គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី១១ ខែវិច្ឆិកា ប្រកាសពីលទ្ធផលបណ្ដោះអាសន្ននៃការចុះឈ្មោះបោះឆ្នោតបង្កើតបញ្ជីឈ្មោះបោះឆ្នោតឆ្នាំ២០១៦។ ក្នុងរយៈពេលជាង ២ខែ នៃដំណើរការចុះឈ្មោះនេះ មានពលរដ្ឋចុះឈ្មោះបានជិត ៧លាននាក់ហើយ។
គ.ជ.ប ក៏បានរកឃើញបញ្ហាមួយចំនួន រួមមានកំហុសនៅក្នុងការចុះឈ្មោះ និងមានឈ្មោះស្ទួននៅក្នុងបញ្ជី។ ក្រៅពីនេះ គ.ជ.ប ក៏បានដោះស្រាយបណ្ដឹងមួយចំនួនដែលកើតឡើងក្នុងដំណើរការនេះ។
លទ្ធផលបណ្ដោះអាសន្ននៃការចុះបញ្ជីឈ្មោះរបស់ គ.ជ.ប រកឃើញថា មានឈ្មោះដែលមានកំហុសចំនួនជាង ២១ម៉ឺននាក់ និងមានឈ្មោះស្ទួនចំនួនជិត ២ម៉ឺននាក់។
ថ្លែងនៅក្នុងពិធីប្រជុំផ្សព្វផ្សាយជាមួយភាគីពាក់ព័ន្ធសមាជិក គ.ជ.ប លោក ឌុច សុន អោយដឹងថា បញ្ហាសំខាន់ៗមួយចំនួនដែល គ.ជ.ប ជួបប្រទះនៅក្នុងដំណើរការចុះឈ្មោះបោះឆ្នោត ដោយការប្រើប្រាស់ប្រព័ន្ធកុំព្យូទ័រនេះ មានដូចជា ការធ្វេសប្រហែសរបស់អ្នកបំពេញការងារចុះឈ្មោះ និងការមិនផ្ទៀងផ្ទាត់អោយបានត្រឹមត្រូវរបស់ការីកុំព្យូទ័រ៖ «កំហុសឆ្គងទាំងនេះមិនគួរឲ្យខុសសោះ ព្រោះថា នៅពេលវាយឈ្មោះអ្នកចុះឈ្មោះបោះឆ្នោតតាមកុំព្យូទ័រ អ្នកចុះឈ្មោះបោះឆ្នោតបានមើលក្នុងអេក្រង់ (កញ្ចក់កុំព្យូទ័រ) មើលឈ្មោះ ថ្ងៃ ខែ ឆ្នាំកំណើត លេខអត្តសញ្ញាណប័ណ្ណ ភេទ ប៉ុន្តែនៅតែខុសទៀត...»។
គិតត្រឹមថ្ងៃទី១០ ខែវិច្ឆិកា ការចុះឈ្មោះបោះឆ្នោតមានរយៈពេលជាង ២ខែ ឬ ៧១ថ្ងៃ គ.ជ.ប ចុះឈ្មោះអ្នកបោះឆ្នោតបានចំនួនជិត ៧លាននាក់ (៦.៩៩៣.៩០៣នាក់) គឺប្រមាណជាង ៧២ភាគរយ (៧២,៣៧%) នៃអ្នកដែលមានសិទ្ធិបោះឆ្នោតសរុប។ ក្នុងចំណោមកំហុសដែលរកឃើញអ្នកបោះឆ្នោតចំនួនជាង ២១ម៉ឺននាក់នោះ មន្ត្រី គ.ជ.ប ពន្យល់ថា ជាកំហុសផ្នែកទិន្នន័យមានដូចជា កំហុសអក្ខរាវិរុទ្ធ ការបញ្ចូលទិន្នន័យខុសពីលិខិតបញ្ជាក់អត្តសញ្ញាណ កំហុសឯកសារដែលផ្ដល់ដោយអាជ្ញាធរ និងការទទួលព័ត៌មានមិនច្បាស់លាស់ជាដើម។ ស្របគ្នានេះ គ.ជ.ប បានទទួលបណ្ដឹង ៨១ បានដោះស្រាយដោយការសម្របសម្រួលដោះស្រាយនៅមូលដ្ឋានចំនួន ៧២បណ្ដឹង ក្រៅពីនេះឋិតក្នុងការអង្កេតដើម្បីដោះស្រាយ។
អគ្គលេខាធិការរង គ.ជ.ប លោក ម៉ៅ សុភារិទ្ធ មានប្រសាសន៍ថា ចំពោះកំហុសផ្នែកទិន្នន័យ គ.ជ.ប បានផ្ទៀងផ្ទាត់ និងកែតម្រូវរួចរាល់ហើយ។ លោកបន្តថា ចំពោះឈ្មោះស្ទួនដែលមានជាង ៣ពាន់នាក់ គ.ជ.ប នឹងធ្វើតាមនីតិវិធីបន្តបន្ទាប់។ លោកបញ្ជាក់ថា មូលហេតុនាំអោយមានឈ្មោះស្ទួនទាំងនោះ ដោយសារការចុះឈ្មោះសាកល្បងមុនកាលបរិច្ឆេទ ការផ្ដល់លេខការិយាល័យបោះឆ្នោតខុស ការផ្លាស់ទីលំនៅ ការប្រើអត្តសញ្ញាណប័ណ្ណតែមួយ សម្រាប់មនុស្សពីរនាក់ និងករណីស្ទួនមួយប្រភេទទៀត គឺការប្រើអត្តសញ្ញាណប័ណ្ណមួយចុះឈ្មោះច្រើនកន្លែង៖ «បើគ.ជ.ប រកឃើញថា គាត់ចុះឈ្មោះចុងក្រោយហ្នឹង អត់បានប្រាប់ទៅដល់ក្រុមចុះឈ្មោះថាគាត់ធ្លាប់បានចុះពីមុនមកហើយទេ អត់មានគូសនៅក្នុងបង្កាន់ដៃ ២០២២ បញ្ជាក់ការដែលគាត់បានចុះទេ នោះគាត់ត្រូវមានទោស បើគ.ជ.ប រកឃើញ គឺពិន័យជាប្រាក់ពី១ម៉ឺនរៀល ទៅ ១០ម៉ឺនរៀល»។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា ឬហៅថាអង្គការ និកហ្វិច (NICFEC) លោក សម គន្ធាមី មានប្រសាសន៍ថា ជាទូទៅដំណើរការចុះឈ្មោះបោះឆ្នោតនេះពុំមានបញ្ហាធំដុំទេ។ លោកថា កំហុសដែល គ.ជ.ប ជួបប្រទះមិនប៉ះពាល់ដល់ដំណើរការចុះឈ្មោះទេ។ លោកថា អង្គការរបស់លោកនឹងធ្វើសវនកម្មនៅពេលដ៏ឆាប់ខាងមុខ ដើម្បីពិនិត្យអោយបានច្បាស់លាស់ពីដំណើរការនេះ។
ទាក់ទិននឹងការសម្អាតបញ្ជីឈ្មោះបោះឆ្នោត តាមនីតិវិធី គ.ជ.ប និងបិទផ្សាយបញ្ជីឈ្មោះនៅតាមបណ្ដាឃុំ សង្កាត់ នៅទូទាំងប្រទេស និងនៅលើគេហទំព័ររបស់ គ.ជ.ប (www.voterlist.org.kh) នៅក្រោយពេលដែលការចុះបញ្ជីឈ្មោះបោះឆ្នោតថ្មីបានបញ្ចប់។ ការតវ៉ា ឬប្ដឹងជំទាស់ ត្រូវធ្វើនៅក្នុងរយៈពេល ១០ថ្ងៃនៅក្រោយការបិទផ្សាយដំបូង។
គ.ជ.ប នឹងបិទផ្សាយបញ្ជីបោះឆ្នោតដំបូង រួមនឹងបញ្ជីឈ្មោះអ្នកដែលនឹងត្រូវលុបចេញពីបញ្ជីនៅថ្ងៃទី៣ ខែមករា ឆ្នាំ២០១៧ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។