អាជ្ញាធរខេត្តឧត្តរមានជ័យ ថាគេពុំបានប្រើកម្លាំងសមត្ថកិច្ចឲ្យរាយបណ្ដាក់នៅតាមដងផ្លូវក្នុងក្រុងសំរោង ដើម្បីរារាំងក្បួនយុទ្ធនាការឃោសនារកសំឡេងឆ្នោតរបស់គណបក្សសង្គ្រោះជាតិ និងឃាត់ខ្លួនព្រះសង្ឃចំនួន ៤អង្គ ដូចការចោទប្រកាន់កាលពីថ្ងៃទី២៦ ខែឧសភា នោះទេ។
អភិបាលខេត្តឧត្តរមានជ័យ លោក ស ថាវី អះអាងកាលពីព្រឹកថ្ងៃសៅរ៍ ទី២៧ ខែឧសភា ថា អាជ្ញាធរខេត្តមិនបានបញ្ជាកម្លាំងសន្តិសុខ ប៉ូលិស និងកងរាជអាវុធហត្ថ ឲ្យទៅរារាំងក្បួនយុទ្ធនាការឃោសនារបស់គណបក្សសង្គ្រោះជាតិ ដែលមានលោក កឹម សុខា ជាប្រធានទៅកាន់ទីនោះទេ ប៉ុន្តែគណបក្សសង្គ្រោះជាតិ ទៅវិញទេដែលជាអ្នកដង្ហែក្បួនយុទ្ធនាការឃោសនាដោយបំពានទៅលើច្បាប់ គ.ជ.ប។
លោក ស ថាវី បញ្ជាក់ថា កាលពីដំបូង មន្ត្រីគណបក្សសង្គ្រោះជាតិ បានសុំច្បាប់ទៅគណៈកម្មការរៀបចំការបោះឆ្នោតខេត្ត ថាធ្វើការឃោសនារកសំឡេងឆ្នោតនៅតំបន់ផ្សារសំរោង ប៉ុន្តែកាលពីថ្ងៃទី២៦ ខែឧសភា នៅពេលដែលលោក កឹម សុខា មកដល់ គឺគណបក្សសង្គ្រោះជាតិ មិនត្រឹមតែយកប្រជាពលរដ្ឋក្រុងសំរោង ទៅហែទេ ថែមទាំងយកមកពីស្រុកថ្មពួក ខេត្តបន្ទាយមានជ័យ និងស្រុកស្រីស្នំ ខេត្តសៀមរាប ហើយមិនធ្វើយុទ្ធនាការនៅផ្សារទេ បែរជាទៅធ្វើនៅឯទីវត្តទៅវិញ ធ្វើឲ្យមន្ត្រីគណៈកម្មការរៀបចំការបោះឆ្នោតខេត្តឧត្តរមានជ័យ ស្នើសុំកម្លាំងសន្តិសុខរារាំងក្បួនឃោសនានេះ៖ « ក្រោយពីហ្នឹងម៉ោងប្រហែលជាង ១០ មានហេតុការណ៍កើតឡើង គឺលោក កឹម សុខា បង្វែរក្បួនទាំងអស់នេះបំណងហែទៅស្រុកអន្លង់វែង តពីអន្លង់វែង ឆ្ពោះទៅកាន់ស្រុកត្រពាំងប្រាសាទ ហើយទៅខេត្តព្រះវិហារ ផង »។
ចំណែកព្រះសង្ឃ ៤អង្គទៀតសោត គឺសមត្ថកិច្ចក៏មិនបានចាប់ខ្លួនដែរ គ្រាន់តែនិមន្ត និងយកកាមេរ៉ាទៅពិនិត្យមើល បន្ទាប់ពីព្រះសង្ឃបានថតសកម្មភាពរបស់សមត្ថកិច្ច ហើយផ្សាយផ្ទាល់ទៅតាមបណ្ដាញសង្គមហ្វេសប៊ុក (Facebook) មក។
ទោះជាយ៉ាងណា អាស៊ីសេរី មិនអាចសុំប្រតិកម្មពីប្រធានក្រុមការងារគណបក្សសង្គ្រោះជាតិ ខេត្តឧត្តរមានជ័យ លោក ម៉ោញ សារ៉ាត់ ជុំវិញការច្រានចោលរបស់អាជ្ញាធរនេះបានថាយ៉ាងណានៅឡើយនៅថ្ងៃទី២៧ ឧសភា។
ចំណែកប្រធានគណៈកម្មការរៀបចំការបោះឆ្នោតខេត្តឧត្តរមានជ័យ លោក ជីង សំភួ ទទួលស្គាល់ថា លោកពិតជាបានសុំកម្លាំងប៉ូលិស ប៉េអិម ឲ្យរាយបណ្ដាក់កាក់ក្បួនគោយន្តរបស់គណបក្សសង្គ្រោះជាតិ មែន ដោយសារតែលោកឃើញថា អ្នកចូលរួមយុទ្ធនាការរបស់គណបក្សសង្គ្រោះជាតិ នោះ គឺមិនគោរពច្បាប់ទម្លាប់។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន ដែលតាមឃ្លាំមើលក្បួនឃោសនានោះ បានហៅសកម្មភាពរបស់មន្ត្រីរៀបចំការបោះឆ្នោតខេត្តឧត្តរមានជ័យ ថាហាក់លម្អៀងទៅរកគណបក្សកាន់អំណាច ពីព្រោះលោកមើលឃើញថា គណបក្សសង្គ្រោះជាតិ បាននាំក្បួនបម្រុងចូលទៅឃោសនានៅម្ដុំផ្សារសំរោង ក៏ប៉ុន្តែមុនពេលក្បួនគណបក្សសង្គ្រោះជាតិ មកដល់ បែរជាមានក្បួនយុទ្ធនាការឃោសនារបស់គណបក្សប្រជាជនកម្ពុជា មួយក្រុម ទៅដាក់គោយន្តជាច្រើនគ្រឿងរាំងផ្លូវមិនឲ្យចូលទៅរួច ហើយពិសេសទៅទៀត គឺផ្ទះរបស់ទាហានម្នាក់បានចាក់ធុងបាសរំខានដល់ការឃោសនារបស់គណបក្សប្រឆាំង ដោយមន្ត្រីគណៈកម្មការរៀបចំការបោះឆ្នោត មិនអាចទប់ស្កាត់សកម្មភាពទាំងនោះបានផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។