មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោតបានអះអាងថា ទិដ្ឋភាពទូទៅនៃដំណើរការចុះឈ្មោះបោះឆ្នោតដើម្បីរៀបចំបញ្ជីបោះឆ្នោតថ្មី ឆ្នាំ២០១៦ ចាប់ពីថ្ងៃទី១ ដល់ថ្ងៃទី២ ខែកញ្ញា បានប្រព្រឹត្តដោយរលូន។ ទោះជាយ៉ាងណា អង្គការឃ្លាំមើលការបោះឆ្នោតស្នើឲ្យ គ.ជ.ប ធ្វើការណែនាំដល់មន្ត្រីអនុវត្តការងារផ្ទាល់អោយយល់ពីកិច្ចការបច្ចេកទេសមួយចំនួនដើម្បីសហការជាមួយគណបក្សនយោបាយ និងអ្នកសង្កេតការណ៍។
មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គ.ជ.ប) បានវាយតម្លៃថា ក្នុងរយៈពេល ២ថ្ងៃនៃដំណើរការចុះឈ្មោះ បានកើតមានបញ្ហាមួយចំនួន ប៉ុន្តែមិនបានចាត់ទុកថា ជាការរាំងស្ទះនោះទេ។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍នៅថ្ងៃទី២ ខែកញ្ញា ថា រយៈពេល ២ថ្ងៃនេះមានបញ្ហាមួយចំនួនដូចជា មានអនុប្រធានក្រុមជាមន្ត្រីស្មៀនឃុំខ្សុំ ខេត្តក្រចេះ ម្នាក់បានដួលសន្លប់ដោយសារបញ្ហាសុខភាព បញ្ហាគាំងម៉ាស៊ីនកុំព្យូទ័រ មន្ត្រីចុះឈ្មោះនៅខ្វះជំនាញជាដើម ប៉ុន្តែទាំងនេះមិនចោទជាបញ្ហានោះទេ។ លោកថា រហូតមកដល់ពេលនេះពុំមានបណ្ដឹងតវ៉ាណាមួយនោះដែរ៖ «កន្លងមកចេះតែលិចលឺគេចេះតែសួរថា មានយួនចុះឈ្មោះមានអីអ៊ីចឹងណា សួរនេះអត់ត្រូវ ព្រោះគ.ជ.ប ឯណាទៅចុះឈ្មោះឲ្យយួន? គ.ជ.ប ចុះឈ្មោះឲ្យតែអ្នកមានអត្តសញ្ញាណប័ណ្ណសញ្ជាតិខ្មែរទេ»។
ទាក់ទងបញ្ហានេះ នាយកប្រតិបត្តិអង្គការខុមហ្វ្រែល (COMFREL) លោក គល់ បញ្ញា ថ្លែងថា លោកមានជំនឿទៅលើកិច្ចការ គ.ជ.ប ដែលថា មានដំណើរការរលូន ទទួលបានលទ្ធផលល្អសម្រាប់ការចុះឈ្មោះបោះឆ្នោតលើកនេះ។ ទន្ទឹមនឹងគ្នានេះ លោកក៏ស្នើឲ្យ គ.ជ.ប ធ្វើការណែនាំបន្ថែមដល់មន្ត្រី គ.ជ.ប ដែលមិនទាន់យល់ពីការបង្ហាញកូដនៃការបើក ឬបិទ មុន និងក្រោយបញ្ចូលទិន្នន័យអ្នកចុះឈ្មោះទៅភ្នាក់ងារគណបក្សនយោបាយ និងអ្នកសង្កេតការណ៍ ដែលជាផ្នែកមួយនៃតម្លាភាព៖ «គេឲ្យកូដព័ត៌មាននេះស្ដីអំពីការបើកហើយនិងបិទ ដើម្បីឲ្យភ្នាក់ងារអ្នកសង្កេតការណ៍គេអាចត្រួតពិនិត្យរាល់ថ្ងៃពេលបើកកុំព្យូទ័រហ្នឹង តើកូដហ្នឹងវាដូចគ្នាទេ រាល់ថ្ងៃពេលបើក ពេលបិទហ្នឹង ហើយមន្ត្រីចុះឈ្មោះបោះឆ្នោតហ្នឹងគាត់អត់យល់អាហ្នឹងដែរ អ្នកខ្លះក៏យល់ទៅ អ្នកខ្លះក៏អត់យល់ទៅ គាត់អត់បានផ្ដល់ព័ត៌មានអំពីកូដហ្នឹងទៅឲ្យភ្នាក់ងារគណបក្សអ្នកសង្កេតការណ៍ដើម្បីឲ្យគេជួយពង្រឹងតម្លាភាពនៃការងារចុះឈ្មោះបោះឆ្នោតនេះ»។
ពលរដ្ឋរស់នៅភូមិមានជ័យ សង្កាត់ស្ទឹងមានជ័យ លោកស្រី កែវ ច័ន្ទគ្រឹស្នា យល់ថា ប្រព័ន្ធចុះឈ្មោះថ្មីនេះអាចនឹងផ្ដល់ក្ដីសង្ឃឹមឲ្យពលរដ្ឋអាចចូលរួមបោះឆ្នោតដោយមិនខ្លាចការបន្លំ ច្រឡំ ឬមានឈ្មោះស្ទួនដូចកាលពីអាណត្តិមុនៗនោះទេ៖ «ខ្ញុំមកចុះឈ្មោះនេះ ដូចថា ៥ឆ្នាំម្ដងជាសិទ្ធិរបស់ខ្ញុំប្រជាពលរដ្ឋចង់រើសមេដឹកនាំណាដែលដឹកនាំប្រទេសជាតិឲ្យល្អដល់សង្គម ដល់កូនខ្ញុំជំនាន់ក្រោយទៀត។ សារក្រោយនេះ ខ្ញុំមានអារម្មណ៍ទុកចិត្តថា វាជាប្រព័ន្ធទំនើប»។
អនុប្រធានភូមិទ្រាមួយ សង្កាត់ស្ទឹងមានជ័យ លោក វុន វុធ ដែលបានបង្ហាញវត្តមាននៅក្នុងការិយាល័យចុះឈ្មោះបោះឆ្នោតស្ទឹងមានជ័យ បានសង្កេតឃើញថា នៅពេលពលរដ្ឋមកច្រើនមន្ត្រីធ្វើមិនទាន់ និងមានបញ្ហាគាំងម៉ាស៊ីនកុំព្យូទ័រខ្លះដែរ ប៉ុន្តែបញ្ហានេះត្រូវបានដោះស្រាយ។ ការដែល លោកទៅប្រចាំការនៅការិយាល័យបោះឆ្នោត គឺដើម្បីសម្រួលពលរដ្ឋនៅមូលដ្ឋានរបស់លោកដែលខ្វះឯកសារនានាក្នុងពេលចុះឈ្មោះ៖ «ខ្ញុំបង្ហាញវត្តមាននៅទីនេះដើម្បីបង្កលក្ខណៈងាយស្រួលឲ្យប្រជាពលរដ្ឋនៅក្នុងភូមិខ្ញុំគាត់មកចុះឈ្មោះបោះឆ្នោត ប៉ុន្តែអត្តសញ្ញាណប័ណ្ណគាត់នៅខេត្ត អ៊ីចឹងខ្ញុំធ្វើជាសាក្សីឲ្យគាត់បានទៅចុះឈ្មោះបោះឆ្នោត»។
គ.ជ.ប បានបង្ហាញលទ្ធផលបណ្ដោះអាសន្ននៃការចុះឈ្មោះបោះឆ្នោតដើម្បីរៀបចំបញ្ជីបោះឆ្នោតថ្មី ឆ្នាំ២០១៦ ចាប់ពីថ្ងៃទី១ ដល់ត្រឹមម៉ោង ១២ ថ្ងៃទី២ ខែកញ្ញា ថា មានពលរដ្ឋទៅចុះឈ្មោះបោះឆ្នោតបានចំនួន ២០ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។