មកទល់ពេលនេះ សកម្មជនគណបក្សនយោបាយ តំណាងរាស្ត្រ សមាជិកព្រឹទ្ធសភា និងសកម្មជនសិទ្ធិមនុស្សផង ត្រូវបានតុលាការចាប់ដាក់ពន្ធនាគារជាប់ពាក់ព័ន្ធនឹងរឿងនយោបាយ។ ក៏ប៉ុន្តែរដ្ឋាភិបាលអះអាងម្ដងជាពីរដងថា នៅកម្ពុជា គ្មានអ្នកទោសនយោបាយនោះទេ មានតែអ្នកនយោបាយប្រព្រឹត្តខុសច្បាប់ជាប់ទោសទៅវិញ។
អ្នកវិភាគលើកឡើងថា សកម្មជនគណបក្សនយោបាយ និងអ្នកការពារសិទ្ធិមនុស្ស ជាចំណាប់ខ្មាំងរបស់អ្នកនយោបាយដែលគេចង់ចាប់ដាក់ពន្ធនាគារនៅពេលណាក៏បាន នៅពេលគណបក្សជាប់ឆ្នោតទាំងពីរប្រេះឆានឹងគ្នាម្ដងៗ។
ការលើកឡើងរបស់អ្នកវិភាគបែបនេះ ធ្វើឡើងក្រោយពីលោកនាយករដ្ឋមន្ត្រី ហ៊ុន សែន បានឆ្លើយតបនៅក្នុងហ្វេសប៊ុក (Facebook) របស់លោកកាលពីថ្ងៃទី២ មករា ថា នៅកម្ពុជា គ្មានអ្នកទោសនយោបាយទេ។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍នៅថ្ងៃទី៤ មករា ថា ថ្វីត្បិតតែលោកនាយករដ្ឋមន្ត្រីព្យាយាមប្រកាសថា នៅកម្ពុជា គ្មានអ្នកទោសនយោបាយក្ដី តែជាក់ស្ដែង សកម្មជនគណបក្សប្រឆាំង អ្នកការពារបរិស្ថាន អ្នកការពារសិទ្ធិមនុស្ស ងាយនឹងរងគ្រោះដោយសារតែគេចោទប្រកាន់អ្នកទាំងនោះ ទៅនឹងរឿងនយោបាយ ហើយតុលាការផ្ដន្ទាទោសអ្នកទាំងនោះជាប់ទាក់ទងនឹងរឿងព្រហ្មទណ្ឌ។
ក្រៅពីនេះទៀត លោកបណ្ឌិត ឡៅ ម៉ុងហៃ បញ្ជាក់ថា ក្រោយពីកម្ពុជា បានផ្លាស់ប្ដូររបបថ្មី គឺលទ្ធិប្រជាធិបតេយ្យ សេរីពហុបក្ស ដែលមានចែងនៅក្នុងរដ្ឋធម្មនុញ្ញ និងរៀបចំឲ្យមានការបោះឆ្នោតឆ្នាំ១៩៩៣ មក កម្ពុជា នៅតែជាប់កម្អែលលទ្ធិកុម្មុយនិស្តដដែល ព្រោះថាប្រព័ន្ធប្រជាធិបតេយ្យបច្ចុប្បន្នគ្រាន់តែជាសម្បកក្រៅប៉ុណ្ណោះ តែការពិត ប្រព័ន្ធតុលាការនៅក្រោមសម្ពាធរបស់គណបក្សកាន់អំណាច និងបាត់បង់ឯករាជភាពរបស់ខ្លួន៖ « ជាពិសេសតុលាការហ្នឹងមិនឯករាជ្យ រដ្ឋាភិបាលប្រើប្រាស់តុលាការដើម្បីចោទប្រកាន់ និងដាក់ទណ្ឌកម្មទៅលើអ្នកដែលធ្វើសកម្មភាពប្រឆាំងនឹងទិតៀនរដ្ឋាភិបាល »។
លើសពីនេះទៀត អ្វីដែលធ្វើឲ្យសាធារណជនកត់សម្គាល់នោះ គឺលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ធ្លាប់បានប្រកាសក្រោយពីកិច្ចប្រជុំសភាកាលពីថ្ងៃទី៧ ខែធ្នូ ឆ្នាំ២០១៦ នៅគ្រាដែលគណបក្សប្រឆាំងបានវិលទៅចូលរួមប្រជុំសភាវិញ ហើយមេដឹកនាំបក្សទាំងពីរប្រកាសបន្តប្រើប្រាស់វប្បធម៌សន្ទនាឡើងវិញនោះ លោក ស ខេង បង្ហើបថា សកម្មជនការពារសិទ្ធិមនុស្សអាដហុក (ADHOC) ៤រូប និងអគ្គលេខាធិការរង គ.ជ.ប លោក នី ចរិយា អាចនឹងត្រូវដោះលែងនៅចុងខែធ្នូ ឆ្នាំ២០១៦។ ប៉ុន្តែនៅដើមខែមករា នេះ នៅពេលគេឃើញគណបក្សទាំងពីរបានខកខានតាមការកំណត់ក្នុងការជួបប្រជុំកាលពីចុងខែធ្នូ នោះ បែរជាលោក ស ខេង ប្រាប់អ្នកសារព័ត៌មានថា ករណីអ្នកទាំងនេះទុកឲ្យតុលាការបន្តនីតិវិធីរបស់ខ្លួនទៅវិញ។
ប្រធានគណបក្សប្រជាជនកម្ពុជា លោក ហ៊ុន សែន និងជានាយករដ្ឋមន្ត្រី បានឆ្លើយតបទៅនឹងម្ចាស់គណនីហ្វេសប៊ុកឈ្មោះ ភារ៉ា ដែលស្នើសុំឲ្យលោកនាយករដ្ឋមន្ត្រីជួយធ្វើបុណ្យចែកទានដល់ក្រុមគ្រួសារខ្មែរទាំងអស់ ដោះលែងអ្នកទោសនយោបាយឲ្យបានទៅជួបជុំក្រុមគ្រួសារ ប្ដីប្រពន្ធ កូនកំពុងយំខ្លោចចិត្ត និងកំពុងរង់ចាំអ្នកជាទីស្រឡាញ់របស់ពួកគេ។ តែលោកនាយករដ្ឋមន្ត្រី ហ៊ុន សែន បញ្ជាក់ថា នៅកម្ពុជា គ្មានអ្នកទោសនយោបាយឡើយ មានតែអ្នកនយោបាយប្រព្រឹត្តខុសច្បាប់ ហើយជាប់គុក។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បន្ថែមថា អ្នកនយោបាយ ឬមិនអ្នកនយោបាយ ត្រូវតែទទួលខុសត្រូវចំពោះមុខច្បាប់នូវរាល់សកម្មភាពបទល្មើសដែលគេប្រព្រឹត្ត។ លោកអះអាងថា កម្ពុជា ជាប្រទេសគោរពលទ្ធិប្រជាធិបតេយ្យ នីតិរដ្ឋ ដូច្នេះសកម្មជនគណបក្សនយោបាយ ឬអ្នកនយោបាយក្ដី ត្រូវតែទទួលទោសកំហុសរបស់ខ្លួន មិនមែនគេហៅថាជាអ្នកទោសនយោបាយទេ៖ « យើងកសាងលទ្ធិប្រជាធិបតេយ្យ ស្របទៅតាម នីតិរដ្ឋផង អាហ្នឹងដែលធ្វើឲ្យប្រទេសមួយមានសុខដុមរមនាបាន តែបើ អ្នកនយោបាយ ធ្វើអីស្រេចតែចិត្ត ម៉េចគេ ហៅថា ច្បាប់ ? »។
ទោះបីជាបែបនេះក្ដី ទាំងអ្នកវិភាគ ទាំងអ្នកការពារសិទ្ធិមនុស្ស ពន្យល់ថា សកម្មជនគណបក្សប្រឆាំង តំណាងរាស្ត្រ លោក អ៊ុំ សំអាន សមាជិកព្រឹទ្ធសភា លោក ហុង សុខហួរ មន្ត្រីការពារសិទ្ធិមនុស្សនៃសមាគមអាដហុក ៤រូប និងអគ្គលេខាធិការរងគណៈកម្មាធិការជាតិរៀបចំការបោះឆ្នោត លោក នី ចរិយា ជាអ្នកទោសនយោបាយ ព្រោះថាសំណុំរឿងពួកគាត់ជាប់ពាក់ព័ន្ធនឹងរឿងនយោបាយ មិនមែនជាការប្រព្រឹត្តខុសច្បាប់ដូចតុលាការចោទប្រកាន់ទេ។
ប្រធានគ្រប់គ្រងផ្នែកអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ការចាប់ចងសកម្មជនគណបក្សប្រឆាំង និងសកម្មជនសិទ្ធិមនុស្សនៅពេលស្ថានភាពនយោបាយគណបក្សជាប់ឆ្នោតទាំងពីរកំពុងជាប់គាំង បញ្ហាទាំងអស់នេះទោះបីជារដ្ឋាភិបាលព្យាយាមបកស្រាយថាមិនមែនជាអ្នកទោសនយោបាយក្ដី តែគេដឹងជាទូទៅថា អ្នកទាំងនោះជាប់ទោសពាក់ព័ន្ធនឹងរឿងនយោបាយ៖ « នៅពេល ស្ថានភាពនយោបាយត្រូវរ៉ូវគ្នា អ្នក ទាំងអស់នោះត្រូវបាន ដោះលែង ។ នៅពេលស្ថានភាពនយោបាយជាប់គាំង គេចាប់អ្នកទាំងអស់នោះមកវិញ សូម្បីតែការស្នើសុំនៅក្រៅឃុំ ក៏គេមិនអនុញ្ញាតដែរ »។
មកទល់ពេលនេះ ក្រៅពីសកម្មជនការពារសិទ្ធិមនុស្សអាដហុក ៤រូប និងអគ្គលេខាធិការរង គ.ជ.ប កំពុងជាប់ពន្ធនាគារនោះ គឺមានសកម្មជនគណបក្សប្រឆាំង និងសមាជិករដ្ឋសភា ព្រឹទ្ធសភា កំពុងជាប់ពន្ធនាគារចំនួន ១៥នាក់ទៀត ក្នុងនោះមានអ្នកខ្លះត្រូវបានតុលាការផ្ដន្ទាទោសពី ៧ឆ្នាំដល់ ២០ឆ្នាំ។
របាយការណ៍របស់អង្គការសិទ្ធិមនុស្សលីកាដូ បញ្ជាក់ថា អ្នកទោសនយោបាយនៅកម្ពុជា មានចំនួន ២៦នាក់ កំពុងជាប់ពន្ធនាគារ ក្នុងចំណោមអ្នកទាំងនោះរួមមាន អ្នកធ្វើការផ្នែកបរិស្ថាន ព្រះសង្ឃ សមាជិករដ្ឋសភា ព្រឹទ្ធសភា និស្សិត និងអ្នកធ្វើការផ្នែកសិទ្ធិមនុស្ស ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។