ប្រធានគណបក្សប្រឆាំងដែលទើបត្រូវបានសមាជិកក្នុងគណបក្សផ្ដល់សេចក្ដីទុកចិត្តឲ្យឡើងកាន់តំណែងជាប្រធានគណបក្សជំនួសលោក សម រង្ស៊ី បានសន្យាផ្ដល់លុយកន្លះលានដុល្លារក្នុងមួយឃុំសង្កាត់ ដើម្បីអភិវឌ្ឍន៍ ពេលគណបក្សនេះគ្រប់គ្រងអំណាចក្រោយការបោះឆ្នោត។ ស្របពេលលោក កឹម សុខា បានទទួលតួនាទីថ្មីជាប្រធានបក្សនេះ លោកនាយករដ្ឋមន្ត្រី ហ៊ុន សែន វិញក៏បានឆ្លៀតជូនពរចំពោះការទទួលមុខតំណែងថ្មីនេះដែរ។
ការប្រកាសជំហរពីគោលនយោបាយគណបក្សជាថ្មីម្ដងទៀតរបស់លោក កឹម សុខា នេះ ខណៈដែលគណបក្សប្រឆាំងអះអាងថា ការបង្ខំចិត្តធ្វើកំណែទម្រង់ដោះដូរក្បាលម៉ាស៊ីនដឹកនាំបក្សក្នុងទ្រង់ទ្រាយដ៏ធំពុំធ្លាប់មាននេះ ព្រោះតែស្ថានការណ៍មិនអំណោយផលដែលអាចនឹងឈានទៅមានវិបត្តិផ្នែកនយោបាយកាន់តែធ្ងន់ធ្ងរជាងមុនរបស់បក្សប្រឆាំង។
ថ្លែងនៅចំពោះមុខសកម្មជន និងមន្ត្រីជាន់ខ្ពស់ក្នុងពិធីសមាជវិសាមញ្ញ នៅព្រឹកថ្ងៃទី២ ខែមីនា នៅទីស្នាក់ការគណបក្សស្ថិតក្នុងសង្កាត់ចាក់អង្រែលើ លោក កឹម សុខា ឲ្យដឹងថា ក្រោយពេលបក្សប្រឆាំងឈ្នះឆ្នោតឡើងកាន់អំណាចនៅឆ្នាំ២០១៨ ខាងមុខនេះ បក្សសង្គ្រោះជាតិ បានរៀបចំកម្មវិធីនយោបាយរបស់ខ្លួនមួយចំនួន ក្នុងនោះកម្មវិធីនយោបាយទម្លាក់លុយចំនួន ៥០ម៉ឺនដុល្លារ សម្រាប់អភិវឌ្ឍក្នុងឃុំសង្កាត់នីមួយៗជារៀងរាល់ឆ្នាំ ក៏ជាកម្មវិធីនយោបាយអាទិភាពមួយសំខាន់ និងចាំបាច់ដែរ។ ទន្ទឹមនឹងនេះ ប្រធានគណបក្សប្រឆាំងថ្មី ក៏បានថ្លែងការពារចំពោះការរិះគន់រឿងផ្ដល់លុយចំនួន ៤ម៉ឺនរៀលដល់មនុស្សវ័យចាស់ ប៉ុន្តែត្រូវខកខានខុសពីការសន្យា។
ឈរក្នុងមុខតំណែងជំនួសលោក សម រង្ស៊ី ពេលនេះ លោក កឹម សុខា លើកឡើងថា ការសន្យាផ្ដល់លុយចំនួន ៤ម៉ឺនរៀលនេះក្នុងពេលកន្លងទៅបាន លុះត្រាបក្សប្រឆាំងឈ្នះឆ្នោត និងឡើងកាន់អំណាចជាមុនសិន៖ «សូមបញ្ជាក់ជូន! តិចលោបោះឆ្នោតហើយយើងឈ្នះឃុំសង្កាត់ យើងធ្វើមេឃុំ ស្រាប់គេបញ្ចេះឲ្យទារលុយ ៥០ម៉ឺនដុល្លារនៅណា? នែ! កុំដូច ៤ម៉ឺននោះ កុំលេងអាហ្នឹង។ ៤ម៉ឺនយើងថា យើងឈ្នះឆ្នោតទើបយើងជូនចាស់ៗ»។
ការសម្រេចចិត្តរុះរើក្បាលម៉ាស៊ីនដឹកនាំបក្សនេះ ធ្វើឡើងមិនយូរប៉ុន្មានក្រោយពេលការអនុម័តវិសោធនកម្មច្បាប់ស្ដីពីគណបក្សនយោបាយ ចាប់បង្ខំឲ្យមេដឹកនាំបក្សដែលមានទោស ត្រូវរំលាយបក្សចោល និងហាមមិនឲ្យប្រធាន រហូតដល់គណៈកម្មការនាយកឈប់ធ្វើនយោបាយក្នុងរយៈពេល ៥ឆ្នាំ។ វិសោធនកម្មច្បាប់ដែលអនុម័តដោយឯកបក្សពីខាងបក្សកាន់អំណាច និងអនុវត្តយ៉ាងឆាប់រហ័សក្រោយការប្រកាសរបស់លោក ហ៊ុន សែន និងត្រូវបានអនុម័តកាលពីថ្ងៃទី២០ ខែកុម្ភៈ។ ច្បាប់នេះ ត្រូវរងការរិះគន់ថា គឺជាចេតនាចង់រំលាយ និងបញ្ចប់ជីវិតនយោបាយបក្សប្រឆាំងឲ្យបានមុនការបោះឆ្នោតឆ្នាំ២០១៨។
ផ្ទុយទៅវិញលោកនាយករដ្ឋមន្ត្រី ហ៊ុន សែន បញ្ជាក់ជំហរកាលពីខែកុម្ភៈ ថា ច្បាប់ស្ដីពីគណបក្សនយោបាយនេះ តាក់តែងឡើងមិនមែនសម្រាប់តែបក្សប្រឆាំងឡើយ។ ក៏ប៉ុន្តែច្បាប់នេះ ក៏តម្រូវដែរអោយគ្រប់គណបក្សនយោបាយ ដែលបានប្រព្រឹត្តកំហុស រួមទាំងបក្សកាន់អំណាចផង។
ដោយឡែក សមាជវិសាមញ្ញរបស់គណបក្សប្រឆាំង ដែលផ្ដល់សេចក្ដីទុកចិត្តឲ្យលោក កឹម សុខា ធ្វើជាប្រធាន អ្នកស្រី មូរ សុខហួរ លោក ប៉ុល ហំម និងលោក អេង ឆៃអ៊ាង ធ្វើជាអនុប្រធានបក្សពេលនេះ ធ្វើឡើងនៅក្រោយពេលលោក សម រង្ស៊ី លាលែងពីប្រធានបក្សកាលពីថ្ងៃទី១១ ខែកុម្ភៈ កន្លងទៅ។ ការលែងឈប់ដ៏តក់ក្រហល់របស់លោក សម រង្ស៊ី ពេលនេះ ត្រូវបានអ្នកឃ្លាំមើលពីព្រឹត្តិការណ៍នយោបាយយល់ឃើញថា ក្រោយពីលោក ហ៊ុន សែន ដាក់សម្ពាធតាមរយៈការធ្វើវិសោធនកម្មមាត្រាមួយចំនួនឡើងវិញនៃច្បាប់ស្តីពីគណបក្សនយោបាយនេះ។
បើទោះជាមានការរិះគន់ពីសហគមន៍ជាតិ និងអន្តរជាតិថា ចេតនានៃច្បាប់ស្ដីពីបក្សនយោបាយ អាចមានចរិតគាបសង្កត់ក្ដីក្នុងពេលលោក កឹម សុខា ឡើងកាន់តំណែងជាប្រធានបក្សនេះដែរ លោក ហ៊ុន សែន បានឆ្លៀតផ្ញើសារគាំទ្រក្នុងថ្ងៃតែមួយ ដែលលោក កឹម សុខា ទទួលបានសេចក្ដីទុកចិត្តឲ្យធ្វើជាប្រធានជំនួសលោក សម រង្ស៊ី។
ក្រោយការដាក់ចេញគោលនយោបាយវិមជ្ឈការអំណាចនៅថ្នាក់ក្រោមជាតិ ស្របពេលគ្នាឡើងកាន់តំណែងជាប្រធានបក្សរបស់លោក កឹម សុខា នេះដែរ អ្នកនាំពាក្យបក្សកាន់អំណាចយល់ឃើញថា វាមិនទាន់ប្រាកដនៅឡើយទេ ថាតើជំហរនេះនឹងមានប្រសិទ្ធភាពកម្រិតណា។ លោក សុខ ឥសាន យល់ឃើញថា អាចទៅរួច ឬមិនអាចនោះ សំខាន់រឿងការអនុវត្តជាក់ស្ដែងប៉ុណ្ណោះ ហើយការផ្ដល់ប្រតិភូអំណាចដូចនេះ បក្សប្រជាជនកម្ពុជា បានអនុវត្តជិត ៤០ឆ្នាំមកហើយ៖ «យើងមិនទាន់យកទ្រឹស្ដីហ្នឹង ពីព្រោះទ្រឹស្ដីហ្នឹងវាគ្រាន់តែទ្រឹស្ដីនៅលើក្រដាស វាមិនទាន់ប្រែក្លាយទ្រឹស្ដីឲ្យទៅជាការជាក់ស្ដែងដល់ភូមិឃុំទូទាំងប្រទេសនៅឡើយទេ»។
ចំណែកលោកបណ្ឌិត មាស នី អ្នកស្រាវជ្រាវការអភិវឌ្ឍសង្គម មើលឃើញថា វាជាមធ្យោបាយល្អ ប្រសិនបើគោលនយោបាយនេះ សម្រេចដូចការប្រកាសមែន។ ក៏ប៉ុន្តែលោកយល់ឃើញថា ទន្ទឹមនឹងភាពជោគជ័យលើកម្មវិធីនយោបាយនេះ បញ្ហាដែលអាចនឹងកើតឡើង គឺការគ្របគ្រងថវិកាឲ្យមានតម្លាភាព៖ «នេះជាការទន្ទឹងរង់ចាំក្នុងនាមខ្ញុំជាអ្នកសិក្សាសង្គម ខ្ញុំចង់ឃើញ ចង់ឃើញលុយធ្លាក់ទៅតាមឃុំឲ្យបានច្រើន។ យើងគិតចង់ឲ្យបានមួយលានដុល្លារណោះទៅថ្ងៃមុខ»។
លោក កឹម សុខា បញ្ជាក់ជំហរថា គណបក្សប្រឆាំងនៅតែខ្លាំង ហើយរឹងមាំ និងធ្វើដំណើរឆ្ពោះទៅមុខជានិច្ច បើទោះជាជួបឧបសគ្គក្ដី។ ជាងនេះទៀត លោកអះអាងថា បក្សប្រឆាំងសម្រេចឲ្យបាននូវគោលនយោបាយ កាត់បន្ថយអំពើពុករលួយ ជាពិសេសនៅតាមសេវាសាធារណៈរបស់រដ្ឋ ដូចការធ្វើសំបុត្រកំណើត ចេញប័ណ្ណកម្មសិទ្ធិដីធ្លី និងពិនិត្យច្បាប់សញ្ជាតិឲ្យបានត្រឹមត្រូវជាដើម។ ក៏ប៉ុន្តែ បក្សកាន់អំណាចឲ្យដឹងថា កម្មវិធីទាំងនេះ ខ្លួនបានអនុវត្តច្រើនអាណត្តិណាស់មកហើយ ហើយក៏កំពុងធ្វើកំណែទម្រង់កម្មវិធីនយោបាយបន្ថែមទៀតឲ្យមានភាពល្អប្រសើរជាងនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។