Opens in new windowមន្ត្រីគណបក្សប្រឆាំងនៅស្រុកចម្ការលើ ខេត្តកំពង់ចាម ហៅព័ត៌មានទាមទារប្រាក់មូលនិធិទូរទស្សន៍ព្រះអាទិត្យ ថាជារឿងបំផុសបំផុល និងបំពុលបរិយាកាសសង្គម។ ការលើកឡើងបែបនេះ ព្រោះនៅពេលថ្មីៗនេះ មានការបង្ហោះញត្តិទាមទារប្រាក់មូលនិធិរបស់ខ្លួនវិញ ក្រោយពីផ្ដល់ជូនមូលនិធិទូរទស្សន៍ព្រះអាទិត្យនោះ។
មន្ត្រីគណបក្សសង្គ្រោះជាតិ ស្រុកចម្ការលើ នៅរសៀលថ្ងៃទី៧ កញ្ញា បានផ្ញើលិខិតមួយទៅអធិការស្រុក ដើម្បីស្នើឲ្យជួយស្វែងរកឈ្មោះតំណាងប្រជាពលរដ្ឋ ១០នាក់ ដែលអះអាងថាតំណាងឲ្យពលរដ្ឋជាង ២០០គ្រួសារ ដែលបានផ្ដល់លុយជូនមូលនិធិទូរទស្សន៍សង្គ្រោះជាតិនោះ។
ការស្នើសុំនេះ បន្ទាប់ពីមានលិខិតមួយដែលមានឈ្មោះតំណាងពលរដ្ឋទាំង ១០នាក់ បង្ហោះផ្សព្វផ្សាយតាមហ្វេសប៊ុក (Facebook) ទាមទារប្រាក់ ២០លានរៀលវិញ។
ប្រធានប្រតិបត្តិស្រុកចម្ការលើ ពីគណបក្សសង្គ្រោះជាតិ លោក វ៉ាត់ ធារិត មានប្រសាសន៍ថា លោកបានពិនិត្យមើលឈ្មោះតំណាងពលរដ្ឋទាំងនោះហើយ ប៉ុន្តែមិនមានឈ្មោះទាំងនោះក្នុងបញ្ជីបង់ប្រាក់ ទើបលោកដាក់ពាក្យប្ដឹងទៅអធិការនគរបាលស្រុកបន្ថែមទៀត ដើម្បីឲ្យសមត្ថកិច្ចជួយស្វែងរកជនទាំងនោះ ក្រែងលោខាងលោកនៅមានភាពខ្វះចន្លោះ។ លោកយល់ថា ការផ្សព្វផ្សាយព័ត៌មានទាមទារប្រាក់មូលនិធិវិញនោះ គឺក្នុងគោលបំណងបន្ទច់បង្អាក់ ម្យ៉ាងអាចធ្វើឲ្យពលរដ្ឋដែលបានបង់ប្រាក់ចូលទៅមូលនិធិ បាត់បង់ជំនឿទុកចិត្តលើគណបក្សសង្គ្រោះជាតិ៖ «គេធ្វើនេះគេគិតថាមានប្រយោជន៍សម្រាប់គេ បើទោះបីជាការធ្វើនោះជាការក្លែងបន្លំ ឬប្រឌិតក៏ដោយ ប៉ុន្តែក៏មិនអាចធ្វើឲ្យអ្នកជាក់ស្តែងមានការចាប់អារម្មណ៍ដែរ»។
លិខិតអមដោយស្នាមមេដៃពលរដ្ឋ ១០នាក់ ដែលអះអាងថាជាតំណាងពលរដ្ឋជាង ២០០គ្រួសារនៅស្រុកចម្ការលើ គឺបានបង្ហោះក្នុងហ្វេសប៊ុក កាលពីចុងខែសីហា។ ពួកគេទាំងនោះ រួមមានឈ្មោះ កុយ ចិន្តា កែវ ពិសី មុត ចន្ថា ជ័យ វីរៈ សុខ ហាន ហុង សុខហេង ចៅ វាសនា សុង សិត វ៉ាន់ គី និង ញ៉ូវ ក្រូច។ ក្នុងលិខិតនោះ គឺទាមទារប្រាក់ ២០លានរៀលដែលពួកគេអះអាងថា ពួកគេបានបង់ជូនគណបក្សសង្គ្រោះជាតិ កាលពីពេលកន្លងទៅ។ ការទាមទារប្រាក់វិញនោះ បន្ទាប់ពីពួកគេគ្មានដំណឹងពីដំណើរការបង្កើតទូរទស្សន៍នៅឡើយ ម្យ៉ាងប្រាក់របស់ពួកគាត់ក៏បាត់សូន្យទៀត។
យ៉ាងណាក៏ដោយ ប្រធានប្រតិបត្តិស្រុកចម្ការលើ ដដែលបញ្ជាក់ថា ឈ្មោះទាំងនោះ គឺពួកលោកស្រាវជ្រាវរកមិនទាន់ឃើញនៅឡើយទេ ចំណែកចំនួនទឹកប្រាក់ក៏មិនត្រឹមត្រូវដែរ ព្រោះមកដល់ពេលនេះ មូលនិធិទូរទស្សន៍សម្រាប់ស្រុកចម្ការលើ គឺទើបតែទទួលបានជាង ៦លានរៀលប៉ុណ្ណោះ។
ទាក់ទងបញ្ហានេះ អធិការនគរបាលស្រុកចម្ការលើ លោក អ៊ិត ដារ៉ា មិនមានប្រសាសន៍យ៉ាងណាទេ ដោយលោកថាជាប់ប្រជុំ។
ទោះបីជាបែបនេះក្តី ប្រធានប្រតិបត្តិខេត្តពីគណបក្សសង្គ្រោះជាតិ លោក សាន់ សឿង មានប្រសាសន៍ថា បញ្ហានេះទើបតែមាននៅស្រុកចម្ការលើ មួយ ក្រៅពីនេះមិនមានឡើយ។ លោកបញ្ជាក់ថា ប្រជាពលរដ្ឋបានយល់ច្បាស់ហើយជុំវិញព័ត៌មានបំភាន់ការពិតនេះ។ ដូច្នេះ លោកថាវាមិនអាចធ្វើឲ្យប៉ះពាល់ដល់អារម្មណ៍របស់ពលរដ្ឋទេ ប៉ុន្តែលោកចង់ឲ្យអាជ្ញាធរជួយសហការដើម្បីបង្ហាញការពិត៖ «ការធ្វើរបស់យើង យើងធ្វើច្បាស់លាស់ បើទោះបីជាប្រជាពលរដ្ឋគាត់ចូលតែ ១០០ខ្មែរ ក៏មានបង្កាន់ដៃជូនគាត់ដែរ»។
ការទាមទារលុយពីមូលនិធិទូរទស្សន៍ព្រះអាទិត្យនេះ បានលេចឮជាបន្តបន្ទាប់ ដូចជា កើតមាននៅខេត្តកណ្ដាល ខេត្តស្វាយរៀង ជាដើម ប៉ុន្តែពេលសមត្ថកិច្ចស្រាវជ្រាវទៅ គឺមិនមានឈ្មោះជនទាំងនោះឡើយ។ ការធ្វើញត្តិឡើងដើម្បីទាមទារប្រាក់មូលនិធិទូរទស្សន៍ព្រះអាទិត្យរបស់គណបក្សសង្គ្រោះជាតិ ហាក់ធ្វើឡើងជាលក្ខណៈប្រព័ន្ធ ព្រោះមានលក្ខណៈដូចៗគ្នា ខុសតែទីតាំងប៉ុណ្ណោះ។
បញ្ហានេះ មន្ត្រីគណបក្សសង្គ្រោះជាតិ អះអាងថាជាសកម្មភាពដើម្បីបង្វែរការចាប់អារម្មណ៍របស់មតិសាធារណជនពីរឿងផែនទី រឿងព្រំដែន ទៅចាប់អារម្មណ៍រឿងទូរទស្សន៍វិញ។ យ៉ាងណាក្តី មន្ត្រីគណបក្សប្រឆាំងលើកឡើងថា ករណីនេះជារឿងល្ខោនដែលគ្មានអ្នកមើល ព្រោះតួអង្គសម្ដែងសុទ្ធតែក្លែងក្លាយ ហើយរហូតមកដល់ពេលនេះ គណបក្សសង្គ្រោះជាតិ បានទទួលវិភាគទានទាំងក្នុងប្រទេស និងក្រៅប្រទេសសរុបប្រមាណ ៧០ម៉ឺនដុល្លារអាមេរិក។ ចំណែកដំណើរការទូរទស្សន៍វិញ អាចចាប់ផ្ដើមនៅដើមឆ្នាំ២០១៦ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។