មន្ត្រីជាន់ខ្ពស់របស់គណបក្សសង្គ្រោះជាតិ ចោទប្រកាន់ថា រដ្ឋាភិបាលដែលដឹកនាំដោយលោកនាយករដ្ឋមន្ត្រី ហ៊ុន សែន បច្ចុប្បន្ន គឺបានបំផ្លាញអ្វីៗគ្រប់យ៉ាងរបស់ជាតិ ក្នុងនោះដោយរួមទាំងដី ព្រៃឈើ និងមច្ឆាជាតិជាដើម។ បន្ថែមពីលើនេះទៀត គ្រប់សម័យកាល និងស្ទើរគ្រប់របប ពុំមានរបបណាមួយដែលអន់ជាងការដឹកនាំក្នុងអាណត្តិរបស់លោកនាយករដ្ឋមន្ត្រីឡើយ។
ចំណែកមន្ត្រីរដ្ឋាភិបាលវិញ ច្រានចោលការចោទប្រកាន់នេះ ដោយចាត់ថា គណបក្សសង្គ្រោះជាតិ កំពុងតែធ្វើឲ្យបរិយាកាសនយោបាយកាន់តែអួអាប់ទៅៗ ហើយមើលខុសចំពោះរដ្ឋាភិបាលឲ្យក្លាយជាសត្រូវទៅវិញ។
កម្ដៅនយោបាយ ការឌឺដងផ្លែផ្កាដាក់គ្នារវាងគណបក្សដែលឈ្នះឆ្នោតទាំងពីរនៅពេលនេះ ហាក់ផ្ទុះឡើងវិញ បើទោះជាមានការអំពាវនាវជាហូរហែកន្លងទៅរបស់លោក ហ៊ុន សែន ថា គួរប្រើប្រាស់រដ្ឋសភាដើម្បីជជែកដេញដោលរកខុសត្រូវ ជាជាងដើរនិយាយនៅតាមទីសាធារណៈក៏ដោយ។
ថ្វីបើនៅពេលនេះ ថ្ងៃឃោសនា ឬយុទ្ធនាការបោះឆ្នោត មិនទាន់បានចាប់ផ្ដើមក្តី ក៏សង្កេតឃើញថា អ្នកនយោបាយហាក់កំពុងធ្វើយុទ្ធនាការរកសំឡេងឆ្នោតតែរៀងៗខ្លួនទៅហើយ។ លោកនាយករដ្ឋមន្ត្រី ហ៊ុន សែន ដៀមដាម ឌឺដងឲ្យគណបក្សប្រឆាំងរាល់ពេលមានវេទិកាសាធារណៈម្តងៗ។ ចំណែកគណបក្សប្រឆាំងវិញ ក៏មិនអន់ណាស់ដែរ ក្នុងការឆ្លើយតប ជាពិសេសចំណុចខ្វះចន្លោះរឿងអនុវត្តគោលនយោបាយរបស់រដ្ឋាភិបាលនោះ។
លោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទីមួយនៃរដ្ឋសភា អះអាងកាលពីព្រឹកថ្ងៃទី១៨ មករា នៅក្នុងវេទិកាសាធារណៈ នាសង្កាត់ព្រែកលៀប ថា បច្ចុប្បន្នប្រទេសកម្ពុជា បាត់បង់ស្ទើរគ្រប់វិស័យក្នុងកណ្ដាប់ដៃនៃការដឹកនាំរបស់គណបក្សប្រជាជនកម្ពុជា ជាពិសេស លោកចោទប្រកាន់ថា លោកនាយករដ្ឋមន្ត្រី ហ៊ុន សែន គឺជាបុគ្គលដែលដឹកនាំអន់ជាងគេ បើប្រៀបធៀបក្នុងរបបមុនៗ ដែលបានធ្វើឲ្យធនធានធម្មជាតិត្រូវបាត់បង់ និងបណ្ដោយឲ្យមានការរំលោភសិទ្ធិមនុស្សម្ដងហើយម្ដងទៀត មិនចេះចប់មិនចេះហើយ ក្នុងរយៈពេល ៣ទសវត្សរ៍កន្លងទៅនេះ។
លោក កឹម សុខា ចំអកឲ្យលោក ហ៊ុន សែន នៅចំពោះមុខអ្នកគាំទ្ររបស់លោកប្រហែល ១ពាន់នាក់ ក្នុងខណ្ឌជ្រោយចង្វារ ជាយរាជរាជធានីភ្នំពេញ ថា លោក ហ៊ុន សែន ពុំមានសមត្ថភាពដឹកនាំប្រទេសឲ្យរីកចម្រើនដូចអរិយប្រទេសដទៃឡើយ ក្រៅពីដឹកនាំតាមរបៀបដដែលៗ ពីមួយអាណត្តិទៅមួយអាណត្តិ៖ «គណបក្សប្រជាជនកម្ពុជា បងប្អូនជ្រាបហើយថា ការដឹកនាំរបស់គាត់ ៣០ឆ្នាំមកនេះ គឺគ្រប់គ្រាន់ហើយ ដែលមតិជាតិ អន្តរជាតិគេស្គាល់គាត់ច្បាស់ហើយ។ បញ្ហាជាច្រើនក្នុងសង្គមខ្មែរសព្វថ្ងៃនេះ បើមានអ្នកដឹកនាំគ្រាន់បើបន្តិច គេដោះស្រាយបានគួរសមណាស់ហើយ ប៉ុន្តែនេះវាអន់ មហាអន់ពេក! ៣០ឆ្នាំហើយប្រជារាស្ត្រនៅវេទនា បញ្ហាសង្គមនៅស្មុគស្មាញដដែល...»។
ការថ្លែងសារនយោបាយរបស់លោក កឹម សុខា អំពីភាពអសកម្មក្នុងការអនុវត្តគោលនយោបាយរបស់រដ្ឋាភិបាលនេះ ហាក់អន្ទងចិត្តអ្នកគាំទ្រសម្បើមណាស់ក្នុងពិធីនោះ។ មនុស្សម្នាក់ៗ ញញឹម ហើយស្រែកបន្ទរតាមក្រោយយ៉ាងកងរំពងពេញវេទិកា។
បើទោះជាបែបនេះក៏ដោយចុះ លោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី យល់ឃើញថា សារនយោបាយរបស់លោក កឹម សុខា គឺគ្រាន់តែដើម្បីធ្វើឲ្យបរិយាកាសនយោបាយអួអាប់ និងការយល់ខុសរបស់សាធារណជនមកលើរដ្ឋាភិបាលប៉ុណ្ណោះ។ លោកបន្តថា រដ្ឋាភិបាលបានជម្នះគ្រប់ឧបសគ្គក្នុងកិច្ចខិតខំប្រឹងប្រែងរបស់ខ្លួន ដើម្បីនាំមកនូវសន្តិភាពសម្រាប់ប្រទេសជាតិទម្រាំមានថ្ងៃនេះ៖ «ខ្ញុំថាលោក កឹម សុខា កំពុងពុលនឹងឧត្ដមគតិខ្លួនឯងជ្រុលហួសហេតុពេកហើយ។ ការនិយាយបំផ្លើសខុសពីការពិតនេះ មានតែប្រជាពលរដ្ឋខ្មែរទេដែលជាអ្នកវិនិច្ឆ័យ។ ការលើកលើងថា ការដឹកនាំរបស់សម្ដេចតេជោ ហ៊ុន សែន ថាអាក្រក់ជាងគេក្នុងប្រវត្តិសាស្ត្រ គឺជាការកុហក បំភ្លៃសាធារណៈមតិទាំងស្រុង»។
លោក អ៊ូ វីរៈ ប្រធានអង្គការនៃវេទិកាអនាគត ចាត់ទុកថា ការថ្លែងសារនយោបាយណាមួយរបស់មេដឹកនាំគណបក្ស គឺជារឿងធម្មតានៅក្នុងសង្គមប្រជាធិបតេយ្យក្នុងពិភពលោក ពោលគឺពុំមានអ្វីទាស់ខុសនោះទេ។ ផ្ទុយទៅវិញ នេះជាយន្តការក្នុងការបណ្ដុះស្នូលនៃសេរីភាពបញ្ចេញមតិថែមទៀងផង។ លោកបញ្ជាក់ថា មិនខុសគ្នាទេក្នុងប្រវត្តិសាស្ត្រនយោបាយ បើប្រៀបធៀបនឹងរបបមុនៗ ដែលដឹកនាំហើយមានកំហុសនោះ។ បើទោះជាបែបណា លោកទទួលស្គាល់ថា សព្វថ្ងៃពិតជាមានបញ្ហា ហើយបានបន្តចាក់ស្រេះក្រោមគោលនយោបាយពិតមែន៖ «វាអត់មានបញ្ហាអីទេក្នុងរបបប្រជាធិបតេយ្យ ពួកគណបក្សនយោបាយគាត់និយាយតាមឆន្ទៈរបស់គាត់ បញ្ចុះបញ្ចូលប្រជាពលរដ្ឋ គឺជារឿងធម្មតារបស់គាត់ តទល់គ្នាជារឿងធម្មតា កុំឲ្យតែប្រើហិង្សា និងប្រើធម៌ក្ដៅ...»។
លោក អ៊ូ វីរៈ ចាត់ទុកថា ជាទម្លាប់ក្នុងសង្គមប្រជាធិបតេយ្យ អ្នកនយោបាយតែងប្រើប្រាស់វេទិកាដើម្បីរិះគន់ចំណុចខ្សោយរបស់គួរបដិបក្ខក្នុងការដណ្ដើមប្រជាប្រិយភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។