វគ្គបណ្ដុះបណ្ដាលនេះ សំដៅជំរុញអ្នកកាសែតទាំងអស់ឲ្យសរសេរព័ត៌មានឲ្យបានច្រើន ប្រកបដោយវិជ្ជាជីវៈ និងចូលរួមដោះស្រាយបញ្ហាមួយចំនួនដែលអ្នកកាសែតក្នុងខេត្តមណ្ឌលគិរី កំពុងជួបប្រទះ។
នេះជាលើកទី១ហើយ ដែលមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) បើកវគ្គបណ្ដុះបណ្ដាលដល់អ្នកសារព័ត៌មានក្នុងស្រុក និងអ្នកសារព័ត៌មានប្រជាពលរដ្ឋ (Citizen Journalism) ពីរបៀបនៃការសរសេរព័ត៌មានបែបវិជ្ជាជីវៈ និងសរសេរព័ត៌មានទាក់ទងនឹងដំណើរការបោះឆ្នោតជ្រើសតាំងតំណាងរាស្ត្រអាណត្តិទី៥នេះ ចេញពីខេត្តមណ្ឌលគិរី។
ប្រធានមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ប៉ាង ងួនទៀង នៅថ្ងៃទី១៥ ខែកក្កដា មានប្រសាសន៍ថា វគ្គបណ្ដុះបណ្ដាលនេះ ជាចំណេះដឹងមួយថ្មីទៀតដើម្បីឲ្យអ្នកសារព័ត៌មានក្នុងខេត្តមណ្ឌលគិរី អាចសរសេរព័ត៌មានឲ្យកាន់តែច្រើនពីដំណើរការបោះឆ្នោតនៅខេត្តមណ្ឌលគិរី។
លោកបន្តថា កន្លងទៅព័ត៌មានដែលចេញពីខេត្តមណ្ឌលគិរី ហាក់មានចំនួនតិច បើធៀបនឹងខេត្តដទៃទៀត ដែលមានប្រជាពលរដ្ឋរស់នៅច្រើន ប៉ុន្តែមិនបានន័យថា ខេត្តនេះមិនមានរឿងរ៉ាវកើតឡើងនោះទេ។ លោកបញ្ជាក់ថា អ្នកសារព័ត៌មាននៅខេត្តមណ្ឌលគិរី ភាគច្រើនធ្វើការងារនៅក្នុងស្ថាប័នដែលគាំទ្ររដ្ឋាភិបាល មិនអាចឯករាជ្យបាន តែវគ្គបណ្ដុះបណ្ដាលនេះ ប្រាប់អ្នកកាសែតទាំងនោះថា អ្វីទៅជាព័ត៌មានឯករាជ្យ និងចង់ប្រាប់ថា ធ្វើយ៉ាងម៉េចដើម្បីក្លាយជាអ្នកយកព័ត៌មានវិជ្ជាជីវៈនោះ?
សិក្ខាកាមដែលចូលរួមសិក្ខាសាលានេះមានមកអង្គភាពសង្គមស៊ីវិលជុំវិញខេត្តមណ្ឌលគិរី និងអ្នកសារព័ត៌មានពីស្ថាប័នព័ត៌មានក្នុងស្រុកមួយចំនួន ដូចជាទូរទស្សន៍ ស៊ី.អិន.ស៊ី (CNC) ទូរទស្សន៍បាយ័ន អប្សរា សារព័ត៌មាននគរវត្ត កាសែតកោះសន្តិភាព កាសែតកម្ពុជាថ្មី កាសែតវិទ្យាសាស្ត្រខ្មែរ វិទ្យុ វី.អូ.ឌី (VOD) និងសារព័ត៌មានប្រជាពលរដ្ឋ ឬប្រជានាំសារពីសហគមន៍ជាច្រើនក្នុងខេត្តមណ្ឌលគិរី។
ប្រជានាំសារជាជនជាតិដើមភាគតិចព្នង មកពីសហគមន៍ដាក់ដាំ លោក ទង ម៉ូត ឲ្យដឹងថា កន្លងទៅសហគមន៍របស់លោកធ្លាប់រងនូវការរំលោភបំពានពីសំណាក់អ្នកមានលុយមានអំណាចក្នុងបញ្ហាដីធ្លី និងការកាប់បំផ្លាញព្រៃឈើ។ តែសំឡេងរបស់ប្រជាសហគមន៍ទាំងនោះ មិនសូវលឺចេញទៅក្រៅឡើយ។ លោកបន្តថា បើមានលទ្ធភាព លោកនឹងនាំយកព័ត៌មានស្តីពីបញ្ហារបស់ជនជាតិដើមទាំងនោះ ឲ្យប្រជាពលរដ្ឋទូទាំងប្រទេសបានដឹងដើម្បីឲ្យអាជ្ញាធរជួយស្វែងរកដំណោះស្រាយ។
ទាក់ទងនឹងការយកព័ត៌មានពីដំណើរការបោះឆ្នោតវិញ សមាជិកក្លឹបអ្នកសែតកម្ពុជា និងជាគ្រូបណ្ដុះបណ្ដាលលោក ឆាយ សុផល មានប្រសាសន៍ក្នុងវគ្គបណ្ដុះបណ្ដាលថា ការសរសេរព័ត៌មានឯករាជ្យជាប្រការសំខាន់សម្រាប់ដំណើរការបោះឆ្នោត និងកិច្ចអភិវឌ្ឍន៍លទ្ធិប្រជាធិបតេយ្យនៅកម្ពុជា។
លោកបន្តថា អ្នកសារព័ត៌មានវិជ្ជាជីវៈ មានតួនាទីផ្ដល់សំឡេងឲ្យបានគ្រប់ជ្រុងជ្រោយទាំងប្រភពចោទប្រកាន់គេ អ្នកដែលត្រូវគេចោទ សង្គមស៊ីវិលដែលប្រកាន់ជំហរកណ្ដាល និងស្ថាប័នជំនាញ។លោកបន្តថា អ្នកកាសែតអាជីព គឺត្រូវប្រកាន់ក្រមសីលធម៌វិជ្ជាជីវៈដើម្បីជៀសផុតពីការនាំទុក្ខដល់អ្នកដទៃ និងការប្រឈមផ្លូវច្បាប់។
ទោះយ៉ាងណាក្តី សិក្ខាកាមដែលចូលរួមវគ្គបណ្ដុះបណ្ដាលនេះ ឲ្យដឹងថា រឿងរ៉ាវដែលកើតឡើងក្នុងខេត្តមណ្ឌលគិរី មានដូចជាទំនាស់ដីធ្លី ការកាប់បំផ្លាញព្រៃឈើ ស្ថានភាពរស់នៅរបស់ប្រជាពលរដ្ឋជនជាតិដើមភាគតិច ។ល។
អ្នកកាសែតទាំងនោះប្រាប់ថា ពួកគាត់ប្រឈមនឹងបញ្ហាមួយចំនួន ដូចជាខ្វះមធ្យោបាយទៅយកព័ត៌មាន ប្រាក់ខែតិច ការគំរាមកំហែង និងជាពិសេស ព័ត៌មានខ្លះសរសេររួចមិនអាចផ្សាយបានក៏មាន។ ព័ត៌មានខ្លះប៉ះពាល់ដល់មន្ត្រីរដ្ឋាភិបាល ឬអាជ្ញាធរខេត្ត បើអ្នកកាសែតហ៊ានសរសេរ ក៏និពន្ធនាយកស្ថាប័នទាំងនោះមិនឲ្យផ្សាយដែរ ព្រោះខ្លាចប៉ះពាល់ដល់គោលនយោបាយបក្សកាន់អំណាច។
មន្ត្រីសង្គមស៊ីវិល និងអ្នកសារព័ត៌មានបានពិភាក្សាគ្នាដោយបង្ហាញថា បើសិនជាអ្នកកាសែតក្នុងស្រុកមិនហ៊ានផ្សាយព័ត៌មានដែលប៉ះពាល់ដល់មន្ត្រីទាំងនោះ ពួកគេឲ្យបញ្ជូនព័ត៌មានទាំងនោះទៅកាន់អ្នកកាសែតដែលធ្វើការនៅស្ថាប័នឯករាជ្យនិងវិជ្ជាជីវៈបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។