កម្មកររោងចក្រ អូសេអង់ (Ocean) មានគម្រោងហែក្បួនទៅផ្ទះនាយករដ្ឋមន្ត្រី ហ៊ុន សែន នៅថ្ងៃពុធ ទី១១ ខែមិថុនា សុំអន្តរាគមន៍ជំរុញឲ្យថៅកែរោងចក្រ បើកប្រាក់ខែឲ្យពួកគេ ១០០% ទោះបីរោងចក្រគ្មានការងារឲ្យពួកគេធ្វើក៏ដោយ ជាថ្នូរនឹងការសងជំងឺចិត្តដែលរោងចក្របានព្យួរការងារមិនប្រាប់កម្មករឲ្យដឹងមុន។
សំឡេងកម្មករ៖ «លុយដែលខ្ញុំបើកថ្ងៃទី៧ ហ្នឹង គឺខ្ញុំបើកលុយដែលខ្ញុំធ្វើការនៅខែឧសភា បើកចាប់ពីថ្ងៃទី១ រហូតដល់ថ្ងៃទី២៤។ កាត់តែលុយថ្ងៃអត់ធ្វើការឲ្យគេ គឺកាត់អត់ឲ្យបានទាំងអស់តែម្ដង»។
ក្រុមកម្មកររោងចក្រកាត់ដេរ អូសេអង់ ឲ្យដឹងទៀតថា ថៅកែរោងចក្របានបើកលុយប្រចាំខែឧសភា ចំនួន ២៤ថ្ងៃ ជាថ្ងៃដែលកម្មករបានធ្វើការ ចំណែកថ្ងៃកម្មករធ្វើបាតុកម្មពីថ្ងៃ២៤ មក ថៅកែមិនបើកលុយឲ្យពួកគេទេ។
កម្មកររោងចក្រអូសេអង់ បានតវ៉ាប្រឆាំងនឹងការបិទរោងចក្រ ពីថ្ងៃ២៤ ខែឧសភា មកដល់បច្ចុប្បន្ន។
ក្រុមកម្មករបានទាមទារប្រាក់ខែរង់ចាំការងារ ៥០%។ ក្រោយពីការចរចាច្រើនលើករវាងសហជីពតំណាងកម្មករ ក្រសួងការងារ និងសមាគមកាត់ដេរមក ខាងរោងចក្រសម្រេចផ្ដល់ប្រាក់ខែរង់ចាំការងារដល់កម្មករតែ ១៥ដុល្លារតែប៉ុណ្ណោះ។ កម្មករប្រឆាំងនឹងការផ្ដល់ប្រាក់ខែ ១៥ដុល្លារនោះ ហើយពួកគេទាមទារប្រាក់ខែក្នុងពេលរង់ចាំមានការងារ ១០០% វិញ និងធ្វើការតវ៉ាដោយហែក្បួនមកដល់ក្រសួងការងារ និងដាក់ញត្តិទៅខុទ្ទកាល័យនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។