លោក គួយ ប៊ុនរឿន តំណាងគណបក្សសង្គ្រោះជាតិ ដែលបានចូលរួមតស៊ូមតិក្នុងពិធីបើក ឬផ្ទៀងផ្ទាត់កញ្ចប់សុវត្ថិភាព "ក" ចំនួន ៨ការិយាល័យនៅមណ្ឌលខេត្តបាត់ដំបង នាទីស្ដីការ គ.ជ.ប ព្រឹកថ្ងៃទី២៨ ខែសីហា អះអាងថា មន្ត្រីតាមការិយាល័យបោះឆ្នោតក្រោមឱវាទ គ.ជ.ប ខ្លះ បានអនុវត្តការងារមានកំហុសឆ្គង និងខុសពីការណែនាំ និងនីតិវិធីកំណត់ហេតុនៃលទ្ធផលបោះឆ្នោត។
លោក គួយ ប៊ុនរឿន បន្ថែមថា គណបក្សសង្គ្រោះជាតិ បានដាក់ពាក្យបណ្ដឹងទៅក្រុមប្រឹក្សាធម្មនុញ្ញ សុំឲ្យធ្វើការផ្ទៀងផ្ទាត់សំឡេងឆ្នោតឡើងវិញ នៅការិយាល័យបោះឆ្នោតចំនួន ២៣៣ការិយាល័យ ក្នុងមណ្ឌលខេត្តបាត់ដំបង។ ប៉ុន្តែ ក្រុមប្រឹក្សាធម្មនុញ្ញបានលើកយកចំនួន ៨ការិយាល័យទេមកផ្ទៀងផ្ទាត់៖ «ជាគោលការណ៍ច្បាប់ បើក្នុងករណីមិនបានបំពេញត្រឹមត្រូវខុសទម្រង់បែបនេះ គឺមិនអនុញ្ញាតឲ្យយកជាការបានទេ។ តែបើមានទិន្នន័យខុសរបៀបហ្នឹង តើអាចយកជាបានការដែរអត់? ចម្លើយ គឺមិនថាជាគោលការណ៍មិនអនុញ្ញាតទេ គឺត្រូវបោះចោលទាំងអស់»។
យ៉ាងនេះក្តី លោក គួយ ប៊ុនរឿន បានទទូចសុំឲ្យមានគណៈកម្មការត្រួតពិនិត្យឯករាជ្យ ដែលមានសមាសភាពមកពីអង្គការសង្គមស៊ីវិលមានជំនាញបោះឆ្នោត ជាសមាជិក និងមានវត្តមានមន្ត្រីអង្គការសហប្រជាជាតិចូលរួមសង្កេតការណ៍ ដើម្បីផ្ទៀងផ្ទាត់លទ្ធផលបោះឆ្នោត។
សមាជិកក្រុមប្រឹក្សាធម្មនុញ្ញ និងជាអ្នកនាំពាក្យ លោក អ៊ុត ឈន បានឲ្យដឹងក្រោយពិធីបើកកញ្ចប់សុវត្ថិភាព "ក" ថា ក្រុមប្រឹក្សាធម្មនុញ្ញ នឹងយកបញ្ហានានាដែលកើតមានពេលបើកកញ្ចប់សុវត្ថិភាព "ក" ចំនួន ៨ការិយាល័យនៅមណ្ឌលខេត្តបាត់ដំបង ទៅជម្រះតាមនីតិវិធី។ ហើយថា ពេលវេលាជម្រះក្តី ក្រុមប្រឹក្សាធម្មនុញ្ញ នឹងអនុវត្តមិនឲ្យហួសច្បាប់បានកំណត់ទេ៖ «យើងខិតខំធ្វើយ៉ាងម៉េចឲ្យកិច្ចការនេះ អនុវត្តទៅមានតម្លាភាព ហើយមានការសប្បាយចិត្តទាំងអស់គ្នា ព្រោះយើងជាអ្នកអនុវត្តច្បាប់»។
ទាក់ទិនបញ្ហានេះ លោក ទេព នីថា អគ្គលេខាធិការ គ.ជ.ប ធ្លាប់បានវាយតម្លៃថា សភាពការណ៍បោះឆ្នោត តំណាងរាស្ត្រអាណត្តិទី៥ កាលពីថ្ងៃទី២៨ ខែកក្កដា មានដំណើរការល្អ ហើយ គ.ជ.ប បានអនុវត្តស្របតាមច្បាប់បោះឆ្នោត។
យ៉ាងនេះក្តី នៅក្នុងពិធីបើកកញ្ចប់សុវត្ថិភាព "ក" របស់ គ.ជ.ប នៅថ្ងៃទី២៨ ខែសីហា តាមសេចក្តីសម្រេចរបស់ក្រុមប្រឹក្សាធម្មនុញ្ញ មន្ត្រីបក្សប្រឆាំងបានចោទថា មន្ត្រីក្រោមឱវាទ គ.ជ.ប បានអនុវត្តខុសសេចក្តីណែនាំ និងខុសនីតិវិធីបោះឆ្នោត។
ការបើកកញ្ចប់សុវត្ថិភាព "ក" ទាំង ៨ការិយាល័យនៅមណ្ឌលខេត្តបាត់ដំបង ដែលក្រុមប្រឹក្សាធម្មនុញ្ញសម្រេចឲ្យ គ.ជ.ប ធ្វើការផ្ទៀងផ្ទាត់ គឺមានការិយាល័យលេខ ១១៨៥ ០១៩៣ ០១៨៨ ០២១៦ ០២១៧ ០២០២ ០២០៤ និងការិយាល័យលេខ ១១២២។ ការបើកនេះ គឺដើម្បីផ្ទៀងផ្ទាត់សំឡេងឆ្នោតក្នុងទម្រង់ ១១០២ ទម្រង់ ១១០៨ និងក្រដាសកត់ត្រាសំឡេងឆ្នោត។
ប្រធាននាយកដ្ឋានប្រតិបត្តិការនៃ គ.ជ.ប លោក ហ៊ឺ រ៉ុង ដែលបានដឹកនាំសកម្មភាពបើកកញ្ចប់សុវត្ថិភាព "ក" ទទួលស្គាល់ថា មន្ត្រីបម្រើការតាមការិយាល័យបោះឆ្នោតក្រោមឱវាទ គ.ជ.ប ខ្លះ មានកំហុសឆ្គងក្នុងការសរសេរកំណត់ត្រា ប៉ុន្តែជាកំហុសបច្ចេកទេសតិចតួច៖ «ក្នុងការសរសេរនេះ អាចមានកំហុសរបស់មន្ត្រីការិយាល័យបោះឆ្នោតរបស់យើង។ ប៉ុន្តែ មន្ត្រីការិយាល័យបោះឆ្នោតរបស់យើងទាំងអស់នោះ គឺមានចំនួនជាង ១១ម៉ឺននាក់។ ហើយដោយសារតែមានចំនួនច្រើនក្នុងការសរសេរមិនបានល្អទាំងអស់ទេ។ ប៉ុន្តែ ទោះបីយ៉ាងណាក៏ដោយ ក៏យើងមានទម្រង់ ១១០៨ ហើយនិងតារាងកត់ត្រាសំឡេងឆ្នោត ដែលអាចយកជាគោលបានដែរ។ អ៊ីចឹង ដូចជាអត់មានអីគួរជាកត់សម្គាល់ទេបញ្ហានេះ»។
ការសម្រេចឲ្យ គ.ជ.ប បើកកញ្ចប់សុវត្ថិភាព "ក" ដើម្បីផ្ទៀងផ្ទាត់សំឡេងឆ្នោតឡើងវិញរបស់ក្រុមប្រឹក្សាធម្មនុញ្ញ ធ្វើឡើងតាមបណ្ដឹងគណបក្សសង្គ្រោះជាតិ។
កាលពីថ្ងៃទី២៥ ខែសីហា គ.ជ.ប បានបើកកញ្ចប់សុវត្ថិភាព "ក" មានការិយាល័យចំនួន ១៣ការិយាល័យ ក្នុងមណ្ឌលខេត្តក្រចេះ។ កញ្ចប់សុវត្ថិភាព "ក" ទាំង ១៣ ត្រូវគេរកឃើញថា មានភាពមិនប្រក្រតីជាច្រើន។
កញ្ចប់សុវត្ថិភាព "ក" ជាកញ្ចប់ដែលដាក់ឯកសារដើមជាច្រើនមកពីការិយាល័យបោះឆ្នោតនានា រួមមានទម្រង់ ១១០១ កំណត់ហេតុនៃការបោះឆ្នោតទម្រង់ ១១០២ កំណត់ហេតុនៃការរាប់សន្លឹកឆ្នោតទម្រង់ ១១០៤ ក្រដាសលទ្ធផលបឋមនៃការបោះឆ្នោត និងការរាប់សន្លឹកឆ្នោត និងទម្រង់ ១១០៨ ជាតារាងរាប់សន្លឹកឆ្នោត ព្រមទាំងឯកសារមួយចំនួនទៀត ដូចជាបញ្ជីបោះឆ្នោតដែលត្រូវបានប្រើក្នុងថ្ងៃបោះឆ្នោត ត្រាសម្ងាត់ សន្លឹកឆ្នោតខូច សន្លឹកឆ្នោតមិនបានប្រើ និងគល់បញ្ជីសន្លឹកឆ្នោតដែលបានប្រើ សន្លឹកឆ្នោតបានការ សន្លឹកឆ្នោតមិនបានការ និងផ្ទាំងក្រដាសធំសម្រាប់កត់ត្រាសំឡេងឆ្នោតជាដើម៕
ក្រុមប្រឹក្សាធម្មនុញ្ញសម្រេចឲ្យ គ.ជ.ប បើកកញ្ចប់សុវត្ថិភាព "ក" ចំនួន ១២ការិយាល័យនៅមណ្ឌលសៀមរាប
ដោយ អ៊ុក សាវបូរី
ក្រុមប្រឹក្សាធម្មនុញ្ញ សម្រេចឲ្យ គ.ជ.ប បើកកញ្ចប់សុវត្ថិភាព "ក" ចំនួន ១២ការិយាល័យ នៅមណ្ឌលបោះឆ្នោតមួយចំនួន ក្នុងខេត្តសៀមរាប នាថ្ងៃទី៣០ ខែសីហា ខាងមុខ។
ការសម្រេចនេះ បានធ្វើឡើងនៅថ្ងៃទី២៨ ខែសីហា បន្ទាប់ពី គ.ជ.ប បានបើកកញ្ចប់សុវត្ថិភាព "ក" នៅខេត្តបាត់ដំបង នៅថ្ងៃពុធ ទី២៨ ខែសីហា និងបើកកញ្ចប់សុវត្ថិភាព "ក" នៅខេត្តក្រចេះ កាលពីថ្ងៃទី២៥ ខែសីហា កន្លងមក។
កញ្ចប់សុវត្ថិភាព "ក" ដែលត្រូវបើកនៅខេត្តសៀមរាប មាននៅការិយាល័យលេខ ០២៨៣ ០២៨៤ ០៤២៥ ០៤៤២ ០៨១៧ នៅក្រុងសៀមរាប និងនៅស្រុកពួក មានការិយាល័យ ០៣២៣ ០៣២៤ ០៣២៦ ០២៩៤ ០៦៧៣ ០៧១៨ និងការិយាល័យ ០៣៤៦ ដើម្បីផ្ទៀងផ្ទាត់សំឡេងឆ្នោតក្នុងទម្រង់ ១១០២ និង ១១០៨ ព្រមទាំងក្រដាសកត់ត្រាសំឡេងឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។