ប្រជាពលរដ្ឋស្ទើរគ្រប់គ្នានៅទូទាំងប្រទេស បានចេញទៅបោះឆ្នោតសម្រាប់ជ្រើសរើសសមាជិកក្រុមប្រឹក្សាឃុំ-សង្កាត់ នៅក្នុងអាណត្តិទី៤នេះ។ អ្នកដែលបានបោះឆ្នោតបានអះអាងថា ពួកគេបានសម្រេចចិត្តរួចរាល់ហើយ ក្នុងការជ្រើសរើសមេឃុំ ឬចៅសង្កាត់ ដែលពួកគេទន្ទឹងរង់ចាំជាយូរឆ្នាំណាស់មកហើយ។
ពុំមែនមនុស្សគ្រប់គ្នាសុទ្ធតែបានទៅបោះឆ្នោត តាមការគិត និងចង់បានមេដឹកនាំមួយដែលបម្រើឲ្យប្រយោជន៍សាធារណៈនោះទេ ពោលក្នុងពេលពលរដ្ឋនៅទូទាំងប្រទេស បានប្រើប្រាស់សិទ្ធិរបស់ខ្លួនទៅបោះឆ្នោតនោះ ទន្ទឹមនឹងនេះក៏មានអ្នកខ្លះពុំបានចូលរួមបោះឆ្នោតដែរ។
យុវជនដែលកំពុងអង្គុយមើលមនុស្សម្នាដើរសំដៅកាន់ទៅការិយាល័យបោះឆ្នោត ស្ថិតក្នុងសង្កាត់ចាក់អង្រែលើ ឈ្មោះ មាជ វុត្ថា ឲ្យដឹងនៅថ្ងៃទី៤ ខែមិថុនា ថា ការដែលខ្លួនខកខានមិនបានចូលរួមបោះឆ្នោតនេះ ពុំមែនជាការខ្ជិលច្រអូស ឬទម្លាក់ភារកិច្ចនៃការគិត និងការទទួលខុសត្រូវនេះឲ្យអ្នកនយោបាយដោះស្រាយនោះទេ ប៉ុន្តែដោយសារការធ្វេសប្រហែសរឿងឯកសារ។ យុវជនរូបនេះបន្តថា នៅពេលបោះឆ្នោតសម្រាប់អាណត្តិបន្តបន្ទាប់ទៀត ខ្លួននឹងប្រើប្រាស់ជាម្ចាស់ឆ្នោតធ្វើសេចក្ដីសម្រេចចិត្ត តាមរយៈការជ្រើសរើសមេដឹកនាំមួយដ៏ល្អ និងស្អាតស្អំ៖ «ខ្ញុំជ្រុះបាត់អត្តសញ្ញាណប័ណ្ណរួចហើយ ខ្ញុំអត់បានធ្វើលិខិតបញ្ជាក់ផង។ ខ្ញុំជាប់ធ្វើការពេកទៅអត់បានទៅធ្វើលិខិតបញ្ជាក់។ វាគួរឲ្យសោកស្ដាយដែរ។ មិនដឹងធ្វើម៉េចដែរ បើវាកៀកថ្ងៃដែរហើយ។ សូមគេធ្វើលិខិតបញ្ជាក់ ប៉ុន្តែគេធ្វើអត់បាន ព្រោះអីកៀកថ្ងៃបោះឆ្នោតហើយ»។
ការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់លើកនេះ គឺសកម្មភាពនៃការចូលរួមរបស់ពលរដ្ឋហាក់មិនខុសទៅនឹងការចូលរួមបោះឆ្នោតជ្រើសរើសតាំងតំណាងរាស្ត្រ ឬបោះឆ្នោតជាតិប៉ុន្មាននោះឡើយ។ ម្នាក់ៗហាក់ទៅបោះឆ្នោតទាំងសប្បាយចិត្ត និងមិនខ្លាចរអាក្នុងការនិយាយពីគណបក្សនយោបាយដែលខ្លួនបោះឲ្យថែមទៀតផង។ ក្រោយការបោះឆ្នោតរួច សង្កេតឃើញថា ប្រជាពលរដ្ឋបានប្រើប្រាស់បណ្ដាញទំនាក់ទំនងសង្គមហ្វេសប៊ុក ផុសព្រោងព្រាតតាមរយៈការលើកចង្អុលដៃបង្ហាញពីការបំពេញកាតព្វកិច្ច ក្នុងនាមជាម្ចាស់ស្ទើរគ្រប់គ្នា។
ប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក ឲ្យដឹងនៅក្នុងសន្និសីទសារព័ត៌មានក្រោយពីបញ្ចប់ការរៀបចំការបោះឆ្នោតនៅល្ងាចថ្ងៃទី៤ ខែមិថុនា នេះថា ពលរដ្ឋបានទៅបោះឆ្នោតនៅទូទាំងប្រទេសបានជាង ៨៥% នៃពលរដ្ឋដែលមានឈ្មោះក្នុងបញ្ជីឈ្មោះបោះឆ្នោតឆ្នាំ២០១៦។
ពលរដ្ឋនៅរស់សង្កាត់ចាក់អង្រែលើ ក្នុងក្រុងភ្នំពេញ លោក សេង ជួប អះអាងថា លោកបានសម្រេចរួចហើយ គឺបោះឆ្នោតឲ្យបក្សប្រឆាំង។ ការប្រកាសពីជំហរដ៏ចំហបែបនេះរបស់លោក សេង ជួប គឺលោកយល់ឃើញថា លោកចង់ឃើញអ្វីដែលថ្មីពីបក្សនយោបាយផ្សេងក្រៅពីបក្សកាន់អំណាចវិញម្ដង៖ «ខ្ញុំនិយាយឲ្យត្រង់តែម្ដង ខ្ញុំបោះឆ្នោតឲ្យគណបក្សសង្គ្រោះជាតិ ដើម្បីជ្រើសរើសមេឃុំ ចៅសង្កាត់ទៅដឹកនាំដែលមានសមត្ថភាពគ្រប់គ្រាន់ក្នុងការពារផលប្រយោជន៍ប្រជាពលរដ្ឋ»។
នៅថ្ងៃបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ នៅក្នុងអាណត្តិទី៤ នេះ រកមិនឃើញថា មានពលរដ្ឋដែលមិនខ្វល់នឹងរឿងនយោបាយ ហើយមិនចេញទៅបោះឆ្នោតឡើយ។ នៅក្នុងទីក្រុងភ្នំពេញ ហាងលក់ទំនិញផ្សេងៗ ផ្សារ និងផ្ទះបានបិទទ្វារជិតស្ទើរគ្រប់ទីកន្លែងក្នុងអំឡុងពេលបោះឆ្នោត ហើយមានទីតាំងខ្លះបានបិទទ្វារតាំងពីមុនបោះឆ្នោត ១ថ្ងៃក៏មានដែរ។
យ៉ាងនេះក្តី ការបោះឆ្នោតលើកនេះ ក៏មានបញ្ហាកើតឡើងនៅតាមការិយាល័យបោះឆ្នោតខ្លះដែរ។ ប្រជាពលរដ្ឋមួយចំនួន បានតវ៉ានៅពេលដែលដឹងថា ខ្លួនបានបាត់បង់សិទ្ធិបោះឆ្នោត មូលហេតុមិនមានឯកសារគ្រប់គ្រាន់ជាដើម។ ស្របពេលមានបញ្ហាខ្លះ បានកើតឡើងនៅតាមមណ្ឌលបោះឆ្នោត ក្នុងអំឡុងពេលបោះឆ្នោត កញ្ញា មាស សារាវឌី ដែលអះអាងថា មិនបានបោះឆ្នោត ព្រោះខ្វះអាយុ ១ថ្ងៃទើបគ្រប់អាយុបោះឆ្នោត បង្ហាញការសោកស្ដាយដែលមិនបានប្រើសិទ្ធិរបស់ខ្លួន ជ្រើសរើសមេឃុំ ឬចៅសង្កាត់ដែលអាចបម្រើកិច្ចការនៅក្នុងសហគមន៍បាន៖ «សោកស្ដាយដែរ តែចាំឆ្នាំក្រោយបានបោះដូចគេហើយ។ ពេលទៅធ្វើអត្តសញ្ញាណប័ណ្ណរួចគេថាអត់ទាន់គ្រប់ ខ្វះមួយថ្ងៃ»។
បើទោះជាទាំងមុន និងក្នុងអំឡុងពេលយុទ្ធនាការឃោសនាបោះឆ្នោត លោក ហ៊ុន សែន និងមន្ត្រីក្រោមបង្គាប់របស់លោកបានព្រមានពីការផ្ទុះសង្គ្រាម ឬប្រទេសអស្ថិរភាពក៏ដោយចុះ ប្រសិនការឈ្នះឆ្នោតលើកនេះមិនមែនជាគណបក្សប្រជាជនកម្ពុជា ពលរដ្ឋអះអាងថា ពួកគេសប្បាយនឹងចូលរួមបោះឆ្នោត មិនបារម្ភពីសង្គ្រាមអ្វីនោះដែរ។
ប្រជាពលរដ្ឋដែលចេញពីតាមការិយាល័យបោះឆ្នោត នៅសង្កាត់ចាក់អង្រែលើ ក្នុងក្រុងភ្នំពេញ ថ្លែងកាលពីព្រឹកថ្ងៃទី៤ ខែមិថុនា ថា ពួកគេបានប្រើប្រាស់សិទ្ធិផ្អែកតាមការសម្រេចដ៏ត្រឹមត្រូវរួចហើយ ក្នុងការជ្រើសរើសមេដឹកនាំមួយដែលពួកគេចង់បាន៖ «ខ្ញុំយល់ឃើញថា នៅតាមឃុំសង្កាត់ខ្លះមានការខ្វះខាតចំពោះពលរដ្ឋ អ៊ីចឹងនាងខ្ញុំចង់ផ្លាស់ប្ដូរ។ សន្លឹកឆ្នោតមួយសន្លឹករបស់ខ្ញុំនេះ វាមានអត្ថន័យធំធេង និងសំខាន់ណាស់សម្រាប់ខ្ញុំ ក្នុងការសម្រេចជ្រើសរើសមេឃុំ ចៅសង្កាត់។ និយាយរួមបើសិនជាយើបោះឆ្នោតទៅ យើងអាចជ្រើសរើសបានមេឃុំ ចៅសង្កាត់ដែលថ្មី»។
ក្រោយការបោះឆ្នោតដែលបានបិទការិយាល័យត្រឹមម៉ោង ៣រសៀល សង្កេតឃើញថា មានម្ចាស់ឆ្នោតភាគច្រើនមិនព្រមចាកចេញពីមណ្ឌលបោះឆ្នោត។ ពួកគេនៅឃ្លាំមើលការរាប់សន្លឹកឆ្នោត ហើយអ្នកខ្លះថែមទាំងប្រតិកម្មនៅតាមមណ្ឌលមួយចំនួន។ អ្នកបោះឆ្នោតអះអាងថា ប្រយោជន៍ដើម្បីការពារសន្លឹកឆ្នោតមួយសន្លឹករបស់ពួកគេ ដោយមិនទុកចិត្តអ្នកសង្កេតការណ៍ខ្លះ អាចធ្វើឲ្យសន្លឹកឆ្នោតដែលបានបោះហើយនោះ មានការប្រែប្រួលផ្ទុយពីឆន្ទៈដើមរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។