អាជ្ញាធរភូមិមួយចំនួនបញ្ជាក់ថា ប្រជាពលរដ្ឋដែលបានមកទទួលព្រះរាជអំណោយនៅព្រឹកថ្ងៃទី១៣ ខែតុលា មានទឹកចិត្តសប្បាយរីករាយ។ ដោយឡែកប្រជាពលរដ្ឋរងគ្រោះមួយចំនួនទៀត ដែលមិនបានមកទទួលព្រះរាជអំណោយរបស់ព្រះមហាក្សត្រនៅពេលនេះ នឹងកើតទុក្ខមិនសុខចិត្ត ហើយបានស្ដីបន្ទោសអាជ្ញាធរភូមិ។
មេភូមិឪម៉ាល់ ឃុំអំពិលទឹក លោក ឈឹម សំអឿន មានប្រសាសន៍នៅព្រឹកថ្ងៃទី១៣ ខែតុលា ថា លោកបានបើកទូកដឹកប្រជាពលរដ្ឋរងគ្រោះដោយសារទឹកជំនន់នៅក្នុងភូមិចំនួន ១៥គ្រួសារ ក្នុងចំណោមជាង ២០គ្រួសារ មកបើកអំណោយពីព្រះមហាក្សត្រ។
លោក ឈឹម សំអឿន៖ «ក្រៅពីហ្នឹងវាលិចដែរ ប៉ុន្តែគេឲ្យតែ១៥ អ៊ីចឹងយើងបានតែ ១៥ ឲ្យគាត់ខ្វះ ១០ទៀត។ បើតាមពិតមិនមែនខ្វះ ១០ទេ វាខ្វះដែរ បន្តគ្នា ប៉ុន្តែក្នុងហ្នឹងយើងមើលអាណាដែលពិបាកជាងគេយើងឲ្យទៅគាត់»។
ចំណែកមេភូមិខ្លាគ្រហឹម លោក ជា ហុំ បញ្ជាក់ថា នៅក្នុងភូមិរបស់លោកមានប្រជាពលរដ្ឋសរុប ៣២៧គ្រួសារ ក្នុងនោះមាន ៣០គ្រួសារ បានរងផលប៉ះពាល់ពីគ្រោះទឹកជំនន់ ក៏ប៉ុន្តែគ្រួសារដែលបានមកទទួលព្រះរាជអំណោយនៅថ្ងៃនេះមានចំនួន ១៧គ្រួសារ។
លោកបន្តថា ក្រោយពីការចែកអំណោយម្ដងៗ ប្រជាពលរដ្ឋតែងតែរិះគន់ ឬស្ដីបន្ទោសដាក់អាជ្ញាធរ៖ «អ្នកដែលលិចទឹកនេះ លិចមុនរាយការណ៍មកមុន អានេះលើកទីមួយហើយ តាំងពីលិចមក។ មានការត្រេកអរចំពោះបងប្អូនយើងដែលមានបញ្ហាការលំបាកបានសម្ដេចយកអំណោយមកឲ្យនេះ ត្រេកអរពិសេសហើយ»។
ទាក់ទងនឹងបញ្ហានេះអភិបាលស្រុកកំពង់ត្រឡាច លោក ហ៊ុល ចាន់ថូ ថ្លែងថា នៅស្រុកកំពង់ត្រឡាច មានឃុំចំនួន២ ដែលមានផលប៉ះពាល់ពីគ្រោះទឹកជំនន់ ហើយចំនួនគ្រួសារដែលបានមកទទួលព្រះរាជអំណោយរបស់ព្រះមហាក្សត្រ គឺអាជ្ញាធរកំណត់យកតែគ្រួសារណាដែលរងផលប៉ះពាល់ធ្ងន់ធ្ងរ៖ «ការចែកនេះភាគច្រើនគឺខាងរដ្ឋអំណាច អាជ្ញាធរ លោកមើលទៅលើអ្នកដែលជាក់ស្ដែង និយាយរួមទៅគឺថា អ្នកដែលគាត់អត់ គាត់ក្រីក្រ ព្រោះនៅក្នុងចំណោមលិចទឹកទាំងអស់វាលិចដូចគ្នា ប៉ុន្តែគ្រាន់ថា ប្រជាពលរដ្ឋមានអ្នកមានអ្នកក្រ»។
ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ទ្រង់បានយាងតាមព្រះទីន័ងនាវា មកដល់ភូមិសំរឹទ្ធិជ័យ ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង នៅវេលាម៉ោង ៨ និង ៣០នាទី ព្រឹកថ្ងៃទី១៣ ខែតុលា ដើម្បីចែកព្រះរាជអំណោយដល់ប្រជាពលរដ្ឋដែលរងផលប៉ះពាល់ដោយសារគ្រោះទឹកជំនន់ ហើយនៅក្នុងអំឡុងពេលនៃព្រះរាជពិធីចែកអំណោយនោះ ក៏មានភ្លៀងធ្លាក់មួយមេផងដែរ។
ព្រះរាជអំណោយដែលព្រះមហាក្សត្រ ទ្រង់យាងចុះចែកនោះក្នុងមួយគ្រួសារបានទទួលរួមមាន អង្ករ ៥០គីឡូក្រាម កៅស៊ូតង់ ១ មុង ១ ភួយ ១ ក្រមា ១ សារុង ១ អាវយឺត ១ មី ១កេស ត្រីខ ១០កំប៉ុង និងថវិកាចំនួន ១០ម៉ឺនរៀល។
វិទ្យុអាស៊ីសេរីមិនអាចទាក់ទងអភិបាលខេត្តកំពង់ឆ្នាំង លោក ឈួរ ច័ន្ចឌឿន និងទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា ដើម្បីសុំការអត្ថាធិប្បាយជុំវិញស្ថានភាពទឹកជំនន់ និងផលប៉ះពាល់របស់ប្រជាពលរដ្ឋបានទេ នៅល្ងាចថ្ងៃទី១៣ ខែតុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។