ប្រធានសមាគមអ្នកប្រជាធិបតេយ្យ និងជាម្ចាស់វិទ្យុសំបុកឃ្មុំ បានប្រកាសថា ខ្លួននឹងបង្កើតគណបក្សនយោបាយរបស់លោកឡើងវិញ ក្រោយពីធ្វើសមាជលាលែងពីប្រធានសមាគមរួច។
លោក ម៉ម សូណង់ដូ បានប្រាប់វិទ្យុអាស៊ីសេរី កាលពីថ្ងៃទី២២ មេសា ថា លោកនឹងចូលប្រឡូកក្នុងរឿងនយោបាយដោយផ្ទាល់ ហើយគណបក្សដែលលោកគ្រោងនឹងបង្កើតនៅរវាងចន្លោះពីខែកញ្ញា និងខែតុលា ខាងមុខនេះ ឈ្មោះថា គណបក្សសំបុកឃ្មុំសង្គមប្រជាធិបតេយ្យ។ លោកបន្តថា មូលហេតុដែលជំរុញឲ្យលោកសម្រេចចិត្តបង្កើតបក្សនយោបាយនៅពេលនេះ ពីព្រោះលោកយល់ឃើញថា នៅប្រទេសកម្ពុជា ពីពេលនេះទៅលែងមានគណបក្សប្រឆាំងទៀតហើយ។
លើសពីនេះទៀត លោក ម៉ម សូណង់ដូ បញ្ជាក់ថា គណបក្សសង្គ្រោះជាតិ ពុំអាចធ្វើជាស្ពានសម្រាប់ប្រជាពលរដ្ឋពឹងពាក់បានតទៅហើយ ហេតុនេះលោកថ្លែងថា នេះជាជម្រើសចុងក្រោយរបស់លោក ដែលត្រូវតែសម្រេចចិត្តបង្កើតគណបក្សនយោបាយថ្មីនៅពេលនេះ។ លោកបន្តថា «ពូបានបង្កើតសមាគមបួនឆ្នាំហើយ ហើយពូបានខំបង្ហាត់បង្រៀនប្រជាពលរដ្ឋឲ្យស្គាល់សិទ្ធិសេរីភាព ហើយនិងលទ្ធិប្រជាធិបតេយ្យពិតប្រាកដ ជាពិសេសសមាគមអ្នកប្រជាធិបតេយ្យហ្នឹងមុនគេ ដែលគាំទ្រអ្នកដឹកនាំគណបក្សសង្គ្រោះជាតិ។ រហូតមកដល់ពេលនេះ ពូគិតថា អ្នកដឹកនាំសង្គ្រោះជាតិហ្នឹង គាត់ឥតបានធ្វើអ្វីទាំងអស់។ កិច្ចសន្យារបស់គាត់ជាកិច្ចសន្យាខ្យល់»។
លោក ម៉ម សូណង់ដូ ឲ្យដឹងទៀតថា រហូតមកដល់ពេលនេះ គណបក្សដែលធ្លាប់ទទួលបរាជ័យម្ដងរួចមកហើយ កាលពីឆ្នាំ១៩៩៨ នោះ គ្រោងនឹងបង្កើតយកតាមលំនាំដើមរបស់គណបក្សចាស់ឡើងវិញដដែល។
រហូតមកដល់ពេលនេះ គណបក្សថ្មីដែលគ្រោងនឹងបង្កើតឡើងវិញនេះ នៅមិនទាន់មានឥស្សរជននយោបាយជាន់ខ្ពស់ពីគណបក្សផ្សេងចូលរួមនៅឡើយទេ ក្រៅពីប្រជាពលរដ្ឋប៉ុណ្ណោះ។ លោកនឹងដាក់ច្បាប់សុំទៅក្រសួងមហាផ្ទៃ ជាផ្លូវការ ដើម្បីបង្កើតគណបក្ស បន្ទាប់ធ្វើសមាជលាលែងពីតំណែងនៃប្រធានសមាគមអ្នកប្រជាធិបតេយ្យចន្លោះខែកញ្ញា និងខែតុលា ខាងមុខនេះ។
សូមស្ដាប់បទសម្ភាសន៍បន្ថែមជាមួយលោក ម៉ម សូណង់ដូ តាមការសាកសួររបស់លោក ជុន ច័ន្ទបុត្រ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។