ពាក្យពេចន៍ដែលមេដឹកនាំបក្សប្រឆាំង និងអ្នកគាំទ្របានលើកឡើងក្នុងវេទិកាប្រមូលផ្តុំនាទីលានប្រជាធិបតេយ្យរយៈពេល ៣ថ្ងៃមកនេះ គឺទាមទារឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង និងទាមទារបោះឆ្នោតសភានីតិកាលទី៥ ឡើងវិញ។ (សំឡេងស្រែកឲ្យលោក ហ៊ុន សែន ចុះចេញពីតំណែង)
សារប្រកាសតាមប្រដាប់បំពងសំឡេង ឬមីក្រូ បានលាន់ឮជាប្រចាំនៅក្នុងវេទិកាប្រមូលផ្តុំធ្វើមហាបាតុកម្មអហិង្សា ផ្ដើមដោយមេដឹកនាំគណបក្សសង្គ្រោះជាតិ នាទីលានប្រជាធិបតេយ្យចាប់ពីថ្ងៃទី១៥ ដល់ថ្ងៃទី១៧ ខែធ្នូ។
លោក សម រង្ស៊ី និងលោក កឹម សុខា ប្រធាន អនុប្រធានគណបក្សសង្គ្រោះជាតិ និងអ្នកគាំទ្របានស្រែកទាមទារឲ្យលោក ហ៊ុន សែន ចុះចេញពីតំណែង និងទាមទារឲ្យរៀបចំបោះឆ្នោតសភានីតិកាលទី៥ ឡើងវិញ។ ជាការកត់សម្គាល់ សារដែលមេដឹកនាំបក្សប្រឆាំងបានលើកឡើងក្នុងមហាបាតុកម្មអហិង្សាពេលនេះ មានលក្ខណៈខុសប្លែកពីពេលមុនៗ។ សារពេលមុន គឺបានស្រែកទាមទារឲ្យមានការអង្កេត ឬរាប់សន្លឹកឆ្នោតនៃការបោះឆ្នោតសភានីតិកាលទី៥ ឡើងវិញ ប៉ុន្តែពេលនេះខុសស្រឡះ៖ «នាំសារទៅណា គឺនាំសារទៅផ្សារ នៅផ្សារចាស់ ទៅផ្សារថ្មី ទៅផ្សារអូឡាំពិក ឬទៅផ្សារទួលទំពូងជាដើម»។
បន្ថែមលើនេះ សមាជិកគាំទ្របក្សសង្គ្រោះជាតិ និងពលរដ្ឋខ្មែរមកពីក្រៅស្រុកដែលគេនិយមហៅថា អាណិកជនខ្មែរនោះ ក៏បានទាមទារឲ្យលោក ហ៊ុន សែន លាលែងតួនាទីនាយករដ្ឋមន្ត្រី ដោយបានចោទថា ក្រោមការដឹកនាំរបស់លោក ហ៊ុន សែន បង្កើតឲ្យមានអំពើពុករលួយ បក្សពួកនិយម បំផ្លាញធនធានធម្មជាតិ រំលោភសិទ្ធិមនុស្ស និងការគំរាមកំហែងជាដើម៖ «ចុះៗៗ? ហ៊ុន សែន អើយ! ចុះចេញទៅៗៗៗៗ»។
ពលរដ្ឋដើមកំណើតខ្មែររស់នៅប្រទេសបារាំង និងសហរដ្ឋអាមេរិក ជាដើម ក៏បានឡើងទាមទារក្នុងវេទិកាប្រមូលផ្តុំនាទីលានប្រជាធិបតេយ្យ ស្នើឲ្យលោក ហ៊ុន សែន ចុះចេញពីតំណែងដូចគ្នា មេដឹកនាំបក្សប្រឆាំង និងពលរដ្ឋខ្មែរដទៃទៀតដែរ៖ «សប្ដាហ៍មុននេះ សមាជិកសភាអាមេរិក ដ៏ក្លាហានចំនួន ២នាក់ លោកបានមានប្រសាសន៍ថា ហ៊ុន សែន Must go...! ហ៊ុន សែន Must go..!។ បងប្អូនត្រូវតែងើបឈរទាំងអស់គ្នាពីថ្ងៃនេះតទៅ»។
សំឡេងទាមទារឲ្យលោក ហ៊ុន សែន ចុះចេញពីតំណែង មិនមែនមានតែនៅលើវេទិកានាទីលានប្រជាធិបតេយ្យទេ ក៏ប៉ុន្តែបានលាន់ឮព្រមៗគ្នា ពេលលោក សម រង្ស៊ី និងលោក កឹម សុខា ដឹកនាំហែក្បួនតាមផ្លូវសាធារណៈមួយចំនួនក្នុងរាជធានីភ្នំពេញ។
យ៉ាងណាក៏ដោយ មន្ត្រីសាលារាជធានីភ្នំពេញ បានព្រមានបក្សប្រឆាំងឲ្យទទួលខុសត្រូវទាំងស្រុងចំពោះមុខច្បាប់នូវរាល់បញ្ហាផ្សេងៗ ដែលកើតមានឡើងក្នុងពេលដឹកនាំធ្វើបាតុកម្ម។
លោក ឃួង ស្រេង អភិបាលរងរាជធានីភ្នំពេញ បានចោទថា ការធ្វើបាតុកម្មរបស់គណបក្សសង្គ្រោះជាតិ គ្មានច្បាប់អនុញ្ញាតពីក្រសួងមហាផ្ទៃ និងអាជ្ញាធរមូលដ្ឋានទេ។ លោក ឃួង ស្រេង ព្រមានថា រាល់បញ្ហាកើតមានពេលធ្វើបាតុកម្ម ឬការហែក្បួនរបស់បក្សសង្គ្រោះជាតិ នាថ្ងៃខាងមុខ អាជ្ញាធរមិនទទួលខុសឡើយ ហើយថា បក្សប្រឆាំងត្រូវតែទទួលខុសត្រូវចំពោះមុខច្បាប់។
គណបក្សសង្គ្រោះជាតិ បានប្រកាសថា បក្សនេះនឹងដឹកនាំប្រជាពលរដ្ឋធ្វើបាតុកម្មជារៀងរាល់ថ្ងៃ ហើយបានចាប់ផ្ដើមកាលពីថ្ងៃទី១៥ ខែធ្នូ នៅទីលានប្រជាធិបតេយ្យរហូតទាល់តែមានដំណោះស្រាយ។ មេដឹកនាំបក្សប្រឆាំងអះអាងថា បាតុកម្មនេះ នឹងមានការដើរហែក្បួនតាមផ្លូវមួយចំនួន ក្នុងរាជធានីភ្នំពេញ ដោយមានគោលបំណងទាមទារឲ្យលោក ហ៊ុន សែន ចុះចេញពីតំណែង និងទាមទារឲ្យមានការបោះឆ្នោតឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។