នោត​ឃុំ-សង្កាត់​កាល​ពី​ឆ្នាំ​២០១២។ ប៉ុន្តែ​អ្នក​នាំ​ពាក្យ​គណបក្ស​ប្រជាជន​កម្ពុជា អះអាង​ថា គឺ​គណបក្ស​ខ្លួន​ទៅ​វិញ​ទេ​ដែល​មាន​អ្នក​គាំទ្រ​កើន​ឡើង​ជាង​គណបក្ស​ប្រឆាំង។

ប្រធាន​គណបក្ស​សង្គ្រោះ​ជាតិ លោក កឹម សុខា មាន​ប្រសាសន៍​នៅ​ចំពោះ​មុខ​ពលរដ្ឋ​ជាង ១​ពាន់​នាក់ ដែល​បាន​ចូលរួម​ក្នុង​ពិធី​ថ្លែង​អំណរ​គុណ​ម្ចាស់​ឆ្នោត​នៅ​សង្កាត់​ព្រែកព្រះស្ដេច ក្រុង​បាត់ដំបង ខេត្ត​បាត់ដំបង នៅ​ព្រឹក​ថ្ងៃ​ទី​១៥ មិថុនា ថា ប្រជាពលរដ្ឋ​នៅ​ទី​ជនបទ ជាពិសេស​អ្នក​នៅ​ព្រំដែន​កម្ពុជា-ថៃ បោះឆ្នោត​ឲ្យ​គណបក្ស​សង្គ្រោះ​ជាតិ ភ្លូកទឹកភ្លូកដី​ខុស​ពី​អាណត្តិ​មុនៗ។

លោក​សង្កត់​ធ្ងន់​ថា មូលហេតុ​ដែល​ពលរដ្ឋ​បោះឆ្នោត​ឲ្យ​គណបក្ស​សង្គ្រោះ​ជាតិ ច្រើន ដោយសារ​ពួក​គាត់​មើល​ឃើញ​ការ​ដឹកនាំ​របស់​រដ្ឋាភិបាល​មាន​ភាព​អយុត្តិធម៌​នៅ​ក្នុង​សង្គម​ច្រើន៖ « ពេល​ខ្លះ​ព័ត៌មាន​ចេញ​មក​នៅ​ខេត្ត​ឆ្ងាយ​នេះ ឆ្នាំ​២០១២ និង ២០១៣ ព័ត៌មាន​មួយ​ចំនួន​មិន​ទាន់​មក​ដល់​ខេត្ត​ពាយព្យ​នេះ​ទេ។ ឥឡូវ​នេះ ព័ត៌មាន​ដែល​គេ​ប្រព្រឹត្ត​អំពើ​អាក្រក់​យ៉ាង​នោះ បាន​ឃើញ​តាម​រយៈ​ហ្វេសប៊ុក។ ទាំងនេះ​ហើយ​ដែល​ធ្វើ​ឲ្យ​យុវជន​ងាក​មក​គាំទ្រ​សង្គ្រោះ​ជាតិ »

ឆ្លើយតប​នឹង​បញ្ហា​នេះ អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន លើក​ឡើង​ថា នេះ​គ្រាន់​តែ​ជា​សម្ដី​បំភ័ន្ត​ខុស​ការពិត​របស់​មេ​បក្ស​ប្រឆាំង​មួយ​នេះ ក្នុង​ចេតនា​ដើម្បី​រក​សំឡេង​ឆ្នោត​ពី​ប្រជាពលរដ្ឋ​ប៉ុណ្ណោះ។ លោក​អះអាង​ថា លទ្ធផល​ជាក់ស្ដែង​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ-សង្កាត់​កាល​ពី​ថ្ងៃ​ទី​៤ មិថុនា បាន​បង្ហាញ​ហើយ គឺ​គណបក្ស​ប្រជាជន​កម្ពុជា មាន​អ្នក​គាំទ្រ​កើន​ច្រើន​ជាង​គណបក្ស​សង្គ្រោះ​ជាតិ ឆ្ងាយ​ណាស់៖ « នៅ​ពេល​ដែល​គាត់​កំពុង​តែ​មាន​មតិ​បាន​ដោយ​ចំហ គាត់​ថា​គេ​គំរាម​កំហែង​គាត់។ នោះ​វា​ផ្ទុយ​គ្នា​ហើយ។ អ៊ីចឹង​បាន​សេចក្ដី​ថា ឯកឧត្ដម កឹម សុខា និយាយ​បំផ្លើស​ការពិត​នៅ​ក្នុង​សភាពការណ៍​ជាក់ស្ដែង​របស់​សង្គម​កម្ពុជា។ មួយ​វិញ​ទៀត​នេះ ជា​ការ​ឆ្លៀត​ឱកាស​ដាក់​កំហុស ឬ​បន្ទាបបន្ថោក​ឥទ្ធិពល​របស់​គណបក្ស​ប្រជាជន និង​រាជ​រដ្ឋាភិបាល​តែ​ប៉ុណ្ណោះ »

អ្នក​ស្រាវជ្រាវ​ការ​អភិវឌ្ឍ​សង្គម លោក​បណ្ឌិត មាស នី មាន​ប្រសាសន៍​ថា ចំនួន​អ្នក​គាំទ្រ​គណបក្ស​ទាំង​ពីរ​កើន​ឡើង​បន្តិចបន្តួច​ដូច​គ្នា បើ​ធៀប​នឹង​ការ​បោះឆ្នោត​ឆ្នាំ​២០១៣។ ប៉ុន្តែ​លោក​អះអាង​ថា បើ​ធៀប​នឹង​ការ​បោះឆ្នោត​ឆ្នាំ​២០១២ វិញ គណបក្ស​ប្រឆាំង​មាន​អ្នក​គាំទ្រ​កើន​ឡើង​ច្រើន ចំណែក​គណបក្ស​កាន់​អំណាច ចំនួន​អ្នក​គាំទ្រ​ធ្លាក់​ចុះ។ លោក​បណ្ឌិត មាស នី កត់​សម្គាល់​ទៀត​ថា ភាព​អយុត្តិធម៌​ក្នុង​សង្គម ក៏​ជា​ចំណែក​សំខាន់​មួយ​ធ្វើ​ឲ្យ​អ្នក​គាំទ្រ​គណបក្ស​កាន់​អំណាច​ថយ​ចុះ​ដែរ៖ « ហើយ​ខ្ញុំ​គិត​ថា បើ​សិន​ជា​រដ្ឋាភិបាល​មិន​ពង្រឹង​ប្រព័ន្ធ​យុត្តិធម៌​នេះ​ទេ ហើយ​នៅ​តែ​បណ្ដោយ​ឲ្យ​ប្រព័ន្ធ​មួយ​នេះ​ជ្រៀតជ្រែក​ដោយ​អ្នក​នយោបាយ​តទៅទៀត ធ្វើ​ឲ្យ​ប៉ះពាល់​ដល់​ប្រជាប្រិយភាព​របស់​គណបក្ស​កាន់​អំណាច​បន្ថែម​ទៀត »

ទោះ​ជា​យ៉ាង​ណា លោក​បណ្ឌិត មាស នី លើក​ឡើង​ថា គណបក្ស​ទាំង​ពីរ​ហាក់​ពុំ​មាន​គណបក្ស​ណា​ដែល​មាន​ប្រៀប និង​ឈ្នះ​ការ​បោះឆ្នោត​នៅ​ឆ្នាំ​២០១៨ បាន​នៅ​ឡើយ។

ទោះ​ជា​យ៉ាង​នេះ​ក្ដី លោក កឹម សុខា ផ្ដាំ​ផ្ញើ​ឲ្យ​មេ​ឃុំ-ចៅ​សង្កាត់​ដែល​ជាប់​ឆ្នោត​ថ្មី ត្រូវ​សហការ​ធ្វើ​ការងារ​រួម​គ្នា​ជាមួយ​គណបក្ស​កាន់​អំណាច ដើម្បី​អភិវឌ្ឍ​ឲ្យ​មាន​ការ​រីក​ចម្រើន​នៅ​ក្នុង​មូលដ្ឋាន។

ការ​បោះឆ្នោត​ឃុំ-សង្កាត់​អាណត្តិ​ទី​៤ នេះ គណបក្ស​ប្រជាជន​កម្ពុជា ប្រកាស​ថា​ខ្លួន​ទទួល​បាន​សំឡេង​គាំទ្រ​ជាង ៥១​ភាគរយ ហើយ​គណបក្ស​សង្គ្រោះ​ជាតិ ប្រកាស​ថា​ខ្លួន​ទទួល​បាន​សំឡេង​គាំទ្រ ៤៦​ភាគរយ។ ចំណែក​ឯ​បន្ទប់​ស្ថានការណ៍​សម្រាប់​ការ​បោះឆ្នោត​វិញ វាយ​តម្លៃ​ជា​បឋម​ថា គណបក្ស​ប្រជាជន​កម្ពុជា ទទួល ៤៨​ភាគរយ និង​គណបក្ស​សង្គ្រោះ​ជាតិ ទទួល​បាន ៤៥​ភាគរយ​នៃ​សំឡេង​ឆ្នោត​បាន​ការ​សរុប៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។