លោក ហ៊ុន ម៉ាណែត សម្រេចអញ្ជើញទៅចូលរួមពិធីចូលឆ្នាំប្រពៃណីខ្មែរនៅសហរដ្ឋអាមេរិក ប៉ុន្តែលោកមិនចូលរួមកម្មវិធីព្យុហយាត្រាតាមការគ្រោងទុករបស់ពលរដ្ឋខ្មែរនៅទីនោះទេ ដោយលោកលើកហេតុផលមិនចង់ឃើញមានការខ្វែងគំនិតគ្នារវាងខ្មែរ និងខ្មែរ។
កូនប្រុសច្បងរបស់ លោក ហ៊ុន សែន គឺលោក ហ៊ុន ម៉ាណែត មេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ បានសរសេរនៅលើបណ្ដាញសង្គមហ្វេសប៊ុក (Facebook) នៅព្រឹកថ្ងៃទី២៧ ខែមីនា ដោយពន្យល់ថា ការសម្រេចមិនចូលរួមនោះ ព្រោះសកម្មជនពីររូបរបស់គណបក្សសង្គ្រោះជាតិ គឺលោក ទូច វិបុល ប្រធានអង្គការសម្ព័ន្ធមិត្តខ្មែរ-អាមេរិកាំង និងលោក ប្រាឌី ណុយ យ៉ាំង (Brady Nuy Young) តែងប្រកាសធ្វើបាតុកម្មគ្រប់ទីកន្លែងប្រឆាំងវត្តមានលោក ក្នុងពិធីព្យុហយាត្រានោះ។
ពលរដ្ឋខ្មែរ-អាមេរិកាំង តែងតែព្រមានធ្វើបាតុកម្មប្រឆាំងវត្តមានរបស់ លោក ហ៊ុន ម៉ាណែត និងឧកញ៉ា គិត ម៉េង ប្រធានក្រុមហ៊ុន រ៉ូយ៉ាល់ គ្រុប (Royal Group) និងមន្ត្រីរដ្ឋាភិបាល ព្រមទាំងអង្គការក្រៅរដ្ឋាភិបាលមួយចំនួនទៀត ដែលគ្រោងចូលរួមក្នុងកម្មវិធីវប្បធម៌ខ្មែរក្នុងទីក្រុងឡុងប៊ិច (Long Beach) រដ្ឋកាលីហ្វ័រញ៉ា (California) នៅថ្ងៃទី១០ ខែមេសា ខាងមុខនេះ។
កាលពីពេលថ្មីៗនេះ នៅទីក្រុងឡុងប៊ិច រដ្ឋកាលីហ្វ័រញ៉ា មានជំនួបប្រជុំមួយដែលរៀបចំឡើងដោយសភាសង្គមខ្មែរ ចូលរួមដោយពលរដ្ឋខ្មែរ-អាមេរិកាំង ប្រមាណ ២០០នាក់ និងតំណាងមន្ត្រីរបស់ទីក្រុងខ្មែរនៅទីនោះ រហូតមានការខ្វែងគំនិតគ្នាយ៉ាងតឹងតែងស្ទើរកើតអំពើហិង្សា។
លោក ហ៊ុន ម៉ាណែត មុននឹងប្រកាសមិនចូលរួមព្យុហយាត្រាក្នុងពិធីបុណ្យចូលឆ្នាំនៅសហរដ្ឋអាមេរិក ពេលនេះ បន្ទាប់ពីលោកធ្លាប់បានបង្ហាញឆន្ទៈថា នឹងចូលរួម ប៉ុន្តែលោកស្នើឲ្យមានអ្នករៀបចំកម្មវិធីអញ្ជើញប្រមុខគណបក្សប្រឆាំងចូលរួមផងដែរ៕
[ ចុចត្រង់នេះដើម្បីអាន និងស្ដាប់ព័ត៌មានពិស្ដារ!Opens in new window ]
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។