អនុប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ថ្លែងថា លោក សម រង្ស៊ី មានសិទ្ធិមកចុះឈ្មោះបានឆ្នោតបាន បើទោះបីជាសព្វថ្ងៃនេះលោកត្រូវបានតុលាការចោទប្រកាន់ថា ជាទណ្ឌិតមានទោសក្ដី។ ចំណែកសង្គមស៊ីវិលដែលធ្វើការងារទាក់ទងការបោះឆ្នោតថា ករណីនេះអាចធ្វើទៅបានប្រសិនបើពេលលោក សម រង្ស៊ី មកចុះឈ្មោះបោះឆ្នោត មិនត្រូវបានសមត្ថកិច្ចចាប់ខ្លួន និងតុលាការចេញដីកាចាប់ខ្លួន។
អនុប្រធាន គ.ជ.ប លោក គួយ ប៊ុនរឿន ឲ្យដឹងថា តាមគោលការណ៍ច្បាប់ លោក សម រង្ស៊ី ប្រធានគណបក្សសង្រ្គោះជាតិ អាចមានសិទ្ធិចុះឈ្មោះបោះឆ្នោត ប៉ុន្តែពលរដ្ឋទូទៅមានសិទ្ធិប្ដឹងជំទាស់ការចុះឈ្មោះរបស់លោក សម រង្ស៊ី បាន បើសិនជាជាពិនិត្យឃើញថា លោក សម រង្ស៊ី មិនបានបំពេញលក្ខខណ្ឌច្បាប់ណាមួយ។
ការថ្លែងរបស់លោក គួយ ប៊ុនរឿន បែបនេះ ធ្វើឡើងនៅក្នុងសន្និសីទកាសែតមួយនៅការិយាល័យ គ.ជ.ប នៅថ្ងៃទី២៦ ខែសីហា ដែលមានតំណាងគណបក្សនយោបាយ អង្គការសង្គមស៊ីវិល និងអ្នកពាក់ព័ន្ធចូលរួម។
លោក សម រង្ស៊ី សព្វថ្ងៃដែលកំពុងរស់នៅក្រៅប្រទេស ត្រូវបានតុលាការចេញដីកាចោទប្រកាន់ថា លោកជាទណ្ឌិតមានទោស។
នៅក្នុងអំឡុងពេលបោះឆ្នោតជាតិកាលពីឆ្នាំ២០១៣ លោក សម រង្ស៊ី ដែលកាលណោះក៏ជាទណ្ឌិតហើយនិរទេសខ្លួននៅក្រៅប្រទេសដែរ ប៉ុន្តែលោកបានទទួលតំណែងជាតំណាងរាស្ត្របន្ទាប់ពីលោកវិលចូលស្រុកវិញ ដោយមានព្រះរាជទានការលើកលែងទោសពីព្រះមហាក្សត្រ។
ទាក់ទងរឿងនេះដែរ មន្ត្រីផ្នែកអង្កេត និងតស៊ូមតិនៃអង្គការខុមហ្វ្រែល (COMFREL) លោក ស៊ិន ទិត្យសីហា ប្រាប់ថា តាមច្បាប់បោះឆ្នោត លោក សម រង្ស៊ី អាចមកចុះឈ្មោះបាន ប្រសិនសាលក្រមរបស់តុលាការមិនទាន់ដកសិទ្ធិបោះឆ្នោតរបស់លោក សម រង្ស៊ី៖ «ក្នុងរយៈពេលបីខែហ្នឹង បើសិនឯកឧត្តម សម រង្ស៊ី វិលត្រឡប់មកស្រុកខ្មែ បើសិនតុលាការអត់ចេញសាលក្រម ឬសាលដីកាឃុំខ្លួនគាត់ គាត់នៅមានសិទ្ធិ។ មួយទៀត បើសិនសាលក្រម ឬសាលដីកា គេកាត់ទោសពីបទព្រហ្មទណ្ឌ ឬដកសិទ្ធិបោះឆ្នោត គាត់មិនអាចចុះឈ្មោះបានទេ»។
ការចុះឈ្មោះបោះឆ្នោតមានរយៈពេលបីខែ គឺចាប់ពីដើមខែកញ្ញា ដល់ចុងខែវិច្ឆិកា។ គ.ជ.ប កំណត់យកថ្ងៃទី៣ ខែមករា ដើម្បីបិទបញ្ជីឈ្មោះអ្នកបោះឆ្នោត។ ក្នុងពេលនេះដែរ គ.ជ.ប ទុករយៈពេល ១០ថ្ងៃបន្ថែមទៀតដើម្បីឲ្យសាធារណជនប្ដឹងជំទាស់ទៅ គ.ជ.ប ឲ្យលុបឈ្មោះជនណាម្នាក់។ ការសម្រេចលុបយ៉ាងណានោះ អាស្រ័យទៅលើភស្តុតាងដែល គ.ជ.ប សិក្សាស្វែងរក។
ទន្ទឹមនឹងការរៀបចំកម្មវិធីរបស់ គ.ជ.ប នេះដែរ សង្គមស៊ីវិលដែលធ្វើការងារទាក់ទងការបោះឆ្នោតក៏បង្ហាញសកម្មភាពការងារទាក់ទងនឹងការចុះឈ្មោះបោះឆ្នោតដែរ។
អ្នកសម្របសម្រួលជាន់ខ្ពស់នៃកម្មវិធីខុមហ្វ្រែល លោក គឹម ឈន ឲ្យដឹងថា បណ្តាញអង្គការសង្គមស៊ីវិលអឺរ៉ា (ERA) បានរៀបចំគ្រូបង្គោលទាំង ២៥ ខេត្ត ក្រុង និងជ្រើសរើសអ្នកសង្កេតការណ៍ ១.២០០នាក់ ចុះទៅ ១.២០០ឃុំសង្កាត់ដើម្បីឃ្លាំមើលការចុះឈ្មោះបោះឆ្នោត៖ «អ្នកសង្កេតការណ៍នៅតាមឃុំសង្កាត់លើកនេះ យើងជ្រើសរើសឡើងដោយមានលក្ខណវិនិច្ឆ័យខ្ពស់បន្តិច ព្រោះតម្រូវឲ្យគាត់បញ្ជូនព័ត៌មានបែបទំនើបតាមប្រព័ន្ធអ៊ីនធឺណិត (Internet)»។
ទាក់ទងដំណើរការនៃការចុះឈ្មោះបោះឆ្នោតនេះដែរ អនុប្រធាន គ.ជ.ប លោក គួយ ប៊ុនរឿន ឲ្យដឹងថា នាយកដ្ឋានអត្តសញ្ញាណកម្មនៃក្រសួងមហាផ្ទៃ បានផ្ដល់សញ្ញាណប័ណ្ណប្រភេទថ្មី ចំនួន ៨,៨លានដល់ពលរដ្ឋ។ មន្ត្រីក្រសួងមហាផ្ទៃ ផ្នែកអត្តសញ្ញាណប័ណ្ណ នឹងបន្តធ្វើការងារនេះទាំងថ្ងៃបុណ្យភ្ជំបិណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។