មន្ត្រីជាន់ខ្ពស់យោធាកម្ពុជា និងជាកូនប្រុសលោកនាយករដ្ឋមន្ត្រី ហ៊ុន សែន និយាយថា ការប្រកួតកីឡាយោធាដែលបង្ហាញរថពាសដែកនៅកណ្ដាលក្រុងភ្នំពេញ ដើម្បីបង្ហាញពីការចូលរួមរវាងយោធា និងមហាជន។ ប៉ុន្តែបក្សប្រឆាំង និងអ្នកវិភាគយល់ថា ពិធីនេះមិនសមធ្វើនៅក្នុងក្រុងនោះទេ ព្រោះធ្វើឲ្យពលរដ្ឋភ័យខ្លាច។
ការបង្ហាញកម្លាំងយោធាតាមរយៈការប្រកួតកីឡាយោធា មានការតាំងបង្ហាញសម្ភារៈយោធា និងរថពាសដែកនៅកណ្ដាលក្រុងភ្នំពេញ ជាលើកទី១ ដែលកូនប្រុសលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត ចេញមុខរៀបចំមិនទទួលបានការស្វាគមន៍ពីគណបក្សប្រឆាំង និងអ្នកវិភាគនោះឡើយ។ ពួកគេយល់ថា សកម្មភាពនេះ នឹងធ្វើឲ្យប៉ះពាល់ដល់លទ្ធផលនៃការបោះឆ្នោតក្នុងឆ្នាំ២០១៧ នេះ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងថា លោកមិនយល់សោះហេតុអីរដ្ឋាភិបាលធ្វើពិធីនេះនៅកណ្ដាលក្រុងភ្នំពេញ ត្បិតអីលោកធ្លាប់ឃើញបណ្ដាប្រទេសនានា គេមិនដែលធ្វើពិធីដូច្នេះនៅក្នុងក្រុង ឬទីប្រជុំជននោះទេ។ ជាងនេះទៅទៀត លោក យឹម សុវណ្ណ យល់ថា រូបភាពនេះនឹងធ្វើឲ្យភ្ញាក់ផ្អើល បង្កការភ័យខ្លាច ដែលប៉ះពាល់ដល់លទ្ធផលនៃការបោះឆ្នោត៖ «គេយកទាហានចូលក្នុងក្រុង ខ្ញុំក៏មិនដឹងថា គេមានជំនាញលើសពីខ្ញុំក៏ខ្ញុំមិនដឹងដែរ ប៉ុន្តែខ្ញុំយល់ថា ធ្វើអ៊ីចឹងឲ្យពលរដ្ឋភ័យខ្លាច ព្រោះគាត់មិនដឹងថា កើតស្អីទៀតហើយទេ ហើយវាជិតបោះឆ្នោតឃុំទៅទៀត យើងត្រូវប្រយ័ត្នប្រយែង ពេលជិតបោះឆ្នោតឃុំ បោះឆ្នោតជាតិ យើងមិនត្រូវធ្វើអ្វីពលរដ្ឋភ័យខ្លាចទេ ព្រោះវាប៉ះពាល់ដល់លទ្ធផលនៃការបោះឆ្នោត»។
ប្រតិកម្មរបស់គណបក្សប្រឆាំងបែបនេះ បន្ទាប់ពីនាយរងសេនាធិការចម្រុះនៃកងយោធពលខេមរភូមិន្ទ លោក ហ៊ុន ម៉ាណែត ថ្លែងក្នុងពិធីសែនក្រុងពាលីនៃការប្រកួតកីឡាយោធា នៅថ្ងៃទី៥ ខែមករា។ លោកថា ការប្រកួតកីឡាយោធានៅក្នុងទីក្រុងភ្នំពេញ ដើម្បីផ្សារភ្ជាប់រវាងកងទ័ព និងមហាជន និងចង់ឲ្យយុវជនស្គាល់ពីកងទ័ព។ លោកយល់ថា ការប្រកួតនេះគ្មានចេតនាគំរាមកំហែងដល់អ្នកណានោះ លោកថា សូម្បីការចល័តយុទ្ធភណ្ឌកងទ័ពក៏ត្រូវធ្វើនៅពេលយប់ដែរ ជៀសវាងធ្វើឲ្យពលរដ្ឋភ័យខ្លាច៖ «សុំបងប្អូនបើកទូលាយនៅក្នុងការពិនិត្យនេះ ខ្ញុំថាមិនគួរវិភាគអីជ្រៅក្រៅពីអ្វីនៅពេលនេះទេ ព្រោះជាការដែលយើងបានធ្វើជាង ១០ឆ្នាំមកហើយ គ្រាន់តែលើកមកកោះពេជ្រ ដើម្បីឲ្យមហាជនបានចូលរួម»។
លោក ហ៊ុន ម៉ាណែត ឲ្យដឹងដែរថា ការប្រកួតនេះក្រសួងការពារជាតិ បានធ្វើជាង ១០ឆ្នាំ ដោយឡែកការបង្ហាញការធ្វើពិធីនេះ នៅទីសាធារណៈជាលើកទី១។ លោកថា អ្នកចូលរួមប្រកួតអ្នកចូលរួមជាង ៥០០នាក់ ដែលមានយុវជន អ្នកសិល្បៈ និងអង្គភាពទ័ពជើងទឹក ជើងគោក។ ការរៀបចំកម្មវិធីប្រកួតកីឡាកងយោធពលខេមរភូមិន្ទ ដើម្បីអបអរសាទរទិវា ៧ មករា និងប្រមូលមូលនិធិគាំទ្រសកម្មភាពសមាគមអតីតយុទ្ធជនកម្ពុជា ចាប់ពីថ្ងៃទី៦ ដល់ថ្ងៃទី៨ ខែមករា នៅមជ្ឈមណ្ឌលសន្និបាត និងពិព័រណ៍កោះពេជ្រ។
ចំណែកអ្នកវិភាគនយោបាយ លោក សូ ចន្ថា លើកឡើងថា រូបភាពនេះ អាចជាការគំរាមកំហែងនយោបាយមុនការបោះឆ្នោត។ លោកបន្តថា កណ្ដាលក្រុងភ្នំពេញ មិនសមនឹងធ្វើពិធីនេះទេ ព្រោះមូលដ្ឋានយោធាមិនមែននៅក្នុងទីក្រុង ម្យ៉ាងវិញទៀត ប្រទេសកម្ពុជា មានទីកន្លែងច្រើនណាស់ដែលមិនមែនជាទីប្រជុំជនដើម្បីរៀបចំកម្មវិធីប្រកួតកីឡាយោធា៖ «វាជាការពិតនៅពេលដែលមានការបង្ហាញរថក្រោះ បង្ហាញរូបភាពកងទ័ពនៅកណ្ដាលក្រុង ចង់មិនចង់វាធ្វើឲ្យប៉ះពាល់ដល់អារម្មណ៍របស់ពលរដ្ឋ»។
សេចក្ដីជូនដំណឹងរបស់សាលារាជធានីភ្នំពេញ កាលពីថ្ងៃទី៤ ខែមករា ឲ្យដឹងថា រថពាសដែកចំនួន ២គ្រឿង និងរថយន្តយោធាចំនួន ១៥គ្រឿង នឹងត្រូវបញ្ជូនចូលក្រុងភ្នំពេញ នៅវេលាម៉ោង ២ទៀបភ្លឺ ថ្ងៃទី៥ ខែមករា ឆ្លងកាត់កំណាត់ផ្លូវជាតិលេខ៣ ផ្លូវវ៉េងស្រេង មហាវិថីព្រះមុនីរ៉េត មហាវិថីម៉ៅសេទុង និងមហាវិថីសុធារស ឆ្ពោះទៅមជ្ឈមណ្ឌលសន្និបាត និងពិព័រណ៍កោះពេជ្រ កម្មវិធីប្រកួតកីឡាកងយោធពលខេមរភូមិន្ទ។ សេចក្ដីជូនដំណឹងដដែលឲ្យដឹងទៀតថា ការចល័តយុទ្ធភណ្ឌកងទ័ពនៅរាជធានីភ្នំពេញ ចេញពីកងពលតូចអន្តរាគមន៍លេខ៧០ ហើយត្រឡប់ចូលបន្ទាយវិញ នៅថ្ងៃទី៩ មករា វេលាម៉ោង ២ទៀបភ្លឺ។
រដ្ឋធម្មនុញ្ញកម្ពុជា ចែងថា កងកម្លាំងរួមមាននគរបាល និងយោធាជាអ្នកអព្យាក្រឹត ប៉ុន្តែកន្លងមកមានការចោទប្រកាន់ថា គណបក្សកាន់អំណាចប្រើប្រាស់កម្លាំងដើម្បីប្រយោជន៍បក្ស។ យ៉ាងណាក្នុងបាតុកម្មទាមទារដំឡើងប្រាក់ខែរបស់កម្មករកាលពីឆ្នាំ២០១៤ ខណៈស្ថានការណ៍នយោបាយរវាងគណបក្សធំៗទាំងពីរកំពុងឡើងកម្ដៅរដ្ឋាភិបាលបានបញ្ចេញកម្លាំងយោធាដើម្បីបង្ក្រាបយ៉ាងហិង្សាលើក្រុមនេះ។
តែទោះយ៉ាងនេះក្ដី លោក ហ៊ុន ម៉ាណែត បដិសេធធ្វើអត្ថាធិប្បាយនៅពេលមានអ្នកកាសែតសួរសំណួរទាក់ទងរឿងនេះ។ ដោយឡែកមេទាហានផ្កាយមាស៤ នៃកងយោធពលខេមរភូមិន្ទ លោក ជា តារា ធ្លាប់លើកឡើងកាលពីឆ្នាំ២០១៥ ថា ថាកងទ័ពជាទ័ពរបស់គណបក្សប្រជាជនកម្ពុជា។ រីឯលោក ហ៊ុន សែន កាលពីពេលថ្មីៗនេះ បានប្រកាសថា បើលោកនៅរស់គ្មានអ្នកណាឡើងកាន់អំណាចបានទេ ហើយថា លោកនឹងមានអាយុរហូតដល់ ៩៩ឆ្នាំឯណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។