ប្រធានគណបក្សសង្គ្រោះជាតិ ផ្ដល់ឱវាទឲ្យអ្នកដឹកនាំរាល់រូប គួរតាំងចិត្តធ្វើឲ្យមានសេចក្ដីស្ងប់នៅក្នុងចិត្ត និងប្រកាន់យកព្រហ្មវិហារធម៌ក្នុងការដឹកនាំ ដើម្បីឲ្យខ្លួនឯងមានសេចក្ដីសុខ និងអ្នកជុំវិញក៏មានសេចក្ដីសុខ ព្រមទាំងធ្វើឲ្យប្រទេសជាតិមានស្ថិរភាព និងសន្តិភាពផងដែរ។
លោក កឹម សុខា ថ្លែងបែបនេះ គឺនៅពេលលោកទៅសម្ពោធឆ្លងកុដិ និងខ្លោងទ្វារនៅវត្តក្រាំងព្រៃផ្ដៅ ឃុំក្រាំងតាយ៉ង ស្រុកពាមជរ ខេត្តព្រៃវែង នៅព្រឹកថ្ងៃទី២៥ មិថុនា។ លោកបន្តថា មនុស្សគ្រប់រូបតែងតែប្រាថ្នាសេចក្ដីសុខដូចគ្នា ប្រទេសនានាក៏ត្រូវការសន្តិភាព តែលោកមិនបានបញ្ជាក់ថា នរណាជាមេដឹកនាំដែលគ្មានការតាំងចិត្ដឲ្យស្ងប់ ហើយធ្វើឲ្យខ្លួនឯងគ្មានសេចក្តីសុខនោះទេ។
លោកបានទទួលស្គាល់ថា ការកសាងសមិទ្ធផល គឺជាកុសល ក៏ប៉ុន្ដែបើការកសាងណាដើម្បីបំពេញមហិច្ឆតាលោភលន់របស់ខ្លួន ហើយធ្វើឲ្យអ្នកដទៃមានការឈឺចាប់ មិនមែនហៅថាសទ្ធាជ្រះថ្លានោះទេ ហើយសេចក្ដីសុខកើតចេញអំពីសេចក្ដីស្ងប់ក្នុងចិត្តរបស់បុគ្គលម្នាក់ៗ។
មេបក្សប្រឆាំងចាត់ទុកថា អស្ថិរភាព ឬអសន្តិសុខសង្គម ដោយសារតែអ្នកដឹកនាំ ឬអ្នកនយោបាយបណ្ដោយឲ្យមានសេចក្ដីក្ដៅក្រហល់ក្រហាយរោលរាលក្នុងចិត្ត ហើយការក្ដៅក្រហល់ក្រហាយដែលកើតចេញពីសេចក្ដីលោភរបស់អ្នកនយោបាយ ឬអ្នកដឹកនាំ វានឹងជះឥទ្ធិពលទៅដល់អ្នកដទៃ អ្នកជុំវិញខ្លួន និងអាចបណ្ដាលឲ្យមានការឈឺចាប់ដល់ប្រជាពលរដ្ឋ។
លោក កឹម សុខា អះអាងថា បើគណបក្សប្រឆាំងឈ្នះឆ្នោតនៅឆ្នាំ២០១៨ នឹងមិនធ្វើឲ្យនរណាមានការក្ដៅក្រហាយ ហើយក៏នឹងមិនកើតមានសង្គ្រាមជាដាច់ខាត៖ « ជួនកាលអ្នកធំមានអំណាច មានលុយ ហើយក៏មានទុក្ខដែរ បើសិនអំណាចនោះមិនមែនបានមកពីឆន្ទៈពលរដ្ឋពិតប្រាកដរបស់ពលរដ្ឋ។ បើលុយនោះ ទ្រព្យសម្បត្តិនោះ វាមិនបានមកពីការប្រឹងប្រែងរកស៊ីធ្វើការដោយសុចរិតពិតប្រាកដនោះ អាហ្នឹងលុយក្ដៅក្រហាយ អំណាចក្ដៅក្រហាយ ... កុំមើលងាយគេ កុំរករឿងគេ កុំធ្វើទុក្ខបុកម្នេញគេ អាហ្នឹងបានសុខទាំងអស់គ្នា គេក៏សុខ យើងក៏សុខ។ នេះហើយជាសេចក្តីប្រាថ្នារបស់គណបក្សសង្គ្រោះជាតិ ចង់ឲ្យខ្មែរបានសុខទាំងអស់គ្នា ឈប់ចងពៀរមុខយក្សដាក់គ្នា កាប់ចាក់គ្នា ឈ្លោះគ្នា អាងសង្គ្រាម អាងអំណាច អាងបុណ្យស័ក្ដិតទៅទៀតទៅ កសាងកុសលដោយលទ្ធភាពរៀងៗខ្លួន ដោយសទ្ធាជ្រះថ្លារៀងៗខ្លួន ពីថ្ងៃនេះ តរៀងទៅ នេះហើយសេចក្តីសុខពិត »។
ក្នុងពិធីកាត់ខ្សែបូសម្ពោធឆ្លងកុដិ និងខ្លោងទ្វារនៅវត្តក្រាំងព្រៃផ្ដៅ លោក កឹម សុខា ក៏បានព្រមានដកមេឃុំមកពីគណបក្សសង្គ្រោះជាតិ ប្រសិនបើមេឃុំណាមួយហ៊ានអនុវត្ដតាមចំណុចអវិជ្ជមានដែលមេឃុំធ្លាប់ធ្វើកន្លងទៅ ដូចជាចុះហត្ថលេខាយកលុយពីពលរដ្ឋ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។