មន្ត្រីអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) ថ្លែងប្រាប់អាស៊ីសេរី នៅរសៀលថ្ងៃទី៤ មិថុនា បន្ទាប់ពីបោះឆ្នោតរួចរាល់ថា មានពលរដ្ឋទូទាំងប្រទេសទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ ជាង៨៥ភាគរយ។
មន្ត្រីអ្នកនាំពាក្យគ.ជ.ប លោក ហង្ស ពុទ្ធា បន្តថា ចំនួនពលរដ្ឋទៅបោះឆ្នោតជាង៨៥ភាគរយនេះ គឺជាតួលេខបឋម។ ក្រៅពីនេះ មានភាពមិនប្រក្រតីមួយចំនួនដូចជា ការលួចថតរូបក្នុងបន្ទប់សម្ងាត់ និងរារាំងពីសំណាក់សមត្ថកិច្ច មិនឲ្យពលរដ្ឋឃ្លាំមើលការរាប់សន្លឹកឆ្នោតជាដើម។ បន្ថែមពីនេះលោកថា នៅខេត្តជាប់មាត់សមុទ្រមានខេត្តកោះកុង ព្រះសីហនុ និងខេត្តកំពត បានជួបប្រទះភ្លៀង ហើយបានប៉ះពាល់ដល់ដំណើរការបោះឆ្នោតខ្លះៗដែរ។
បញ្ជីបោះឆ្នោតថ្មីរបស់ គ.ជ.ប បង្ហាញថា មានពលរដ្ឋជិត ៨លាននាក់ បានចុះឈ្មោះបោះឆ្នោត។ ការបោះឆ្នោតជ្រើសរើសក្រុមប្រឹក្សាឆ្នាំ២០១៧ នេះ មានគណបក្សនយោបាយ ១២ ចូលរួមប្រកួតប្រជែង ក្នុងឃុំ-សង្កាត់ ចំនួន១.៦៤៦។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។